എന്റെ വിലയേറിയ സുഹൃത്തേ, ഇന്ന് ദൈവം തന്റെ ജ്ഞാനം കൊണ്ട് നിങ്ങളെ അനുഗ്രഹിക്കാൻ ആഗ്രഹിക്കുന്നു. മനുഷ്യന്റെ ജ്ഞാനവും ദൈവത്തിന്റെ ജ്ഞാനവും തമ്മിൽ വ്യത്യാസമുണ്ട്. മനുഷ്യന്റെ ജ്ഞാനം  ഇപ്പോഴത്തെ കാര്യങ്ങൾക്കുവേണ്ടിയാണ് പ്രവർത്തിക്കുന്നത്, എന്നാൽ ദൈവത്തിന്റെ ജ്ഞാനം വർത്തമാനകാലത്തിനും ഭാവിക്കും വേണ്ടിയാണ് പ്രവർത്തിക്കുന്നത്. സദൃശവാക്യങ്ങൾ 8:17 പറയുന്നു, "എന്നെ സ്നേഹിക്കുന്നവരെ ഞാൻ സ്നേഹിക്കുന്നു; എന്നെ ജാഗ്രതയോടെ അന്വേഷിക്കുന്നവർ എന്നെ കണ്ടെത്തും." നിങ്ങൾ ജ്ഞാനത്തെ സ്നേഹിക്കണം. നിങ്ങൾ ജ്ഞാനത്തെ അന്വേഷിക്കണം. അപ്പോൾ നിങ്ങൾക്ക് ദൈവത്തിന്റെ ജ്ഞാനം ലഭിക്കും. യേശു ദൈവത്തിന്റെ ജ്ഞാനമാണ്. നിങ്ങൾ അവനെ സ്നേഹിച്ചാൽ, നിങ്ങൾ അവനെ അന്വേഷിച്ചാൽ, നിങ്ങൾ അവനെ കണ്ടെത്തുകയും ജ്ഞാനം കണ്ടെത്തുകയും ചെയ്യും. നിങ്ങൾക്ക് ഇപ്പോഴും ഭാവിയിലും ജീവിക്കാൻ കഴിയും, നിങ്ങളുടെ ജീവിതം സുരക്ഷിതമായിരിക്കും. ദൈവത്തിന്റെ ജ്ഞാനമായ യേശു നിങ്ങളിലേക്ക് വരുമ്പോൾ, ഒന്നാമതായി, നിങ്ങൾക്ക് ഒരു നല്ല ജീവിതം ലഭിക്കും. യാക്കോബ് 3:13 പറയുന്നത് ജ്ഞാനം നിങ്ങളെ ജ്ഞാനികളാക്കുകയും നല്ല ജീവിതം അനുഭവിക്കാൻ സഹായിക്കുകയും ചെയ്യുന്നു.

എല്ലാവരും ഒരു നല്ല ജീവിതം ആഗ്രഹിക്കുന്നു, യേശുവിലൂടെ, ദൈവം നൽകിയ ജ്ഞാനത്തിലൂടെ നിങ്ങൾക്ക് ഒരു നല്ല ജീവിതം നേടാനാകും. രണ്ടാമതായി, ജ്ഞാനം സംരക്ഷണം നൽകുന്നു. സദൃശവാക്യങ്ങൾ 4:6–7 പറയുന്നത്, "ജ്ഞാനത്തെ  ഉപേക്ഷിക്കരുതു; അതു നിന്നെ കാക്കും; അതിൽ പ്രിയം വെക്കുക; അതു നിന്നെ സൂക്ഷിക്കും." ദൈവത്തിന്റെ ജ്ഞാനം നിങ്ങൾക്കുണ്ടെങ്കിൽ, ഏതൊരു മനുഷ്യന്റെയും നീചമായ ചിന്തയെയോ പ്രവൃത്തിയെയോ, പിശാചിന്റെ നീചമായ ആക്രമണങ്ങളെയോ പോലും നിങ്ങൾക്ക് മറികടക്കാൻ കഴിയും. 1 കൊരിന്ത്യർ 10:13 വാഗ്ദാനം ചെയ്യുന്നതുപോലെ, നിങ്ങളുടെ എല്ലാ കഷ്ടങ്ങളിലും  രക്ഷപ്പെടാനുള്ള ഒരു വഴി ദൈവം ഒരുക്കിത്തരും; ആ രക്ഷപ്പെടാനുള്ള വഴി മനസ്സിലാക്കുന്നതാണ് ദൈവത്തിന്റെ ജ്ഞാനം.

