എന്റെ പ്രിയരേ, നിങ്ങൾക്ക് സമ്പത്തും മഹത്വവും നൽകാൻ കർത്താവിന് മനസ്സുണ്ട്. നിങ്ങളെ അനുഗ്രഹിക്കുന്നതിൽ അവൻ സന്തുഷ്ടനാണ്. അതിനാൽ, ഭയപ്പെടരുത്. നിങ്ങൾ നിങ്ങളുടെ ദിവസങ്ങൾ ദാരിദ്ര്യത്തിൽ ചെലവഴിക്കേണ്ടിവരുമോ എന്ന് കരുതി ഉത്കണ്ഠപ്പെടരുത്. നിങ്ങൾക്ക് ഇപ്പോൾ ഉള്ളതിനേക്കാൾ ആയിരം മടങ്ങ് വർദ്ധിപ്പിക്കാൻ കർത്താവിന് കഴിയും. അവൻ ഇത് യിസ്രായേൽ ജനതയോട് പറഞ്ഞു, ഇന്നും അവൻ അത് നിറവേറ്റിയിരിക്കുന്നു. അവർ അത്യധികം ഉയർത്തപ്പെടുകയും അസംഖ്യമായി വർദ്ധിക്കുകയും ചെയ്തു. അതുപോലെ, കർത്താവ് നിങ്ങളെയും ഉയർത്തുകയും മഹത്വപ്പെടുത്തുകയും ചെയ്യും. അവൻ നിങ്ങളുടെ മക്കളെയും അനുഗ്രഹിക്കുകയും ഉയർത്തുകയും ചെയ്യും. 1 രാജാക്കന്മാർ 3:13-ൽ, കർത്താവ് ശലോമോനോട് ഇപ്രകാരം അരുളിച്ചെയ്തു: "ഞാൻ നിനക്ക് ജ്ഞാനം മാത്രമല്ല, നീ അപേക്ഷിക്കാത്തതായ സമ്പത്തും മഹത്വവും കൂടെ ഞാൻ നിനക്കു തന്നിരിക്കുന്നു." ഇന്നും കർത്താവ് നിങ്ങൾക്ക് ഈ അനുഗ്രഹം നൽകും.

ഈ സമ്പത്തും മഹത്വവും എങ്ങനെ വരുന്നു? സദൃശവാക്യങ്ങൾ 10:22-ൽ ഇങ്ങനെ പറയുന്നു:  "യഹോവയുടെ അനുഗ്രഹത്താൽ സമ്പത്തുണ്ടാകുന്നു; അദ്ധ്വാനത്താൽ അതിനോടു ഒന്നും കൂടുന്നില്ല." ഉല്പത്തി 26:12-13-ൽ നാം വായിക്കുന്നതുപോലെ, കർത്താവ് നിങ്ങളെ അനുഗ്രഹിക്കുമ്പോൾ നിങ്ങൾ നൂറിരട്ടി വിളവ് അനുഭവിക്കും. അവനല്ലോ നിനക്കു സമ്പത്തുണ്ടാക്കുവാൻ ശക്തിതരുന്നതു എന്ന് ആവർത്തനം 8:18 പറയുന്നു. ഇന്ന്, ആ അനുഗ്രഹം നിങ്ങൾക്ക് ലഭിക്കും. ദൈവം ശലോമോന് ജ്ഞാനം നൽകുകയും അവനെ വളരെയധികം അഭിവൃദ്ധിപ്പെടാൻ സഹായിക്കുകയും ചെയ്തു. അതുപോലെ, നിങ്ങൾക്കും ജ്ഞാനവും ശക്തിയും നൽകാനും ശരിയായ വാതിലുകൾ തുറന്നുതരാനും അഭിവൃദ്ധി പ്രാപിക്കത്തക്കവിധം ശരിയായ വഴിയിൽ നിങ്ങളെ നയിക്കാനും അവന് കഴിയും. അതോടൊപ്പം, ബഹുമാനവും മഹത്വവും നിങ്ങളിലേക്ക് വരും.

