నా ప్రియులారా, మీ నిరీక్షణ ఏమైయున్నది? మరియు మీ భవిష్యత్తును గురించి మీరు ఏమి ఆలోచించుచున్నారు? కొన్నిసార్లు, మీకు భవిష్యత్తు ఉందని మీ హృదయం నమ్మడానికి నిరాకరించవచ్చును మరియు ఈ లోకము మీరు నాశనం చేయబడ్డారనియు, మీరు ఇక ఎన్నటికిని వర్థిల్లరు అని చెబుతుండవచ్చును? మీరు ఎన్నటికిని ప్రావీణ్యతను పొంది ముందుకు సాగిపోలేరు; మీరు ఎన్నటికిని పైకి లేవలేరు అని చెప్పవచ్చును. అయినప్పటికిని మీ నిరీక్షణ ఏమిటి? అందుకే నేటి వాగ్దానముగా బైబిల్ నుండి సామెతలు 10:28వ వచనమును చూచినట్లయితే, "నీతిమంతుల ఆశ సంతోషము పుట్టించును. భక్తిహీనుల ఆశ భంగమైపోవును'' ప్రకారము మరియు దేవుడు మీ భవిష్యత్తు పట్ల మీరు ఆనందించాలని మీ పట్ల కోరుకుంటున్నాడు. తన జీవితం ప్రభువు హస్తాలలో ఉన్నదనియు మరియు దేవుడే తనను నడిపిస్తాడని దావీదు చెప్పాడు. అదేవిధముగా, నేడు మీ జీవితం కూడా దేవుని హస్తాలలో ఉన్నది. అంతమాత్రమే కాదు, మీ శ్వాస లేదా మీ జ్ఞానం లేదా మనుష్యుల దయ ద్వారా వచ్చునది కాదు, దేవుడే మిమ్మును నడిపించుచున్నాడు. నా ప్రియులారా, మీరు దేవుని బిడ్డలై యున్నారు మరియు మీలో ఉన్నవాడు లోకంలో ఉన్నవాని కంటే గొప్పవాడు. మరియు మీరు ఏడుసార్లు పడిపోయినను సరే, మీరు తిరిగి లేచెదరు మరియు మీరు ఆయన యొక్క జీవపునరుత్థానములో ఉన్నారని ప్రభువు సెలవిచ్చుచున్నాడు. మీరు చనిపోయినను, తిరిగి లేచేదరు అని ప్రభువు సెలవిచ్చుచున్నాడు, ఆయన మిమ్మును మరల లేపుతాడు. ఆయన మీ వ్యాపారాన్ని, మీ ఆరోగ్యాన్ని, మీ పరిశుద్ధతను, మీ పిల్లలను, మీ కుటుంబమును, మీ ఆధ్యాత్మిక జీవితమును, మీ పరిచర్యను మరియు మీ ఆర్థిక స్థితిని ఆయన మరల లేవనెత్తుతాడు. మీరు యేసుకు చెందినవారు. ఎందుకనగా, ఆయనే జీవమును పునరుతానమునై యున్నాడు. కాబట్టి దేవుడు మీ యొక్క భవిష్యత్తు తన ఉద్దేశము చేత సంతోషముతో నింపి, మీ భవిష్యత్తు పట్ల మీకు నిరీక్షణను కలిగిస్తాడు. కాబట్టి, ఈ రోజులోనికి మరియు మీ జీవితంలోనికి ఆనందంతో నడుచుటకు ముందుకు సాగండి.