മൂന്നാമതായി, നിങ്ങൾക്ക് ജ്ഞാനം ഉണ്ടാകുമ്പോൾ നിങ്ങൾക്ക് ദൈവത്തിന്റെ പ്രസാദം ലഭിക്കും. സഭാപ്രസംഗി 2:26 പറയുന്നു, "തനിക്കു പ്രസാദമുള്ള മനുഷ്യന്നു അവൻ ജ്ഞാനം  കൊടുക്കുന്നു." ദൈവത്തിന്റെ ജ്ഞാനം നിങ്ങളിലേക്ക്  വരുമ്പോൾ നിങ്ങൾക്ക് ദൈവത്തെ പ്രസാദിപ്പിക്കാൻ കഴിയും, ദൈവത്തെ പ്രസാദിപ്പിക്കുമ്പോൾ നിങ്ങൾക്ക് ജ്ഞാനവും അറിവും സന്തോഷവും ലഭിക്കും. നാലാമതായി, ജ്ഞാനം നിങ്ങളുടെ ജീവിതത്തിലേക്ക് വിശുദ്ധിയെ കൊണ്ടുവരുന്നു. യാക്കോബ് 3:17 പറയുന്നു, "ഉയരത്തിൽനിന്നുള്ള ജ്ഞാനമോ ഒന്നാമതു നിർമ്മലമാകുന്നു." നാമെല്ലാവരും ശുദ്ധരും നീതിമാന്മാരും പരിപൂർണ്ണ വ്യക്തികൾ എന്ന് വിളിക്കപ്പെടുന്നവരുമായിരിക്കാൻ ആഗ്രഹിക്കുന്നു. "നിങ്ങൾ ഒരു തികഞ്ഞ പുരുഷനാണ്, നിങ്ങൾ ഒരു തികഞ്ഞ സ്ത്രീയാണ്" എന്ന് പറയാൻ നമ്മുടെ സ്വന്തം ആത്മാവ് കൊതിക്കുന്നു. ഇതിനായി ദൈവത്തിന്റെ ജ്ഞാനം ആവശ്യമാണ്. 1 കൊരിന്ത്യർ 1:30 പറയുന്നു, നിങ്ങൾ  ക്രിസ്തുയേശുവിൽ ആയിരിക്കുമ്പോൾ നിങ്ങൾക്ക് ദൈവത്തിന്റെ ജ്ഞാനം ലഭിക്കുന്നു. അവൻ നിങ്ങളുടെ നീതിയും ശുദ്ധീകരണവും വീണ്ടെടുപ്പുമായിത്തീരുന്നു. യേശുവിലൂടെ ജ്ഞാനം നിങ്ങളെ നിർമ്മലമായി നിലനിർത്തുന്നു. അഞ്ചാമതായി, ജ്ഞാനം നിങ്ങളെ ശാന്തവും സമാധാനപരവുമാക്കുന്നു. സദൃശവാക്യങ്ങൾ 29:11 പറയുന്നത്, മൂഢൻ തന്റെ കോപത്തെ മുഴുവനും വെളിപ്പെടുത്തുന്നു; ജ്ഞാനിയോ അതിനെ അടക്കി ശമിപ്പിക്കുന്നു എന്നാണ്. എല്ലാവരും സമാധാനവും ശാന്തതയും ആഗ്രഹിക്കുന്നു, ഇത് വലിയ ബഹുമാനം നൽകുന്നു.

