എന്റെ പ്രിയ സുഹൃത്തുക്കളേ, കർത്താവ് നമ്മുടെ ഇടയിൽ ഉണ്ട്. തന്റെ ശക്തമായ സാന്നിധ്യം കൊണ്ട് നമ്മെ നിറയ്ക്കാനും തന്റെ ജീവവചനങ്ങൾ നമ്മോട് സംസാരിക്കാനും അവൻ തയ്യാറാണ്. ഇന്ന് നാം അവനിൽ നിന്ന്, 1 തെസ്സലൊനീക്യർ 5:24 ൽ നിന്ന് കേൾക്കാൻ പോകുന്നു. അത് ഇപ്രകാരം പറയുന്നു, "നിങ്ങളെ വിളിക്കുന്നവൻ വിശ്വസ്തൻ ആകുന്നു; അവൻ അതു നിവർത്തിക്കും". ആമേൻ! കർത്താവ് നമ്മെ വിളിച്ചിരിക്കുന്നു, അവൻ നിങ്ങളെ എന്തിനുവേണ്ടി വിളിച്ചിട്ടുണ്ടോ അത് നിങ്ങൾക്കുവേണ്ടി നിവർത്തിക്കും. ഇന്ന്, നിങ്ങളുടെ ജോലിയിൽ നിങ്ങൾ ബുദ്ധിമുട്ടുന്നുണ്ടാകാം. നിങ്ങൾ ചോദിച്ചേക്കാം, "ഈ വലിയ ഉത്തരവാദിത്തം ഞാൻ എങ്ങനെ നിറവേറ്റാൻ പോകുന്നു? ഈ വെല്ലുവിളികളെ ഞാൻ എങ്ങനെ മറികടക്കും? എന്റെ ആവശ്യങ്ങൾ എവിടെ നിറവേറ്റപ്പെടും? കർത്താവേ, എനിക്ക് ശക്തി നൽകേണമേ." എന്റെ സുഹൃത്തുക്കളേ, വിഷമിക്കേണ്ട. നിങ്ങളെ വിളിച്ച കർത്താവ് വിശ്വസ്തനാണ്, അവൻ തീർച്ചയായും നിങ്ങളുടെ ജീവിതത്തിലൂടെ തന്റെ ഉദ്ദേശ്യം നിവർത്തിക്കും.

ഈ വിളി നിറവേറ്റാൻ കർത്താവ് മൂന്ന് കാര്യങ്ങൾ ചെയ്യും. ഒന്നാമതായി, അത് നിറവേറ്റാനുള്ള ശക്തി അവൻ നിങ്ങൾക്ക് നൽകും. അവൻ നിങ്ങളുടെ കഴിവിനെ ശക്തിപ്പെടുത്തുകയും തന്റെ ജ്ഞാനവും ആത്മീയ ദാനങ്ങളും നൽകുകയും ചെയ്യും. ദൈവത്തിന്റെ അഭിഷേകം പത്രൊസിനെ നിറയ്ക്കുകയും അവനെ പൂർണ്ണമായും പരിവർത്തനം ചെയ്യുകയും ചെയ്തതുപോലെ, അതേ ശക്തിക്ക് നിങ്ങളിലൂടെയും പ്രവർത്തിക്കാൻ കഴിയും. പത്രൊസിന്റെ നിഴൽ വീഥികളിലെ ജനത്തിന്റെമേൽ വീണപ്പോൾപ്പോലും അവർ സൌഖ്യം പ്രാപിച്ചുവെന്ന് വേദപുസ്തകം പറയുന്നു. ദൈവത്തിന്റെ ശക്തി നിങ്ങളിലൂടെയും ഒഴുകും. തന്റെ അമാനുഷിക കൃപയിലൂടെ അസാധ്യമെന്ന് തോന്നുന്ന കാര്യങ്ങൾ ചെയ്യാൻ അവൻ നിങ്ങളെ പ്രാപ്തരാക്കും.

രണ്ടാമതായി, നിങ്ങളുടെ വിളി നിറവേറ്റുന്നതിന്, നിങ്ങളുടെ എല്ലാ അതിർത്തികൾക്കകത്തും, പ്രത്യേകിച്ച് ശത്രുക്കൾ നിങ്ങൾക്കെതിരെ ഉയരുമ്പോൾ ദൈവം നിങ്ങൾക്ക് വലിയ സമാധാനം നൽകും. എലീശാ ഉണർന്നപ്പോൾ ശക്തരായ അരാമ്യസൈന്യം നഗരത്തെ വളഞ്ഞിരിക്കുന്നത് കണ്ടു. എങ്കിലും അവൻ ഭയപ്പെട്ടില്ല. പകരം, കർത്താവിന്റെ സ്വർഗ്ഗീയ സൈന്യം അവരെ വളയുകയും സംരക്ഷിക്കുകയും ചെയ്യുന്നുവെന്ന് അറിഞ്ഞതിനാൽ അവൻ സമാധാനത്തിൽ തുടർന്നു. അതുപോലെ, ദൈവം നിങ്ങളുടെ ഹൃദയത്തെയും സമാധാനം കൊണ്ട് നിറയ്ക്കും. എതിർപ്പ് എത്ര വലുതായി തോന്നിയാലും, അവന്റെ സാന്നിധ്യം നിങ്ങളുടെ ഉള്ളിലെ എല്ലാ ഭയത്തെയും ഉത്കണ്ഠയെയും ശാന്തമാക്കും.

