എന്റെ വിലയേറിയ ദൈവപൈതലേ, നമ്മുടെ കർത്താവും രക്ഷകനുമായ യേശുക്രിസ്തുവിന്റെ മഹത്തായ നാമത്തിൽ ഞാൻ നിങ്ങൾക്ക് വന്ദനം പറയുന്നു! ഇന്ന്, ആവർത്തനപുസ്തകം 28:5-ൽ കാണുന്ന ദൈവത്തിന്റെ വാഗ്‌ദത്തത്തെക്കുറിച്ച് നാം ചിന്തിക്കാൻ പോകുന്നു, "നിന്റെ കൊട്ടയും മാവു കുഴെക്കുന്ന തൊട്ടിയും അനുഗ്രഹിക്കപ്പെടും." ഈ അനുഗ്രഹം നിങ്ങൾക്ക് എപ്പോഴാണ് ലഭിക്കുക? ആവർത്തനപുസ്തകം 28:1-2 വായിച്ചാൽ, അത് ഇങ്ങനെ പറയുന്നു, "നിന്റെ ദൈവമായ യഹോവയുടെ വാക്കു നീ ശ്രദ്ധയോടെ കേട്ടനുസരിച്ചാൽ... നിന്റെ ദൈവമായ യഹോവ നിന്നെ ഭൂമിയിലുള്ള സർവ്വജാതികൾക്കും മീതെ ഉന്നതമാക്കും. ഈ അനുഗ്രഹങ്ങളെല്ലാം നിനക്കു സിദ്ധിക്കും." ആമേൻ! അതെ, ദൈവത്തിന്റെ സമൃദ്ധമായ എല്ലാ അനുഗ്രഹങ്ങളും നിങ്ങളുടെമേൽ കടന്നുവരും!

ആരാണ് ഇതുപോലെ അനുഗ്രഹിക്കപ്പെടുക? സദൃശവാക്യങ്ങൾ 28:20 പറയുന്നു, “വിശ്വസ്തപുരുഷൻ അനുഗ്രഹസമ്പൂർണ്ണൻ." അത് ശരിയാണ്! വിശ്വസ്തനായ വ്യക്തി, വിശ്വസ്ത ഹൃദയത്തോടെ ദൈവത്തെ അന്വേഷിക്കുന്നവൻ, ദൈവസന്നിധിയിൽ വിശ്വസ്തതയോടെ സമയം ചെലവഴിക്കുകയും അവന്റെ വചനം വായിക്കുകയും പ്രാർത്ഥിക്കുകയും ചെയ്യുന്നവർ; അവർക്ക് അനുഗ്രഹങ്ങൾ സമൃദ്ധമായി ലഭിക്കും. നിങ്ങൾ സദൃശവാക്യങ്ങൾ 3:33 വായിക്കുകയാണെങ്കിൽ, അത് ഇപ്രകാരം പറയുന്നു: "നീതിമാന്മാരുടെ വാസസ്ഥലത്തെയോ കർത്താവ് അനുഗ്രഹിക്കുന്നു." മലാഖി 3:10-ൽ നാം വായിക്കുന്ന മറ്റൊരു വാഗ്‌ദത്തം, “എന്റെ ആലയത്തിൽ ആഹാരം ഉണ്ടാകേണ്ടതിന്നു നിങ്ങൾ ദശാംശം മുഴുവനും ഭണ്ഡാരത്തിലേക്കു കൊണ്ടുവരുവിൻ. എന്നിങ്ങനെ നിങ്ങൾ ഇതിനാൽ എന്നെ പരീക്ഷിപ്പിൻ" എന്നു സൈന്യങ്ങളുടെ യഹോവ അരുളിച്ചെയ്യുന്നു. "ഞാൻ നിങ്ങൾക്കു ആകാശത്തിന്റെ കിളിവാതിലുകളെ തുറന്നു, സ്ഥലം പോരാതെവരുവോളം നിങ്ങളുടെമേൽ അനുഗ്രഹം പകരുകയില്ലയോ?" എത്ര ശക്തമായ ഒരു വാഗ്‌ദത്തം!

