എന്റെ പ്രിയ സുഹൃത്തുക്കളേ, നിങ്ങളുടെ പാതകൾ നേരെയാക്കാനും നിങ്ങളുടെ ജീവിതത്തിന്റെ എല്ലാ മേഖലകളിലും തന്റെ ഉദ്ദേശ്യം സ്ഥാപിക്കാനും കർത്താവ് ആഗ്രഹിക്കുന്നു. അവൻ നിങ്ങളെ നയിക്കുന്ന പാതയിൽ ആത്മവിശ്വാസത്തോടെ നടക്കുക. അപ്പോൾ അവന്റെ അനുഗ്രഹങ്ങൾ, സമാധാനം, സംരക്ഷണം, അവന്റെ പൂർണ്ണ ഹിതത്തിന്റെ പൂർത്തീകരണം എന്നിവ നിങ്ങൾ അനുഭവിക്കും. ഭയപ്പെടുകയോ നിരുത്സാഹപ്പെടുകയോ ഉത്കണ്ഠപ്പെടുകയോ സംശയിക്കുകയോ ചെയ്യരുത്. കർത്താവിന്റെ വഴി എല്ലായ്പ്പോഴും ജീവനിലേക്കും അനുഗ്രഹത്തിലേക്കും വിജയത്തിലേക്കും നയിക്കുന്നു. സങ്കീർത്തനം 37:5-ൽ പറയുന്നതുപോലെ: "നിന്റെ വഴി യഹോവയെ ഭരമേല്പിക്ക; അവനിൽ തന്നേ ആശ്രയിക്ക; അവൻ അതു നിർവ്വഹിക്കും." പൂർണ്ണഹൃദയത്തോടെ കർത്താവിനെ മുറുകെപ്പിടിക്കുക. നിരന്തരം യേശുവിന്റെ നാമം വിളിച്ചപേക്ഷിക്കുകയും നിങ്ങളുടെ ഓരോ ചുവടുവയ്പിനും മാർഗനിർദേശം നൽകാൻ അവനോട് അപേക്ഷിക്കുകയും ചെയ്യുക. നിങ്ങൾ അവന്റെ അനുഗ്രഹങ്ങൾക്ക് സാക്ഷ്യം വഹിക്കുമ്പോൾ, അവനെ സ്തുതിക്കുന്നത് തുടരുക. അപ്പോൾ അവൻ നിങ്ങളുടെ ജീവിതത്തിൽ തന്റെ ഉദ്ദേശ്യം നിറവേറ്റും.

എന്നാൽ കർത്താവ് നമ്മുടെ മുന്നിൽ തുറക്കുന്ന വഴികൾ എന്തൊക്കെയാണ്? നമ്മുടെ സ്വന്തം വഴി നാശത്തിലേക്ക് നയിക്കുന്നുവെന്ന് വേദപുസ്തകം മുന്നറിയിപ്പ് നൽകുന്നു. സദൃശവാക്യങ്ങൾ 14:12 ഇങ്ങനെ പറയുന്നു: "ചിലപ്പോൾ ഒരു വഴി മനുഷ്യന്നു ചൊവ്വായി തോന്നും; അതിന്റെ അവസാനമോ മരണവഴികൾ അത്രേ." അതിനാൽ, നാം നിരന്തരം ദൈവത്തിന്റെ മാർഗനിർദേശം അന്വേഷിക്കണം. സങ്കീർത്തനം 86:11 ൽ ദാവീദ് ഇപ്രകാരം പ്രാർത്ഥിച്ചു. "യഹോവേ, നിന്റെ വഴി എന്നെ പഠിപ്പിക്കേണമേ; ഞാൻ നിന്റെ സത്യത്തിൽ നടക്കും; നിന്റെ നാമത്തെ ഭയപ്പെടുവാൻ എന്റെ ഹൃദയത്തെ ഒന്നിപ്പിക്കേണമേ." നമ്മുടെ പ്രാർത്ഥന ഇതായിരിക്കണം: "കർത്താവേ, അങ്ങയുടെ വഴി എന്നെ പഠിപ്പിക്കണമേ. അങ്ങയുടെ സത്യത്തിൽ നടക്കാനും, അങ്ങയുടെ നാമത്തെ മഹത്വപ്പെടുത്തുന്നതിൽ എന്റെ  ഹൃദയത്തെ സമർപ്പിതമായി നിലനിർത്താനും എന്നെ  സഹായിക്കണമേ."

