പ്രിയ സുഹൃത്തേ, ഇന്നത്തെ വാഗ്‌ദത്തം യെഹെസ്കേൽ 36:11 ൽ നിന്നാണ്: “നിങ്ങളുടെ ആദികാലത്തുണ്ടായിരുന്നതിനെക്കാൾ അധികം നന്മ ഞാൻ നിങ്ങൾക്കു ചെയ്യും." കർത്താവിന്റെ ആഗ്രഹം നിങ്ങളെ രക്ഷിക്കുക മാത്രമല്ല, നിങ്ങളുടെ ജീവിതത്തിന്റെ എല്ലാ മേഖലകളിലും നിങ്ങളെ അനുഗ്രഹിക്കുകയും ചെയ്യുക എന്നതാണ്. 3 യോഹന്നാൻ 2-ൽ അവൻ ഇപ്രകാരം പറയുന്നു, " പ്രിയനേ, നിന്റെ ആത്മാവു ശുഭമായിരിക്കുന്നതുപോലെ നീ സകലത്തിലും ശുഭമായും സുഖമായും ഇരിക്കേണം എന്നു ഞാൻ പ്രാർത്ഥിക്കുന്നു." ദൈവം സമൃദ്ധിയുടെ ദൈവമാണ്. നിങ്ങളുടെ ആത്മാവ് വിശുദ്ധിയിൽ അഭിവൃദ്ധി പ്രാപിക്കാനും നിങ്ങളുടെ ശരീരം ആരോഗ്യത്തിൽ അഭിവൃദ്ധി പ്രാപിക്കാനും നിങ്ങളുടെ ജീവിതം സമൃദ്ധമായി അഭിവൃദ്ധി പ്രാപിക്കാനും അവൻ ആഗ്രഹിക്കുന്നു. അതിനാൽ നിങ്ങളുടെ ഹൃദയം അസ്വസ്ഥമാകരുത്. നിങ്ങൾ പാപത്തിൽ നിന്ന് വേർപെട്ട് സത്യസന്ധതയോടെ നടക്കുമ്പോൾ നിങ്ങളുടെ ജീവിതം അവന്റെ നന്മയാൽ നിറഞ്ഞു കവിയും. സങ്കീർത്തനം 1:1-3 പറയുന്നു: "ദുഷ്ടന്മാരുടെ ആലോചനപ്രകാരം നടക്കാതെ യഹോവയുടെ ന്യായപ്രമാണത്തിൽ സന്തോഷിക്കുന്നവൻ ഭാഗ്യവാൻ. അവൻ ചെയ്യുന്നതൊക്കെയും സാധിക്കും."

ഉല്പത്തി 39-ൽ യോസേഫിന്റെ ജീവിതം നോക്കുക. പ്രലോഭനങ്ങളെ അവൻ ചെറുക്കുകയും ദൈവത്തോട് വിശ്വസ്തത പുലർത്തുകയും ചെയ്തു. അവന്റെ വിശുദ്ധി നിമിത്തം, കർത്താവ് അവനെ മൂന്ന് വിധത്തിൽ അഭിവൃദ്ധിപ്പെടുത്തി: ഒന്നാമതായി, ഉല്പത്തി 39:2 പറയുന്നു, "യഹോവ യോസേഫിനോടുകൂടെ ഉണ്ടായിരുന്നതുകൊണ്ട് അവൻ കൃതാർഥനായി." രണ്ടാമതായി, 4-‍ാ‍ം വാക്യത്തിൽ, യോസേഫിന് തന്റെ  യജമാനൻറെ ദൃഷ്ടിയിൽ കൃപ ലഭിക്കുകയും അവൻ ആഗ്രഹിച്ചതെല്ലാം ലഭിക്കുകയും ചെയ്തു. മൂന്നാമതായി, 5-ാം വാക്യം പറയുന്നത് ദൈവം തന്റെ യജമാനന്റെ  ഭവനത്തെപ്പോലും യോസേഫിന്റെ പേരിൽ അനുഗ്രഹിച്ചു എന്നാണ്. അതുപോലെ, നിങ്ങൾ ദൈവത്തെ ബഹുമാനിക്കുമ്പോൾ നിങ്ങളുടെ പഠനവും തൊഴിലും കുടുംബവും അനുഗ്രഹിക്കപ്പെടും. നിങ്ങളുടെ സ്ഥാനക്കയറ്റം ശരിയായ സമയത്ത് വരും. നിങ്ങളുടെ കുടുംബത്തിന് സമാധാനം അനുഭവപ്പെടും. ദൈവത്തോടൊപ്പമുള്ള നിങ്ങളുടെ വിശ്വസ്തമായ നടത്തം നിമിത്തം നിങ്ങളുടെ കമ്പനിയും ശുശ്രൂഷയും അഭിവൃദ്ധി പ്രാപിക്കും. ഇത്, വിശുദ്ധിയിൽ നിന്നും ജ്ഞാനത്തിൽ നിന്നും ദൈവകൃപയിൽ നിന്നും ഒഴുകുന്ന സമൃദ്ധിയാണ്.