నా ప్రియులారా, మీ నిరీక్షణ ఏమైయున్నది? అని బైబిల్ నుండి 1 పేతురు 1:4వ వచనములో చూచినట్లయితే, "మృతులలో నుండి యేసుక్రీస్తు తిరిగి లేచుట వలన జీవముతో కూడిన నిరీక్షణ మనకు కలుగునట్లు, అనగా అక్షయమైనదియు, నిర్మలమైనదియు, వాడబారనిదియునైన స్వాస్యము మనకు కలుగునట్లు, ఆయన తన విశేష కనికరముచొప్పున మనలను మరల జన్మింపజేసెను'' అని చెప్పబడిన ప్రకారం, మన నిరీక్షణ పునరుత్థానుడైన యేసులో ఉన్నది. ఎందుకంటే, ఆయన మనకు నూతన జన్మనిచ్చి, పాతవి గతించిపోవునట్లుగాను, సమస్తమును నూతనముగా చేయుచున్నాడు. అయితే, క్రీస్తు మన జీవితమును సమస్తమును నూతనముగా చేయుచున్నాడు. గనుకనే, ఒకవేళ మీరు సమస్యలను ఎదుర్కొన్నప్పుడు, దేవుడు ప్రతిదీ మేలుగా మారుస్తాడనియు మరియు మనం అవమానం అనుభవించిన అదే స్థలంలో, ఆయన ఖ్యాతిని, మంచిపేరును మరియు ఘనతను ఇస్తాడని మనం చెబుతాము. ఆయన ప్రతిదానిని రెట్టింపుగా పునరుద్ధరిస్తాడు, రెట్టింపు ఘనతను మనకు ఇస్తాడు మరియు ఈ ఆశీర్వాదం యేసు నామంలో మీ మీదికి ఇప్పుడే దిగి వస్తుంది. అందుకే బైబిల్ నుండి కీర్తనలు 16:11వ వచనములో చూచినట్లయితే, "జీవమార్గమును నీవు నాకు తెలియజేసెదవు నీ సన్నిధిని సంపూర్ణ సంతోషము కలదు నీ కుడిచేతిలో నిత్యము సుఖములు కలవు'' అని చెప్పబడిన ప్రకారము నాశనము, మరణము మరియు నష్టము అను మార్గము కాదు. ఆయన సన్నిధానములో ఉన్న సంతోషముతో నింపుతాడు. మీరు ఆయన సన్నిధిలో ఉన్నప్పుడు సమస్తమును సజీవంగా మీ యొద్దకు వచ్చుచున్నది. ఆయన సన్నిధానములో సకల సంతోషములు కలవు. మీరు ఎప్పుడు కూడా భయపడనవసరము లేదు మరియు భయాన్ని అనుమతించకండి. ఎందుకంటే, ఆయన సన్నిధి యొక్క ఆనందం మిమ్మును పైకి లేవనెత్తుతుంది.

అందుకే బైబిల్ నుండి రోమీయులకు 5:2 వ వచనములో చూచినట్లయితే, " మరియు ఆయన ద్వారా మనము విశ్వాసము వలన ఈ కృపయందు ప్రవేశముగలవారమై, అందులో నిలిచియుండి, దేవుని మహిమను గూర్చిన నిరీక్షణనుబట్టి అతిశయపడుచున్నాము'' అని చెప్పబడిన ప్రకారము నా ప్రియులారా, ఆయన కృప మనలను పైకి లేవనెత్తుతుంది. మన యొక్క నీతి నిమిత్తము కాదు, ఆయన యొక్క కృపాకనికరము మనలను పైకిలేవనెత్తుచున్నది. దేవుని యొక్క మహిమ ద్వారానే మనము అతిశయపడుచున్నాము. యేసు నామంలో ఈ ఆశీర్వాదాన్ని దేవుడు నేడే మీకు అనుగ్రహించును గాక. ఇది మీ ఆశ మరియు నిరీక్షణయై యున్నది. కాబట్టి ఆయన సన్నిధిలో సంతోషంతో నింపబడండి. దేవుని ఆశీర్వాదములను మరియు ఆనందమును పొందుకొనండి. నేటి వాగ్దానము నుండి దేవుడు మిమ్మును దీవించును గాక.

ప్రార్థన:
ప్రేమగల మా పరలోకమందున్న తండ్రీ, నేటి వాగ్దానము ద్వారా నీవు మాతో మాట్లాడినందుకై నీకు వందనాలు. ప్రభువా, మాకు జీవమునిచ్చు నిరీక్షణగా ఉన్నందుకై నీకు వందనాలు. దేవా, మా భవిష్యత్తును నీ బలమైన హస్తాలతో ఎత్తి పట్టుకొనుము. ప్రభువా, దయచేసి మా యొక్క ప్రతి పతనం మరియు భయం నుండి మమ్మును పైకి లేవనెత్తుము. దేవా, మా హృదయాన్ని నీ సన్నిధి సంతోషముతో నింపుము. యేసయ్యా, నీ యొక్క పునరుత్థానపు శక్తి ద్వారా మా జీవితంలోని సమస్త కార్యములను నూతనంగా చేయుము. దేవా, దయచేసి మా అవమానాన్ని ఘనతగా మార్చుము మరియు మమ్మును రెట్టింపుగా పునరుద్ధరించుము. ప్రభువా, మా భవిష్యత్తు పట్ల నీ ప్రణాళికలను విశ్వసించునట్లుగా మా విశ్వాసాన్ని బలపరచుము. దేవా, మా బలం పనిచేయలేని చోట నీ కృప మమ్మును మోయునట్లుగా చేయుము. ప్రభువా, మా పిలుపులోను మరియు మా జీవితంలో మేము ఎదగడానికి మాకు సహాయం చేయుము. దేవా, ఆనందం మరియు నమ్మకంతో మా భవిష్యత్తును నీకు అప్పగించుచున్నాము. యేసయ్యా, జీవమార్గమును నీవు మాకు తెలియజేసి, నీ సన్నిధిలో ఉన్న సంపూర్ణ సంతోషమును మరియు నీ కుడిచేతిలో ఉన్న నిత్యము సుఖములు మాకు దయచేయుమని యేసుక్రీస్తు ప్రశస్తమైన నామమున ప్రార్థించుచున్నాము తండ్రీ, ఆమేన్.