ആറാമതായി, ജ്ഞാനം ഭവനത്തെ പണിയുന്നു. സദൃശവാക്യങ്ങൾ 24:3 പറയുന്നു, ജ്ഞാനംകൊണ്ടു ഭവനം പണിയുന്നു. ദൈവം നിങ്ങൾക്ക് നൽകുന്ന ജ്ഞാനത്തിലൂടെ നിങ്ങളുടെ വീട് നിർമ്മിക്കപ്പെടും. ഒടുവിൽ, ജ്ഞാനം സമ്പത്തിനെ കൊണ്ടുവരുന്നു. 1 രാജാക്കന്മാർ 10:23 പറയുന്നു, ശലോമോൻ ധനംകൊണ്ടും ജ്ഞാനംകൊണ്ടും മികെച്ചവനായിരുന്നു. തന്റെ ജ്ഞാനത്തിലൂടെ സമ്പത്ത് നേടാനുള്ള ശക്തി ദൈവം നിങ്ങൾക്ക് നൽകുന്നു. ദൈവത്തിന്റെ ജ്ഞാനം ഒരു വ്യക്തിയിൽ ഈ അനുഗ്രഹങ്ങളോടുകൂടെ വരുമ്പോൾ, 1 രാജാക്കന്മാർ 10:24 ൽ ശലോമോന്റെ കാര്യത്തിൽ കണ്ടതുപോലെ, ജ്ഞാനത്തോടെ നിറഞ്ഞ ആ മനുഷ്യനെ കാണാൻ ലോകമെമ്പാടുമുള്ളവർ വരുന്നു. അത് നിങ്ങൾക്കും സംഭവിക്കും. അവൻ നിങ്ങൾക്ക് നൽകുന്ന ജ്ഞാനത്തിലൂടെ നിങ്ങളെ മഹാന്മാരാക്കാൻ ദൈവം ആഗ്രഹിക്കുന്നു. ജ്ഞാനത്തെ സ്നേഹിക്കുക. ജ്ഞാനത്തെ അന്വേഷിക്കുക. ആ ജ്ഞാനം യേശുക്രിസ്തുവാകുന്നു.
 
PRAYER:
സ്നേഹവാനായ കർത്താവേ, ഇന്ന് ഞാൻ മറ്റെല്ലാറ്റിനുമുപരിയായി അങ്ങയുടെ ജ്ഞാനം അന്വേഷിക്കുന്നു. യേശുവിൽ നിന്നുള്ള ജ്ഞാനം കൊണ്ട് എന്റെ ഹൃദയത്തെ നിറയ്ക്കണമേ. ഇപ്പോഴത്തെയും ഭാവിയിലെയും എന്റെ തീരുമാനങ്ങളെ അങ്ങ് നയിക്കണമേ. എല്ലാ തെറ്റായ പാതകളിൽ നിന്നും അങ്ങയുടെ ജ്ഞാനം എന്നെ സംരക്ഷിക്കട്ടെ. എന്റെ ജീവിതം ശുദ്ധവും സമാധാനപൂർണവും അങ്ങേക്ക് പ്രസാദകരവുമാക്കണമ. എന്റെ ഭവനം പണിയുകയും, എന്റെ കൈകളുടെ പ്രവൃത്തിയെ സ്ഥാപിക്കുകയും ചെയ്യണമേ. അങ്ങയുടെ വഴികളിൽ നടക്കാൻ എനിക്ക് വിവേകം നൽകണമേ. ദൈവിക അനുഗ്രഹങ്ങളിലേക്കും കൃപയിലേക്കും സ്ഥിരതയിലേക്കും എന്നെ നയിക്കണമേ. അങ്ങയുടെ ദിവ്യജ്ഞാനത്താൽ എന്റെ ഭാവി സുരക്ഷിതമാക്കണമേ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.