പ്രിയരേ, ഇന്ന് കർത്താവ് തന്റെ വിജയകരമായ സ്നേഹം കൊണ്ട് നിങ്ങളെ നിറയ്ക്കാൻ ആഗ്രഹിക്കുന്നു. അവന്റെ സ്നേഹം ഒരു വലിയ പ്രവാഹം പോലെ നിങ്ങളുടെമേൽ ചൊരിയപ്പെടുന്നു. അവൻ നിങ്ങളെ വളരെയധികം സ്നേഹിക്കുന്നു. ഇന്ന്, അവന്റെ സ്നേഹം, തകർന്ന ഓരോ ഹൃദയത്തിലേക്കും നിരുത്സാഹപ്പെട്ട ഓരോ ആത്മാവിലേക്കും അവന്റെ സാന്നിധ്യത്തിനായി കൊതിക്കുന്ന ഓരോ വ്യക്തിയിലേക്കും എത്തുന്നു. എന്റെ പിതാവ് കർത്താവിനെ മുഖാമുഖം കണ്ടപ്പോൾ, യേശുവിന്റെ കണ്ണുകളിൽ നിന്ന് ഒഴുകിയെത്തിയ സ്നേഹം അദ്ദേഹത്തിന്റെ ഹൃദയത്തെ പൂർണ്ണമായും നിറച്ചു. ഏകദേശം മൂന്ന് മണിക്കൂറോളം അദ്ദേഹം ആ ദിവ്യസ്നേഹത്തിൽ മുഴുകിയിരുന്നു. അദ്ദേഹത്തിന്റെ ജീവിതത്തിൽ നിറഞ്ഞിരുന്ന ദുഃഖവും കണ്ണുനീരും അപ്രത്യക്ഷമാകുകയും ദൈവസാന്നിധ്യത്തിൽ ചിരിച്ചും ആനന്ദിച്ചും അദ്ദേഹം പറഞ്ഞറിയിക്കാനാവാത്ത സന്തോഷത്താൽ നിറയുകയും ചെയ്തു. മറ്റൊരു ദൈവികസന്ദർശനത്തിൽ, യേശു എനിക്കും ഭാര്യയ്ക്കും ഇടയിൽ നിൽക്കുകയും ഒരു വാക്ക് പോലും സംസാരിക്കാതെ ഏകദേശം ഒന്നര മണിക്കൂറോളം ഞങ്ങളെ നോക്കികൊണ്ടിരിക്കുകയും ചെയ്തു. അവന്റെ സ്നേഹനിർഭരമായ കണ്ണുകൾ ഞങ്ങളുടെമേൽ പതിഞ്ഞപ്പോൾ, ഞങ്ങൾ അവന്റെ സാന്നിധ്യത്താൽ മതിമറന്നുപോവുകയും സന്തോഷത്താൽ കണ്ണുനീർ ഒഴുക്കുകയും ചെയ്തു. ഇന്ന്, അതേ സ്നേഹം നിങ്ങളിലേക്കും ഒഴുകുന്നു. യേശു നിങ്ങളെ മറന്നിട്ടില്ല. അവൻ നിങ്ങളെ അനുകമ്പയോടെ നോക്കുകയും "എന്റെ പ്രിയ പൈതലേ" എന്ന് പറയുകയും ചെയ്യുന്നു. അവന്റെ സ്നേഹം നിങ്ങളുടെ ഹൃദയത്തെ നിറയ്ക്കുകയും നിങ്ങൾക്ക് വിജയം നൽകുകയും ചെയ്യും.

