உங்கள் நம்பிக்கை என்ன? உங்கள் எதிர்காலத்தைக் குறித்து என்ன நினைக்கிறீர்கள்? உங்களுக்கு ஓர் எதிர்காலம் இருக்கிறதென்று உங்கள் உள்ளமே எண்ண மறுக்கக்கூடிய நிலை காணப்படலாம். உலகம், நீ அழிந்துவிட்டாய்; இனி ஒருபோதும் செழிக்கமுடியாது; ஒருபோதும் தேர்ச்சி பெற முடியாது; ஒருபோதும் எழும்ப முடியாது என்று கூறலாம். ஆனால், வேதம், "நீதிமான்களின் நம்பிக்கை மகிழ்ச்சியாகும்; துன்மார்க்கருடைய அபேட்சையோ அழியும்" (நீதிமொழிகள் 10:28) என்று கூறுகிறது. உங்கள் எதிர்காலத்தைக் குறித்து எண்ணி நீங்கள் மகிழவேண்டும் என்று தேவனும் விரும்புகிறார். தன் உயிர் கர்த்தரின் கரத்தில் இருப்பதாக தாவீது கூறுகிறான். உங்கள் உயிரும் உங்கள் சுவாசத்தினால் அல்லது உங்கள் ஞானத்தினால் அல்லது மக்களின் தயவினால் அல்ல, தேவனாலேயே இருக்கிறது. நீங்கள் தேவனுடைய பிள்ளை. உலகத்திலிருக்கிறவனிலும் உங்களிலிருக்கிறவர் பெரியவர். நீங்கள் ஏழு முறை விழுந்தாலும் எழுந்திருப்பீர்கள். தமது ஜீவனுக்கும் உயிர்த்தெழுதலுக்கும் கீழாக நீங்கள் இருப்பதாக ஆண்டவர் கூறுகிறார். நீங்கள் மரித்தாலும் அவர் உங்களை எழுப்புவார். உங்கள் வியாபாரத்தை, ஆரோக்கியத்தை, பரிசுத்தத்தை, பிள்ளைகளை, குடும்பத்தினரை, ஆவிக்குரிய பெலனை, ஊழியத்தை, பொருளாதாரத்தை அவர் எழும்ப செய்வார். உயிர்த்தெழுதலும் ஜீவனுமாயிருக்கிற இயேசுவுக்கு நீங்கள் சொந்தமானவராதலால் எதிர்காலத்தைக் குறித்த மகிமையான நம்பிக்கையை தேவன் உங்களுக்குத் தருகிறார்; ஆகவே இந்த நாளுக்குள்ளும், உங்கள் வாழ்க்கையினுள்ளும் சந்தோஷத்தோடே நடந்திடுங்கள்.

உங்கள் நம்பிக்கை எது? உயிர்த்தெழுந்த இயேசு, புதிய பிறப்பை நமக்குத் தருவதோடு, பழையவை அனைத்தும் சென்றபிறகு எல்லாவற்றையும் புதிதாக்குவதால் அவர்மேல் நம்பிக்கையாயிருப்போம் (1 பேதுரு 1:4).  பிரச்னைகளை சந்திக்கும்போது, தேவன் எல்லாவற்றையும் நன்மையாக்குவார் என்றும், வெட்கப்பட்ட அதே இடத்தில் அவர் கனத்தையும் புகழ்ச்சியையும் தருவார் என்று சொல்கிறோம். அவர் எல்லாவற்றையும் இரட்டிப்பாக திரும்ப தருவார். இருமடங்கு கனம் இயேசுவின் நாமத்தில் கிடைக்கும். வேதம், "ஜீவமார்க்கத்தை எனக்குத் தெரியப்படுத்துவீர்; உம்முடைய சமுகத்தில் பரிபூரண ஆனந்தமும், உம்முடைய வலதுபாரிசத்தில் நித்திய பேரின்பமும் உண்டு" (சங்கீதம் 16:11) என்று கூறுகிறது. நீங்கள், அவரது சமுகத்தில் இருப்பதால் எல்லாம் ஜீவனோடிருக்கும். ஒருபோதும் பயப்படாதிருங்கள். தேவ சமுகத்தின் சந்தோஷம் உங்களை உயர்த்தும் என்பதால் பயத்தை ஒருபோதும் அனுமதிக்காதீர்கள்.

வேதம், "அவர்மூலமாய் நாம் இந்தக் கிருபையில் பிரவேசிக்கும் சிலாக்கியத்தை விசுவாசத்தினால் பெற்று நிலைகொண்டிருந்து, தேவமகிமையை அடைவோமென்கிற நம்பிக்கையினாலே மேன்மைபாராட்டுகிறோம்" (ரோமர் 5:2) என்று கூறுகிறது. இந்த ஆசீர்வாதத்தை இயேசுவின் நாமத்தினாலே தேவன் உங்களுக்குத் தருவாராக. இதுவே உங்கள் நம்பிக்கை. ஆகவே, அவரது சமுகத்தின் சந்தோஷத்தால் நிரம்பியிருப்பீர்களாக.

ஜெபம்:
அன்புள்ள ஆண்டவரே, எனக்கு ஜீவனின் நம்பிக்கையாக இருப்பதற்காக உம்மை ஸ்தோத்திரிக்கிறேன். உம் பலத்த கரத்தில் என் எதிர்காலத்தை வைத்திருக்கிறீர். எல்லா பயத்துக்கும் விழுதலுக்கும் என்னை விலக்கிக் காத்தருளும். உம் சமுகத்தின் சந்தோஷத்தினால் என் இருதயத்தை நிரப்பியருளும். உம் உயிர்த்தெழுதலின் வல்லமையால் என் வாழ்க்கையில் எல்லாவற்றையும் புதிதாக்கியருளும். என் வெட்கத்தை கனமாக மாற்றி, இரட்டிப்பான கனத்தைத் திரும்ப தந்தருளும். என் எதிர்காலத்தை குறித்த உம் நினைவுகளை நம்பும்படி என் விசுவாசத்தை ஸ்திரப்படுத்தும். என் பெலன் என்னை சுமந்துசெல்ல முடியாத இடங்களுக்கு உம் கிருபை என்னை சுமப்பதாக. என் அழைப்பிலும் வாழ்க்கையிலும் உயர்ந்திட எனக்கு உதவி செய்யும். என் எதிர்காலத்தை சந்தோஷத்துடனும் நம்பிக்கையுடனும் உம்மிடம் ஒப்படைத்து இயேசுவின் நாமத்தில் ஜெபிக்கிறேன், ஆமென்.