അതുകൊണ്ട്, എന്റെ സുഹൃത്തേ, കർത്താവിനെ ഉത്സാഹത്തോടെ അന്വേഷിക്കുവിൻ. ആത്മാർത്ഥതയോടെ അവനെ അന്വേഷിക്കുവിൻ. രാവിലെ അവനെ അന്വേഷിക്കുവിൻ. ഉച്ചക്ക് അവനെ അന്വേഷിക്കുവിൻ. രാത്രിയിൽ അവനെ അന്വേഷിക്കുവിൻ. സങ്കീർത്തനം 55:17 -ൽ ദാവീദ് പറയുന്നത് അതാണ്, “ ഞാൻ വൈകുന്നേരത്തും കാലത്തും ഉച്ചെക്കും സങ്കടം ബോധിപ്പിച്ചു കരയും; അവൻ എന്റെ പ്രാർത്ഥന കേൾക്കും." അതെ, ഒരിക്കൽ കൂടി, മലാഖി 3:10 നമ്മെ ഓർമ്മിപ്പിക്കുന്നു, നിങ്ങളുടെ ദശാംശം ഭണ്ഡാരത്തിലേക്ക് കൊണ്ടുവരുവിൻ. അപ്പോൾ, അത് സ്വീകരിക്കാൻ വേണ്ടത്ര സ്ഥലമില്ലാത്തവിധം ദൈവം നിങ്ങളെ അനുഗ്രഹിക്കും! എന്റെ സ്വന്തം ജീവിതത്തിൽ ഞാൻ ഇത് അനുഭവിച്ചിട്ടുണ്ട്. ആദ്യം എനിക്ക് അത് മനസ്സിലാക്കാൻ കഴിഞ്ഞില്ല. പത്തിലൊന്ന് നൽകുന്നത് വളരെ ബുദ്ധിമുട്ടാണെന്നും ബാക്കി തുക ഒരു മാസം നീണ്ടുനിൽക്കാൻ പര്യാപ്തമല്ലെന്നും ഞാൻ കരുതി. പക്ഷേ ദൈവം എന്നെ മനോഹരമായ ഒരു പാഠം പഠിപ്പിച്ചു. നാം ആത്മാർത്ഥമായി അനുസരിക്കുമ്പോൾ കർത്താവ് നമ്മെ സമൃദ്ധമായി അനുഗ്രഹിക്കുന്നു. എന്റെ സുഹൃത്തേ, അതേപോലെ, നിങ്ങളും അനുഗ്രഹിക്കപ്പെടാൻ പോകുന്നു. ഇതെല്ലാം ചെയ്യുക - വിശ്വസ്തതയോടെ കർത്താവിനെ അന്വേഷിക്കുക, നീതിപൂർവ്വം ജീവിക്കുക, സന്തോഷത്തോടെ നൽകുക, അപ്പോൾ നിങ്ങൾക്ക് ദൈവത്തിന്റെ സമൃദ്ധമായ അനുഗ്രഹങ്ങളെല്ലാം ലഭിക്കും!

PRAYER:
സ്നേഹവാനായ സ്വർഗ്ഗീയ പിതാവേ, സമൃദ്ധമായ അനുഗ്രഹങ്ങൾ നൽകുമെന്ന അങ്ങയുടെ വാഗ്‌ദത്തത്തിന് നന്ദി. അങ്ങയുടെ ശബ്ദം ശ്രദ്ധയോടെ കേട്ട് അങ്ങയുടെ വഴികളിൽ നടക്കാൻ എന്നെ സഹായിക്കണമേ. എന്നെ, ഹൃദയത്തിൽ വിശ്വസ്തതയും പ്രാർത്ഥനയിൽ സ്ഥിരതയും അങ്ങയുടെ വചനത്തിൽ ഉറച്ചുനിൽക്കുകയും ചെയ്യുന്നവളാക്കേണമേ. നീതിപൂർവ്വം ജീവിക്കാൻ ഞാൻ പ്രതിജ്ഞാബദ്ധയാകുമ്പോൾ എന്റെ ഭവനം അങ്ങയുടെ സമാധാനത്താലും കൃപയാലും നിറയട്ടെ. സന്തോഷത്തോടെയും വിശ്വാസത്തോടെയും എന്റെ ദശാംശങ്ങളും വഴിപാടുകളും കൊണ്ട് അങ്ങയെ ബഹുമാനിക്കാൻ എന്നെ പഠിപ്പിക്കണമേ. കർത്താവേ, ആകാശത്തിന്റെ കിളിവാതിലുകളെ തുറന്ന് എന്റെ ജീവിതത്തിൽ അങ്ങയുടെ അനുഗ്രഹങ്ങൾ ചൊരിയണമേ. എന്റെ കൊട്ടയും മാവു കുഴെക്കുന്ന തൊട്ടിയും അങ്ങയുടെ വിഭവങ്ങളാൽ നിറയട്ടെ. രാവിലെയും ഉച്ചയ്ക്കും രാത്രിയും ഞാൻ അങ്ങയെ അന്വേഷിക്കുമ്പോൾ അങ്ങയുടെ അനുഗ്രഹങ്ങൾ എന്നെ പിന്തുടരട്ടെ. യേശുവിന്റെ നാമത്തിൽ, ഞാൻ പ്രാർത്ഥിക്കുന്നു, ആമേൻ.