സങ്കീർത്തനം 63:3 ഇപ്രകാരം പ്രഖ്യാപിക്കുന്നു: "നിന്റെ ദയ ജീവനെക്കാൾ നല്ലതാകുന്നു; എന്റെ അധരങ്ങൾ നിന്നെ സ്തുതിക്കും." ക്രിസ്തുവിന്റെ സ്നേഹം ജീവനേക്കാൾ വലുതാണ്. എല്ലാ പരീക്ഷണങ്ങളെയും മറികടക്കാൻ അവന്റെ സ്നേഹം നമ്മെ ശക്തിപ്പെടുത്തുന്നു. കഷ്ടത, സങ്കടം, ഉപദ്രവം, പട്ടിണി, ആപത്ത്, അല്ലെങ്കിൽ മറ്റേതെങ്കിലും സാഹചര്യങ്ങൾ എന്നിവക്ക് ക്രിസ്തുവിന്റെ സ്നേഹത്തിൽ നിന്ന് നമ്മെ വേർപെടുത്താൻ കഴിയില്ലെന്ന് റോമർ 8:35-39 നമ്മെ ഓർമ്മിപ്പിക്കുന്നു. ഇന്ന് നിങ്ങൾ അഭിമുഖീകരിക്കുന്ന പോരാട്ടം എന്തുതന്നെയായാലും, യേശുവിന്റെ സ്നേഹം നിങ്ങളെ അതിലൂടെ മുന്നോട്ട് കൊണ്ടുപോകും. അവൻ നിങ്ങളെ സ്നേഹിക്കുന്നതിനാൽ, നിങ്ങൾ എല്ലാ വെല്ലുവിളികളെയും മറികടന്ന് വിജയികളായി നിലകൊള്ളും.

എന്റെ സഹോദരി ഏഞ്ചൽ അന്തരിച്ച വേദനാജനകമായ സമയവും ഞാൻ ഓർക്കുന്നു. ഞങ്ങളുടെ കുടുംബം ദുഃഖവും കണ്ണുനീരും കൊണ്ട് നിറഞ്ഞിരുന്നു. ഒരു ദിവസം രാവിലെ, ഞങ്ങൾ പ്രാർത്ഥിക്കുമ്പോൾ, യേശു പ്രത്യക്ഷപ്പെട്ട് സ്നേഹത്തോടെ പറഞ്ഞു, "എന്റെ മക്കളേ, മറ്റുള്ളവർ പറയുന്നത് നിങ്ങൾ എന്തിനാണ് വിശ്വസിക്കുന്നത്? ഏയ്ഞ്ചലിന്റെ മരണശേഷവും ഞാൻ നല്ലവനാണെന്ന് നിങ്ങൾ വിശ്വസിക്കുന്നത് തുടരുന്നു. നിങ്ങൾ എല്ലാ ദിവസവും ഒരു കുടുംബമായി എന്റെ അടുത്തേക്ക് വരുന്നു. എനിക്കെങ്ങനെയാണ് നിങ്ങളെ ഉപേക്ഷിക്കാൻ കഴിയുക? നിങ്ങൾ എനിക്ക് വിലപ്പെട്ടവരാണ്." ആശ്വാസം പകരുന്ന ആ വാക്കുകൾ ഞങ്ങളെ ശക്തിപ്പെടുത്തി. കർത്താവ് ഞങ്ങളെ കൂടുതൽ സമൃദ്ധമായി അനുഗ്രഹിക്കുമെന്ന് ഉറപ്പ് നൽകി. കഴിഞ്ഞ നാൽപത് വർഷമായി ഞങ്ങൾ അവന്റെ  വിശ്വസ്തതയ്ക്ക് സാക്ഷ്യം വഹിച്ചിട്ടുണ്ട്. അവൻ ഞങ്ങൾക്ക് വിജയത്തിന്മേൽ വിജയം നൽകുകയും ദശലക്ഷക്കണക്കിന് ആളുകളെ അനുഗ്രഹിക്കാനായി ഈ ശുശ്രൂഷയെ ഉപയോഗിക്കുകയും ചെയ്തിരിക്കുന്നു. അതേ വിശ്വസ്തനായ ദൈവം നിങ്ങൾക്കും വിജയം നൽകും.