ഈ അനുഗ്രഹം ലഭിക്കുന്നതിനുള്ള മാർഗം എന്താണ്? സദൃശവാക്യങ്ങൾ 3:9-10 -ൽ കർത്താവ് ഇപ്രകാരം പറയുന്നു, "യഹോവയെ നിന്റെ ധനംകൊണ്ടും എല്ലാവിളവിന്റെയും ആദ്യഫലംകൊണ്ടും ബഹുമാനിക്ക." നിങ്ങളുടെ സമ്പത്തിൻ്റെ ആദ്യഭാഗം കർത്താവിന് നൽകുക. നിങ്ങളുടെ വിളവെടുപ്പിന്റെ ആദ്യഫലവും വരുമാനത്തിന്റെ ആദ്യപങ്കും അവനു നൽകുക. അത് കർത്താവിന്റെ വേലയ്ക്കായി നൽകുക. അപ്പോൾ നിങ്ങൾ ആദരിക്കപ്പെടുകയും നിങ്ങളുടെ കലവറകൾ നിറയുകയും ചെയ്യും. നിങ്ങളുടെ മുന്തിരിച്ചക്കുകൾ പുതുവീഞ്ഞുകൊണ്ട് കവിഞ്ഞൊഴുകും. വലിയ സന്തോഷം വരും, ദൈവത്തിന്റെ അനുഗ്രഹം നിങ്ങളുടെ കുടുംബത്തിലും നിങ്ങളുടെ ജീവിതത്തിലും പൂർണ്ണമായിരിക്കും. മത്തായി 6:21-ൽ പറയുന്നതുപോലെ, "നിന്റെ നിക്ഷേപം ഉള്ളേടത്തു നിന്റെ ഹൃദയവും ഇരിക്കും." അതിനാൽ, കർത്താവിന് നൽകുക. നമുക്ക് ആദ്യം കർത്താവിന്റെ വേലയ്ക്കായി നൽകാം. മലാഖി 3:10 പ്രകാരം, നമുക്ക് ശുശ്രൂഷയ്ക്കായി നമ്മുടെ വഴിപാടുകൾ നൽകാം. അങ്ങനെ കർത്താവിനെ അറിയാത്തവർ അവനെക്കുറിച്ച് അറിയാനും അവന്റെ ഭവനത്തിന്റെ ഭാഗമാകാനും അവരെ സഹായിക്കാനും ശുശ്രൂഷിക്കാനും നമുക്ക് സാധിക്കും. അപ്പോൾ കർത്താവ് നിങ്ങൾക്ക് സമൃദ്ധിയും ഐശ്വര്യവും പൂർണ്ണതയും സന്തോഷവും നൽകും.

രണ്ടാമതായി, യെശയ്യാവ് 58:7-8 പ്രകാരം, ദരിദ്രരെ പരിപാലിക്കുന്നതിനായി നമുക്ക് നൽകാം. സഹായം ആവശ്യമുള്ളവരെ സഹായിക്കാനായി നമുക്ക് നൽകാം. വസ്ത്രമില്ലാത്തവർക്ക് വസ്ത്രവും പാർപ്പിടമില്ലാത്തവർക്ക് വീടും അടിസ്ഥാന ആവശ്യങ്ങൾ ഇല്ലാത്തവർക്ക് ഭൗതിക സഹായവും നമുക്ക് നൽകാം. നാം ദരിദ്രരെ കരുതുകയും ആവശ്യത്തിലായിരിക്കുന്ന കുട്ടികളെ സംരക്ഷിക്കുകയും ചെയ്യുമ്പോൾ, നമ്മുടെ സൗഖ്യവും ക്ഷേമവും വേഗത്തിൽ  വളരും. നമ്മുടെ വെളിച്ചം ഉഷസ്സുപോലെ പ്രകാശിക്കും; നീതി നമുക്ക് മുമ്പായി നടക്കും. എല്ലാം പ്രകാശപൂരിതമാവുകയും സമൃദ്ധി വർദ്ധിക്കുകയും ചെയ്യും.