എനിക്ക് ആറ് വയസ്സുള്ളപ്പോൾ, എന്റെ ജന്മദിനത്തിൽ, കർത്താവ് എന്റെ പിതാവിലൂടെ എന്നോട് സംസാരിച്ചു. അദ്ദേഹം പറഞ്ഞു: "മകനേ, ഞാൻ നിന്റെ മുമ്പിൽ രണ്ട് വഴികൾ വെക്കുന്നു. ഒന്ന് ,എല്ലായ്പ്പോഴും നേരെ മുന്നിലേക്ക് നീന്തുന്ന മത്സ്യത്തിന്റെ പാത. മറ്റൊന്ന് എല്ലായ്പ്പോഴും വശങ്ങളിലേക്ക് നടക്കുന്ന ഞണ്ടിന്റെ പാത. നീ ഏത് പാത തിരഞ്ഞെടുക്കും? നീ മത്സ്യത്തെപ്പോലെ നേരെ നടന്നാൽ നിനക്ക് എന്റെ അനുഗ്രഹം ലഭിക്കും. എന്നാൽ നീ ഞണ്ട് പോലെ വളഞ്ഞ പാത തിരഞ്ഞെടുക്കുകയാണെങ്കിൽ അത് ശാപത്തിലേക്ക് നയിക്കും." നമ്മുടെ സ്വന്തം വഴികൾ മരണത്തിലേക്ക് നയിക്കുന്നു, എന്നാൽ നാം പ്രാർത്ഥനയിൽ കർത്താവിനെ അന്വേഷിക്കുമ്പോൾ, അവനെ ഭയപ്പെടാൻ അവൻ നമ്മെ പഠിപ്പിക്കുകയും തന്റെ സത്യത്തിൽ നമ്മെ നയിക്കുകയും ജീവിത പാതയിലേക്ക് നമ്മെ വഴിനടത്തുകയും ചെയ്യും. യേശു ഇപ്രകാരം പ്രഖ്യാപിച്ചു: "ഞാൻ വഴിയും സത്യവും ജീവനും ആകുന്നു." അവന്റെ വഴിയിൽ നടക്കാനുള്ള കൃപ കർത്താവ് നിങ്ങൾക്ക് നൽകട്ടെ.

ഒന്നാമതായി, കർത്താവിന്റെ വഴി വിശുദ്ധമായ വഴിയാണ്. സങ്കീർത്തനം 1:1-2 ഇങ്ങനെ പ്രഖ്യാപിക്കുന്നു: " ദുഷ്ടന്മാരുടെ ആലോചനപ്രകാരം നടക്കാതെയും പാപികളുടെ വഴിയിൽ നിൽക്കാതെയും പരിഹാസികളുടെ ഇരിപ്പിടത്തിൽ ഇരിക്കാതെയും യഹോവയുടെ ന്യായപ്രമാണത്തിൽ സന്തോഷിച്ചു അവന്റെ ന്യായപ്രമാണത്തെ രാപ്പകൽ ധ്യാനിക്കുന്നവൻ ഭാഗ്യവാൻ." ദൈവവചനത്തിൽ ആനന്ദിക്കുകയും യേശുവിനെ അനുഗമിക്കുകയും ചെയ്യുമ്പോൾ, നാം ദുഷ്ടന്മാരുടെ ആലോചനയിൽ നിന്നും പാപികളുടെ പാതയിൽ നിന്നും പരിഹാസികളുടെ കൂട്ടായ്മയിൽനിന്നും അകന്നുപോകുന്നു. അവന്റെ വിശുദ്ധ മാർഗ്ഗം നമ്മെ നാശത്തിൽ നിന്ന് സംരക്ഷിക്കുകയും ജീവിതപാതയിൽ നയിക്കുകയും ചെയ്യുന്നു.