രണ്ടാമതായി, യേശുവിന്റെ സ്നേഹം നമ്മെ പാപത്തിൽ നിന്ന് മോചിപ്പിക്കുന്നു. ദൈവസ്നേഹത്തിന്റെ ആഴത്തെക്കുറിച്ച് യോഹന്നാൻ 3:16 ഇപ്രകാരം  വെളിപ്പെടുത്തുന്നു: "തന്റെ ഏകജാതനായ പുത്രനിൽ വിശ്വസിക്കുന്ന ഏവനും നശിച്ചുപോകാതെ നിത്യജീവൻ പ്രാപിക്കേണ്ടതിന്നു ദൈവം അവനെ നല്കുവാൻ തക്കവണ്ണം ലോകത്തെ സ്നേഹിച്ചു." ഓരോ പാപിയോടുമുള്ള അവന്റെ സ്നേഹത്തിന്റെ മഹത്വം അത്ര വലുതാണ്.

എനിക്ക് പതിനാറ് വയസ്സുള്ളപ്പോൾ ഞാൻ ദൈവത്തിൽ നിന്ന് അകന്നുപോയി. എന്റെ അമ്മ എനിക്കുവേണ്ടി എല്ലാ ഞായറാഴ്ചയും ഉപവസിക്കുകയും പ്രാർത്ഥിക്കുകയും ചെയ്യാൻ തുടങ്ങി. നാൽപ്പത്തിയാറ് വർഷങ്ങൾക്ക് ശേഷവും അവർ എനിക്കുവേണ്ടി പ്രാർത്ഥിക്കുന്നത് തുടരുന്നു. അവരുടെ പ്രാർത്ഥനകൾക്ക് ഏതാനും ആഴ്ചകൾക്കുള്ളിൽ ദൈവം അവർക്ക് ഉത്തരം നൽകി. അവൻ എന്റെ ജീവിതത്തെ പൂർണ്ണമായും മാറ്റിമറിച്ചു. അവൻ എന്നെ തന്റെ പൈതലാക്കുകയും, തന്റെ ശുശ്രൂഷയിലേക്ക് വിളിക്കുകയും എന്റെ കുടുംബത്തെ അനുഗ്രഹിക്കുകയും ശുശ്രൂഷയിൽ എന്നെ ഉയർത്തുകയും ചെയ്തു. അതേ യേശു തന്നെയാണ് ഇന്ന് നിങ്ങളെയും വിളിക്കുന്നത്. നിങ്ങളുടെ പാപങ്ങൾ കാരണം അവൻ നിങ്ങളെ ഒരിക്കലും തള്ളിക്കളയുകയില്ല. അവന്റെ  വിലയേറിയ രക്തം നിങ്ങളെ എല്ലാ അനീതികളിൽ നിന്നും ശുദ്ധീകരിക്കുന്നു. അവന്റെ അടുത്തേക്ക് വരിക. അവൻ തന്റെ നിത്യസ്നേഹത്താൽ നിങ്ങളെ ആലിംഗനം ചെയ്യുകയും നിങ്ങളുടെ പാപങ്ങൾ ക്ഷമിക്കുകയും നിങ്ങളുടെ ജീവിതത്തെ രൂപാന്തരപ്പെടുത്തുകയും ചെയ്യും.

അവസാനമായി, ദൈവത്തിന്റെ സ്നേഹം ഒരിക്കലും മാറാത്തതാണ്. ആ സ്നേഹമാണ് നിങ്ങളെ എന്നെന്നേക്കുമായി ആലിംഗനം ചെയ്യുന്നത്. പർ‍വ്വതങ്ങൾ മാറിപ്പോകും, കുന്നുകൾ നീങ്ങിപ്പോകും; എങ്കിലും അവന്റെ ദയ നിങ്ങളെ വിട്ടുമാറുകയില്ല എന്ന് യെശയ്യാവു 54 നമ്മെ ഓർമ്മിപ്പിക്കുന്നു. ഒരുപക്ഷേ, നിങ്ങൾക്ക് നിങ്ങളുടെ മാതാപിതാക്കളെയും ജോലിയെയും സാമ്പത്തികസ്ഥിതിയെയും ബന്ധങ്ങളെയും നഷ്ടപ്പെട്ടിരിക്കാം. നിങ്ങൾ സ്നേഹിക്കുകയും