മൂന്നാമതായി, ദൈവദാസന്മാർക്ക് അവരുടെ വ്യക്തിപരമായ ആവശ്യങ്ങൾ നിറവേറ്റുന്നതിനായി നാം വഴിപാടുകൾ നൽകണം. സങ്കീർത്തനം 16:2-3 ൽ നാം ഇതിനെക്കുറിച്ച് വായിക്കുന്നു. തന്റെ നന്മകൊണ്ട് കർത്താവിന് യാതൊരു പ്രയോജനവുമില്ലെന്നും, എന്നാൽ, കർത്താവിന്റെ വിശുദ്ധന്മാരിലും ശ്രേഷ്ഠന്മാരായ ദൈവജനങ്ങളിലും അവൻ പ്രസാദിക്കുന്നു എന്നും സങ്കീർത്തനക്കാരൻ പറയുന്നു. നാം അവർക്ക് നൽകണം. പ്രവാചകന്മാരെയും ശുശ്രൂഷകരെയും നാം പിന്തുണയ്ക്കണം. നാം ഈ രീതിയിൽ നൽകുന്നത് തുടരുമ്പോൾ, കർത്താവ് നമ്മെ സമൃദ്ധമായി അനുഗ്രഹിക്കും. കർത്താവ് നിങ്ങൾക്കും ഈ കൃപ നൽകട്ടെ.

നാലാമതായി, നിങ്ങൾക്ക് വ്യക്തിപരമായി കർത്താവിനെ സേവിക്കാൻ കഴിയുന്ന വിധത്തിൽ നിങ്ങളുടെ സമയവും സേവനത്തിന്റെ ഫലവും കർത്താവിനായി സമർപ്പിക്കണം. യെശയ്യാവു 30:20-21 ൽ നാം ഇതിനെക്കുറിച്ച് വായിക്കുന്നു. കർത്താവ് നിങ്ങൾക്ക് ഈ കൃപ നൽകട്ടെ. അപ്പോൾ നിങ്ങൾ നടക്കേണ്ട വഴി നിങ്ങളെ പഠിപ്പിക്കുകയും നിങ്ങൾ എടുക്കുന്ന ഓരോ ചുവടിലും നിങ്ങൾ നയിക്കപ്പെടുകയും സംരക്ഷിക്കപ്പെടുകയും ചെയ്യും. ഞങ്ങളുടെ ഭവനത്തിലും കുടുംബത്തിലും, യേശു വിളിക്കുന്നു ശുശ്രൂഷയിലൂടെയും കാരുണ്യയിലൂടെയും ഞങ്ങൾ ഈ അനുഗ്രഹം അനുഭവിച്ചിട്ടുണ്ട്. ഞാൻ യേശു വിളിക്കുന്നു ശുശ്രൂഷയിൽ സേവനം ചെയ്തുകൊണ്ടിരുന്നപ്പോൾ, കർത്താവ് എനിക്ക് പ്രത്യക്ഷനായി, യേശു വിളിക്കുന്നു ശുശ്രൂഷയിലൂടെ ലഭിക്കുന്ന വഴിപാടുകളുടെ പത്ത് ശതമാനം മറ്റ് ശുശ്രൂഷകൾക്ക് നൽകാൻ പറഞ്ഞു-പള്ളികൾ നിർമ്മിക്കാനും തന്റെ ദാസന്മാരെ പിന്തുണയ്ക്കാനും. പ്രത്യേകിച്ച് എന്റെ പിതാവ് കർത്താവിന്റെ സന്നിധിയിൽ ചേർന്നതിനുശേഷം, ഞങ്ങൾ ഇത് പൂർണ്ണഹൃദയത്തോടെ ചെയ്യാൻ ആരംഭിച്ചു. ഞങ്ങൾ സീഷ ആരംഭിക്കുകയും ദരിദ്രരെ കരുതുകയും ചെയ്തു. ദൈവകൃപയാൽ, ഞങ്ങളുടെ എല്ലാ ആവശ്യങ്ങളും നിറവേറ്റപ്പെട്ടു. ഇന്ന്, കർത്താവ് അനേകർക്ക് വർധനവും