അവസാനമായി, നിങ്ങളുടെ വിളിക്ക് ആവശ്യമായ എല്ലാ കരുതലുകളും കർത്താവ് നൽകും. അവൻ മരുഭൂമിയിൽവെച്ച് യിസ്രായേല്യർക്ക് വെള്ളവും ഭക്ഷണവും നൽകുകയും അവരുടെ യാത്രയിലുടനീളം അവരുടെ വസ്ത്രങ്ങൾ സംരക്ഷിക്കുകയും ചെയ്തതുപോലെ, അവൻ നിങ്ങൾക്കും  അത്ഭുതകരമായി നൽകുന്നത് തുടരും. ദാതാവ് തന്നെ നിങ്ങളോടൊപ്പമുണ്ട്. നിങ്ങൾ യാചിക്കുന്നതിനു മുമ്പുതന്നെ എല്ലാ ആവശ്യങ്ങളും അവൻ അറിയുന്നു. അവൻ തന്റെ ധനത്തിനൊത്തവണ്ണം മഹത്വത്തോടെ നിങ്ങളുടെ എല്ലാ ആവശ്യങ്ങളും നിറവേറ്റിത്തരും.

ഇന്ന് നമുക്ക് ദൈവത്തിൽ നിന്ന് ഈ മൂന്ന് അനുഗ്രഹങ്ങൾ സ്വീകരിക്കാം - അവന്റെ ശക്തി, അവന്റെ സമാധാനം, അവന്റെ കരുതൽ. നിങ്ങളെ വിളിച്ച കർത്താവ് നിങ്ങളുടെ ജീവിതത്തിൽ തന്റെ പ്രവൃത്തി പൂർത്തിയാക്കാൻ വിശ്വസ്തനായിരിക്കും. ഇപ്പോഴും അത്ഭുതങ്ങൾ സംഭവിക്കുന്നുണ്ട്. നിങ്ങൾ ആവശ്യപ്പെടുന്നത് സ്വീകരിക്കുകയും നിങ്ങളുടെ വിളിയെ നിറവേറ്റുന്നവനെ സ്തുതിക്കുകയും ചെയ്യുക.

PRAYER:
പ്രിയ കർത്താവേ, അങ്ങയുടെ പരിപൂർണ്ണമായ പദ്ധതിക്കനുസരിച്ച് എന്നെ വിളിച്ചതിന് അങ്ങേയ്ക്ക് നന്ദി. എന്റെ വിളിയും ഭാവിയും ഞാൻ അങ്ങയുടെ കൈകളിലേക്ക് സമർപ്പിക്കുന്നു. അങ്ങയുടെ അമാനുഷിക ശക്തിയാൽ എന്നെ നിറയ്ക്കുകയും അങ്ങയുടെ ആത്മാവിന്റെ ശക്തിയിൽ നടക്കാൻ എന്നെ സഹായിക്കുകയും ചെയ്യണമേ. അങ്ങ് എന്നെ ഏൽപ്പിച്ചതെല്ലാം നിറവേറ്റാൻ എനിക്ക് ജ്ഞാനവും കഴിവും കൃപയും നൽകേണമേ. അങ്ങയുടെ സമാധാനം എന്റെ ഹൃദയത്തിൽ ഭരണം നടത്തുകയും എല്ലാ ഭയവും ഉത്കണ്ഠയും നിരുത്സാഹവും നീക്കിക്കളയുകയും ചെയ്യണമേ. വെല്ലുവിളികൾ ഉണ്ടാകുമ്പോൾ അങ്ങിൽ ആശ്രയിക്കാനും അങ്ങ് എല്ലായ്പ്പോഴും എന്നോടൊപ്പമുണ്ടെന്ന് ഓർമ്മിക്കാനും എന്നെ സഹായിക്കണമേ. എന്റെ എല്ലാ ആവശ്യങ്ങളും സമൃദ്ധമായി നൽകുകയും ആർക്കും അടയ്ക്കാൻ കഴിയാത്ത വാതിലുകൾ തുറക്കുകയും ചെയ്യണമേ. അത്ഭുതങ്ങൾ എന്റെ ജീവിതത്തെ അനുഗമിക്കുകയും അങ്ങയുടെ നാമം എന്നിലൂടെ മഹത്വപ്പെടുകയും ചെയ്യട്ടെ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.