ഈ അനുഗ്രഹത്തിൽ നമുക്ക് എങ്ങനെ തുടരാനാകും? ഉത്തരം ലളിതമാണ്: ദൈവവചനത്തിൽ സന്തോഷിക്കുകയും അനുദിനം അതിനെ ധ്യാനിക്കുകയും ചെയ്യുക (സങ്കീർത്തനം 1:2). അവന്റെ വചനം നിങ്ങളെ വിശുദ്ധരാക്കുകയും വിജയിക്കാൻ നിങ്ങൾക്ക് ജ്ഞാനം നൽകുകയും ചെയ്യും. കൂടാതെ, നിങ്ങളുടെ ദശാംശങ്ങളിലൂടെയും വഴിപാടുകളിലൂടെയും ഉദാരമായ ദാനത്തിലൂടെയും ദൈവരാജ്യത്തിലേക്ക് വിതയ്ക്കുക. ഇത് നിങ്ങൾക്ക് വർദ്ധനവ് കൊണ്ടുവരും. ഉല്പത്തി 26:12-13 പറയുന്നത് യിസ്ഹാക്ക് വിതച്ചു, ദൈവം അവനെ നൂറുമടങ്ങ് അനുഗ്രഹിച്ചു എന്നാണ്. അവസാനമായി, എല്ലാ പ്രവൃത്തികളും കർത്താവിൽ സമർപ്പിക്കുക (സദൃശവാക്യങ്ങൾ 16:3). ഭാരങ്ങൾ നിങ്ങളുടെ തലയിൽ വഹിക്കരുത്, മറിച്ച് അവന്റെ സ്നേഹത്തിൽ വിശ്വസിക്കുക. അനുസരണത്തിലും വിശ്വാസത്തിലും ഔദാര്യത്തിലും നടക്കുമ്പോൾ നിങ്ങൾ മുമ്പത്തേതിനേക്കാൾ കൂടുതൽ അഭിവൃദ്ധി പ്രാപിക്കും.

PRAYER:
സ്നേഹവാനായ പിതാവേ, എന്നെ അഭിവൃദ്ധിപ്പെടുത്തുമെന്ന അങ്ങയുടെ വാഗ്‌ദത്തത്തിന് ഞാൻ അങ്ങേയ്ക്ക് നന്ദി പറയുന്നു. എന്റെ ആത്മാവിനെ വിശുദ്ധിയിലും സമാധാനത്തിലും അഭിവൃദ്ധിപ്പെടുത്തണമേ. എന്റെ ശരീരം ശക്തിയോടും നല്ല ആരോഗ്യത്തോടും കൂടി അഭിവൃദ്ധിപ്പെടുത്തണമേ. എന്റെ കുടുംബത്തെ ഐക്യത്തോടും സന്തോഷത്തോടും കൂടി അഭിവൃദ്ധിപ്പെടുത്തണമേ. എന്റെ പഠനവും, തൊഴിലും, ശുശ്രൂഷയും അഭിവൃദ്ധിപ്പെടുത്തണമേ. എന്റെ കൈകളുടെ പ്രവൃത്തി തക്കസമയത്ത് ഫലം കായ്ക്കട്ടെ. എല്ലാ ദിവസവും അങ്ങയുടെ വചനത്തിലൂടെ എനിക്ക് ജ്ഞാനം നൽകേണമേ. അങ്ങയുടെ രാജ്യത്തിൽ വിശ്വസ്തതയോടെ വിതയ്ക്കാൻ എന്നെ സഹായിക്കണമേ. എന്റെ എല്ലാ പദ്ധതികളും ഭാരങ്ങളും ഞാൻ അങ്ങയുടെ കൈകളിൽ സമർപ്പിക്കുന്നു. യേശുവിന്റെ നാമത്തിൽ, ആമേൻ.