സഹായിക്കുകയും അവർക്കുവേണ്ടി ത്യാഗം ചെയ്യുകയും ചെയ്തവർ പോലും നിങ്ങൾക്കെതിരെ തിരിഞ്ഞിരിക്കാം. എങ്കിലും, യേശു ഒരിക്കലും നിങ്ങളെ കൈവിടുകയില്ല. അവന്റെ മാറ്റമില്ലാത്ത സ്നേഹം നിങ്ങളെ ആശ്വസിപ്പിക്കുകയും ശക്തിപ്പെടുത്തുകയും മാനിക്കുകയും നിങ്ങൾക്ക് നഷ്ടപ്പെട്ടതെല്ലാം പുനഃസ്ഥാപിക്കുകയും ചെയ്യും. അവൻ നിങ്ങളുടെ ഹൃദയത്തെ തന്റെ സ്നേഹം കൊണ്ട് നിറയ്ക്കുകയും മറ്റുള്ളവരെ സ്നേഹിക്കാനും ക്ഷമിക്കാനും നിങ്ങളെ പ്രാപ്തരാക്കുകയും ചെയ്യും. ഇന്ന്, ക്രിസ്തുവിന്റെ അചഞ്ചലമായ സ്നേഹം സ്വീകരിക്കുക. എല്ലാ നഷ്ടങ്ങളും പുനഃസ്ഥാപിക്കപ്പെടട്ടെ, എല്ലാ ദുഃഖങ്ങളും ആശ്വസിപ്പിക്കപ്പെടട്ടെ, എല്ലാ ഭാരങ്ങളും നീക്കപ്പെടട്ടെ, നിങ്ങളുടെ ജീവിതത്തിന്റെ എല്ലാ മേഖലകളും അവന്റെ സമാധാനം, വിശുദ്ധി, സമൃദ്ധി, വിജയം എന്നിവയാൽ നിറയട്ടെ. അവന്റെ സ്നേഹം തീർച്ചയായും ജീവനേക്കാൾ ശ്രേഷ്ഠമാണ്.

Prayer:
പ്രിയ സ്വർഗ്ഗീയ പിതാവേ, ശാശ്വതവും മാറ്റമില്ലാത്തതുമായ സ്നേഹത്തോടെ എന്നെ സ്നേഹിച്ചതിന് അങ്ങേക്ക് നന്ദി. അങ്ങയുടെ സ്നേഹം എന്റെ ഹൃദയത്തിലെ എല്ലാ ശൂന്യതകളെയും നിറയ്ക്കുകയും എല്ലാ ഭയവും സങ്കടവും നിരുത്സാഹവും ഇല്ലാതാക്കുകയും ചെയ്യട്ടെ. അങ്ങയുടെ സ്നേഹത്തിൽ നിന്ന് എന്നെ വേർപെടുത്താൻ ഒന്നിനും കഴിയില്ലെന്ന ആത്മവിശ്വാസം നിലനിർത്താൻ എന്നെ സഹായിക്കണമേ. എന്റെ പാപങ്ങൾ ക്ഷമിക്കുകയും യേശുവിന്റെ വിലയേറിയ രക്തത്താൽ എന്നെ ശുദ്ധീകരിക്കുകയും അങ്ങയുടെ ഹിതമനുസരിച്ച് എന്റെ  ജീവിതം രൂപാന്തരപ്പെടുത്തുകയും ചെയ്യണമേ. എല്ലാ നഷ്ടങ്ങളും പുനഃസ്ഥാപിക്കണമേ. ദുഃഖിക്കുന്ന ഓരോ ഹൃദയത്തെയും ആശ്വസിപ്പിക്കണമേ. അങ്ങയുടെ സമാധാനവും കൃപയും കൊണ്ട് എന്റെ കുടുംബത്തെ ശക്തിപ്പെടുത്തേണമേ. അങ്ങയുടെ സ്നേഹം എല്ലാ പരീക്ഷണങ്ങളിലും എനിക്ക് വിജയം നൽകുകയും മറ്റുള്ളവർക്ക് അങ്ങയുടെ നന്മയുടെ സാക്ഷിയാകാൻ എന്നെ സഹായിക്കുകയും ചെയ്യട്ടെ. യേശുവിന്റെ മഹത്തായ നാമത്തിൽ ഞാൻ പ്രാർത്ഥിക്കുന്നു. ആമേൻ.