രണ്ടാമതായി, കർത്താവിന്റെ വഴി ജ്ഞാനത്തിന്റെ വഴിയാണ്. സദൃശവാക്യങ്ങൾ 4:11-ൽ ഇങ്ങനെ പറയുന്നു: " ജ്ഞാനത്തിന്റെ മാർഗ്ഗം ഞാൻ നിന്നെ ഉപദേശിക്കുന്നു: നേരെയുള്ള പാതയിൽ ഞാൻ നിന്നെ നടത്തുന്നു." കർത്താവ് നമുക്ക് ജ്ഞാനത്തിന്റെ വഴി പഠിപ്പിക്കുകയും നേരായതും നീതിപൂർവ്വകവുമായ പാതകളിലൂടെ നമ്മെ നയിക്കുകയും ചെയ്യുന്നു. അവൻ എങ്ങനെയാണ് ഇത് ചെയ്യുന്നത്? സങ്കീർത്തനം 32:8 അതിനുള്ള ഉത്തരം നൽകുന്നു: " ഞാൻ നിന്നെ ഉപദേശിച്ചു, നടക്കേണ്ടുന്ന വഴി നിനക്കു കാണിച്ചുതരും; ഞാൻ നിന്റെമേൽ ദൃഷ്ടിവെച്ചു നിനക്കു ആലോചന പറഞ്ഞുതരും." കർത്താവ് സ്നേഹപൂർവ്വമായ കരുതലോടുകൂടി നിന്നെ നോക്കിക്കൊണ്ടിരിക്കുന്നു. അവൻ നിങ്ങളെ നിർദ്ദേശിക്കുകയും ഉപദേശിക്കുകയും നിങ്ങളുടെ ചുവടുകളെ സൗമ്യമായി നയിക്കുകയും ചെയ്യുന്നു. നിങ്ങളുടെ ഹൃദയത്തിന്റെ ആഴത്തിൽ, "ഇതാണ് വഴി, ഇതിൽ നടക്കുക" എന്ന് പറയുന്ന അവന്റെ ശബ്ദം നിങ്ങൾ കേൾക്കും. നിങ്ങൾ അവന്റെ മാർഗനിർദേശം അനുസരിക്കുമ്പോൾ ക്രിസ്തു നിങ്ങൾക്കായി ഒരുക്കിയിരിക്കുന്ന അനുഗ്രഹങ്ങൾ നിങ്ങൾക്ക് ലഭിക്കും.

മൂന്നാമതായി, കർത്താവിന്റെ വഴി പ്രബോധനത്തിന്റെ വഴിയാണ്. സദൃശവാക്യങ്ങൾ 10:17-ൽ ഇങ്ങനെ പറയുന്നു: "പ്രബോധനം പ്രമാണിക്കുന്നവൻ ജീവമാർഗ്ഗത്തിൽ ഇരിക്കുന്നു; ശാസന ത്യജിക്കുന്നവനോ ഉഴന്നുനടക്കുന്നു." പ്രബോധനം സ്വീകരിക്കുന്നവർ ജീവമാർഗ്ഗത്തിൽ തുടരുന്നു, എന്നാൽ ശാസനയെ നിരസിക്കുന്നവർ ദൈവത്തിന്റെ ഏറ്റവും മികച്ചതിൽ നിന്ന് അകന്നുപോകുന്നു. ഇന്ന് പലരും പ്രബോധനത്തെ എതിർക്കുന്നു. അവർ പറയുന്നു, "ഞാൻ എൻ്റെ ഇഷ്ടപ്രകാരം ജീവിക്കും. എന്റെ തീരുമാനങ്ങൾ ഞാൻ തന്നെ എടുക്കും. എനിക്ക് ഇഷ്ടമുള്ളത് ഞാൻ ചെയ്യും." സ്നേഹപൂർവമായ ശാസന നൽകപ്പെടുമ്പോൾ അവർ അത് നിരസിക്കുന്നു. എന്നാൽ ശാസന ത്യജിക്കുന്നവർക്ക് അവന്റെ അനുഗ്രഹങ്ങൾ നഷ്ടപ്പെടുന്നുവെന്ന് ദൈവവചനം നമ്മെ ഓർമ്മിപ്പിക്കുന്നു. പകരം, ദൈവിക ഉപദേശം സ്വീകരിക്കുകയും ജീവമാർഗ്ഗത്തിൽ തുടരുകയും ചെയ്യുക. ഞങ്ങളുടെ കുടുംബത്തിൽ, പ്രധാനപ്പെട്ട തീരുമാനങ്ങൾ എടുക്കുന്നതിന് മുമ്പ്, ഞങ്ങൾ ഒരുമിച്ചിരുന്ന് ചർച്ച ചെയ്യുകയും പ്രാർത്ഥിക്കുകയും ചെയ്യാറുണ്ട്. കൊച്ചുകുട്ടികളിലൂടെപോലും ദൈവം എങ്ങനെ ജ്ഞാനത്തോടെ സംസാരിക്കുന്നുവെന്ന് കാണുന്നത് അതിശയകരമാണ്. നാം ഒരുമിച്ച് അവന്റെ മാർഗനിർദേശം തേടുമ്പോൾ, അവൻ നമ്മെ വിശ്വസ്തതയോടെ നയിക്കുകയും നമ്മുടെ ഹൃദയങ്ങളിൽ സമാധാനം നിറയ്ക്കുകയും ചെയ്യുന്നു. "നിന്റെ എല്ലാവഴികളിലും അവനെ നിനെച്ചുകൊൾക; അവൻ നിന്റെ പാതകളെ നേരെയാക്കും" എന്ന് സദൃശവാക്യങ്ങൾ 3:6-ൽ വാഗ്ദാനം ചെയ്യുന്നു. നിങ്ങൾ ചെയ്യുന്ന എല്ലാ കാര്യങ്ങളിലും കർത്താവിനെ ഓർക്കുക, അപ്പോൾ അവൻ നിങ്ങളുടെ പാതകളെ നേരെയാക്കും.