അനുഗ്രഹങ്ങളും നൽകിയിരിക്കുന്നു. ഈ ശുശ്രൂഷകളെല്ലാം ഇന്ത്യയിലെ ജനങ്ങൾ നൽകുന്ന വഴിപാടുകളിലൂടെയാണ് നടത്തപ്പെടുന്നത്. ഈ പ്രവർത്തനത്തെ പിന്തുണയ്ക്കാൻ എല്ലാ സമുദായങ്ങളിൽ നിന്നുമുള്ള ആളുകളുടെ ഹൃദയങ്ങളെ കർത്താവ് തുറന്നിരിക്കുന്നു. അവർ നൽകുന്നതിനെ അവൻ അനുഗ്രഹിച്ചിരിക്കുന്നു. പത്ത് ശതമാനം, അനേകം ശുശ്രൂഷകർക്കും വിവിധ ശുശ്രൂഷകൾക്കും നൽകപ്പെടുന്നു. അവർ ഞങ്ങൾക്കുവേണ്ടി പ്രാർത്ഥിക്കുന്നു, അതിന്റെ ഫലമായി  ഞങ്ങളുടെ എല്ലാ ആവശ്യങ്ങളും നിറവേറ്റപ്പെടുന്നു. നാം അനേകം ആളുകൾക്ക് ഒരു അനുഗ്രഹമാകേണ്ടതിന് കർത്താവ് നമുക്ക് വർദ്ധനവ് നൽകിയിരിക്കുന്നു. കർത്താവ് നിങ്ങൾക്കും ഇതേ അനുഗ്രഹവും ഫലസമൃദ്ധിയും നൽകും.

PRAYER:
പ്രിയ കർത്താവേ, മറ്റുള്ളവർക്ക് ഒരു അനുഗ്രഹമാകാനുള്ള ശക്തി ഞങ്ങൾക്ക് നൽകിയതിന് അങ്ങേയ്ക്ക് നന്ദി പറയുന്നു. മറ്റുള്ളവർക്ക് നൽകാനും അനുഗ്രഹിക്കാനും സന്നദ്ധമായ ഒരു ഉദാരമായ ഹൃദയം എനിക്ക് നൽകണമേ. ഞാൻ അർപ്പിക്കുന്ന വഴിപാടുകൾ പെരുകുകയും അനേകർക്ക് അനുഗ്രഹമാകുകയും ചെയ്യുമാറാകട്ടെ. "കൊടുപ്പിൻ; എന്നാൽ നിങ്ങൾക്കു കിട്ടും; അമർത്തി കുലുക്കി കവിയുന്നൊരു നല്ല അളവു നിങ്ങളുടെ മടിയിൽ തരും" എന്ന് അങ്ങ് അരുളിച്ചെയ്തതുപോലെ, അങ്ങയുടെ വാഗ്‌ദത്തം എന്റെ ജീവിതത്തിൽ നിറവേറട്ടെ. എന്റെ മക്കളെ അനുഗ്രഹിക്കുകയും അങ്ങയുടെ സമൃദ്ധമായ അനുഗ്രഹങ്ങൾ അനുഭവിക്കാൻ അവരെ ഇടയാക്കുകയും ചെയ്യണമേ. എന്റെ കുടുംബത്തെ എല്ലാ കുറവുകളിൽനിന്നും ക്ഷാമങ്ങളിൽനിന്നും സംരക്ഷിക്കണമേ. കൊടുക്കുന്ന ഹൃദയങ്ങളെയും കൈകളെയും അനുഗ്രഹിക്കുകയും അവർ അങ്ങയുടെ രാജ്യത്തിന്നായി വിതയ്ക്കുന്നതിനെ ഒക്കെയും വർദ്ധിപ്പിക്കുകയും ചെയ്യണമേ. അങ്ങയുടെ കൃപയും മഹത്വവും എന്റെ കുടുംബത്തിന്മേൽ വസിക്കുമാറാകട്ടെ, ഞങ്ങളെ അനേകർക്ക് ഒരു അനുഗ്രഹമാക്കണമേ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.