അവസാനമായി, യോഹന്നാൻ 14:6-ൽ യേശു ഇപ്രകാരം പ്രഖ്യാപിക്കുന്നു: "ഞാൻ തന്നേ വഴിയും സത്യവും ജീവനും ആകുന്നു; ഞാൻ മുഖാന്തരമല്ലാതെ ആരും പിതാവിന്റെ അടുക്കൽ എത്തുന്നില്ല." യേശു പരിപൂർണ്ണമായ അനുസരണത്തിന്റെ പാതയിലൂടെ നടന്നു, കുരിശ് വഹിച്ചു, പിതാവിന്റെ ഹിതം നിറവേറ്റി, വിജയത്തോടെ  ഉയിർത്തെഴുന്നേറ്റു. നമ്മുടെ വ്യക്തിപരമായ ജീവിതത്തിൽ, കുടുംബങ്ങളിൽ, ജോലിയിൽ, ശുശ്രൂഷയിൽ, നാം എടുക്കുന്ന ഓരോ തീരുമാനത്തിലും അവന്റെ മാതൃക പിന്തുടരുമ്പോൾ, അവൻ നമ്മെ ജീവമാർഗ്ഗത്തിലേക്ക് നയിക്കും. ഇന്ന്, നിങ്ങളുടെ ജീവിതത്തിന്റെ എല്ലാ മേഖലകളും കർത്താവിനു സമർപ്പിക്കുക. അവനെ പൂർണ്ണഹൃദയത്തോടെ വിശ്വസിക്കുക, അവൻ നിങ്ങളുടെ പാതകളെ നയിക്കുകയും തന്റെ പരിപൂർണ്ണമായ പദ്ധതി നിവർത്തിക്കുകയും ചെയ്യും.

PRAYER:
പ്രിയ സ്വർഗ്ഗീയ പിതാവേ, എന്റെ വഴികളെല്ലാം അങ്ങേക്ക് സമർപ്പിക്കാനും പൂർണ്ണഹൃദയത്തോടെ അങ്ങിൽ ആശ്രയിക്കാനും എന്നെ സഹായിക്കണമേ. അങ്ങയുടെ വിശുദ്ധവും ജ്ഞാനപൂർണവും നീതിയുക്തവുമായ വഴികൾ എന്നെ പഠിപ്പിക്കുകയും അങ്ങയുടെ സത്യത്തിൽ അനുദിനം നടക്കാൻ എന്നെ നയിക്കുകയും ചെയ്യണമേ. എന്റെ സ്വന്തം വഴികൾ തിരഞ്ഞെടുക്കുന്നതിൽ നിന്ന് എന്നെ തടയുകയും ജീവമാർഗത്തിലേക്ക് എന്നെ നയിക്കുകയും ചെയ്യണമേ. അങ്ങയുടെ പ്രബോധനം സ്വീകരിക്കാനുള്ള താഴ്മയും അങ്ങയുടെ ശബ്ദം അനുസരിക്കാനുള്ള ജ്ഞാനവും എനിക്ക് നൽകണമേ. എന്റെ പാതകൾ നേരെയാക്കുകയും എന്റെ കൈകളുടെ പ്രവർത്തനം സ്ഥാപിക്കുകയും എന്റെ ജീവിതത്തിന്റെ എല്ലാ മേഖലകളിലും അങ്ങയുടെ പരിപൂർണ്ണ ഹിതം നിറവേറ്റുകയും ചെയ്യണമേ. അങ്ങയെ വിശ്വസ്തതയോടെ അനുഗമിക്കുമ്പോൾ അങ്ങയുടെ അനുഗ്രഹങ്ങളും സംരക്ഷണവും കൃപയും അനുഭവിക്കാൻ എന്നെ ഇടയാക്കേണമേ. യേശുവിന്റെ മഹത്തായ നാമത്തിൽ ഞാൻ പ്രാർത്ഥിക്കുന്നു, ആമേൻ.