എന്റെ പ്രിയ സുഹൃത്തേ, ഇന്ന് നിങ്ങളെ ഇത്രയധികം വിശ്വാസത്തോടെ സ്വാഗതം ചെയ്യുന്നത് വളരെ സന്തോഷകരമാണ്. ഏതൊരു പിതാവിനും കഴിയുന്നതിലുപരിയായി ദൈവം എപ്പോഴും ഏറ്റവും മികച്ചത് നൽകുന്നു. മത്തായി 7:7 ൽ നിന്നുള്ള ഏറ്റവും മികച്ച ഈ സമ്മാനം ഇന്ന് അവനിൽ നിന്ന് സ്വീകരിക്കുക. അത്  ഇപ്രകാരം പറയുന്നു, "യാചിപ്പിൻ എന്നാൽ നിങ്ങൾക്കു കിട്ടും; അന്വേഷിപ്പിൻ എന്നാൽ നിങ്ങൾ കണ്ടെത്തും." ഇതാണ് കർത്താവ് നമ്മോട് പറയുന്നത്. ബർഗറുകൾ ഇഷ്ടപ്പെടുന്ന ഒരു സുഹൃത്ത് എനിക്കുണ്ട്. ഞങ്ങൾ പുറത്തുപോകുമ്പോഴെല്ലാം അവൻ ബർഗർ രുചിച്ചുകൊണ്ട് പറയും, "ഓ, ഇത് അത്ര നല്ലതല്ല. ഇതിൽ ഇത് കാണുന്നില്ല. അത് കാണുന്നില്ല ". ഞങ്ങൾ മൂന്നോ നാലോ കടകളിൽ ശ്രമിച്ചു, അവൻ ഒരിക്കലും സംതൃപ്തനായില്ല. അതിനാൽ അവൻ പറഞ്ഞു, "ഇല്ല, ഞാൻ ഏറ്റവും നല്ല ബർഗർ കണ്ടെത്തുന്നതുവരെ എല്ലാ കടകളിലും പോകും."

നിരവധി മാസങ്ങൾക്ക് ശേഷം ഞങ്ങൾ അവനിൽ നിന്ന് കേട്ടു. പെട്ടെന്ന് അവൻ പറഞ്ഞു, "ഓ, ഞാൻ ഏറ്റവും മികച്ച ബർഗർ കണ്ടെത്തി. അത് വളരെ നല്ലതാണ്. അത് വളരെ മികച്ചതാണ്. ഞാൻ അത് എവിടെയാണെന്ന് നിങ്ങളോട് പറയാൻ പോകുന്നില്ല. നിങ്ങൾക്ക് സ്വയം കണ്ടെത്താം." എന്നാൽ ഒടുവിൽ ബർഗർ കണ്ടെത്തിയതിൽ അവൻ വളരെ സന്തുഷ്ടനായിരുന്നു. ഒരാൾക്ക് തന്റെ ഹൃദയത്തിന്റെ ആഗ്രഹം നിറവേറ്റുന്നതിനായി ഒരു ബർഗർ അന്വേഷിക്കാൻ കഴിയുമെങ്കിൽ, അവൻ നമുക്ക് ഏറ്റവും മികച്ചത് നൽകുമെന്ന് അറിഞ്ഞുകൊണ്ട് നാം നമ്മുടെ കർത്താവായ യേശുവിനോട് എത്രയധികം യാചിക്കുകയും നമുക്ക് ആവശ്യമുള്ളതിനായി പ്രാർത്ഥിക്കുകയും വേണം. ഒരാൾക്ക് ഒരു സ്ഥലം മുതൽ മറ്റൊരു സ്ഥലം വരെ തിരയാൻ കഴിയുമെങ്കിൽ, നമുക്ക് പ്രാർത്ഥനയിൽ കാത്തിരിക്കാനും എല്ലാ ദിവസവും അവനോട് യാചിക്കാനും കഴിയില്ലേ?

കർത്താവ് നമുക്ക് നൽകും. അവൻ പറഞ്ഞു, "യാചിപ്പിൻ എന്നാൽ നിങ്ങൾക്കു കിട്ടും; എന്നെ അന്വേഷിപ്പിൻ എന്നാൽ നിങ്ങൾ കണ്ടെത്തും." ദൈവത്തിന്റെ മക്കളായ നാം അവനിൽ ആശ്രയിക്കണം. തന്റെ അത്ഭുതങ്ങൾ പ്രവർത്തിക്കുന്നതും നമുക്ക് വേണ്ടതെല്ലാം നൽകുന്നതും കർത്താവ് മാത്രമാണ്. അതിനാൽ വളരെ കഠിനാധ്വാനം ചെയ്യുന്നതിലും മികച്ച ഫലങ്ങൾ നേടുന്നതിലും മാത്രം ആശ്രയിക്കരുത്. ശുശ്രൂഷയിൽ നിങ്ങളുടെ സംസാര കഴിവുകളിൽ മാത്രം ആശ്രയിക്കരുത്. നിങ്ങളുടെ കഴിവുകൾ മാത്രം നിങ്ങൾക്ക് വലിയ വിജയം നൽകുമെന്ന് കരുതരുത്. ദൈവത്തിന്റെ മക്കളായ നമുക്കുവേണ്ടിയുള്ള അവന്റെ അനുഗ്രഹവും, അവൻ തുറക്കുന്ന വാതിലുകളും, അവന്റെ അത്ഭുതങ്ങളും മാത്രമാണ് നമ്മുക്ക് വഴികൾ തുറക്കുകയും നമ്മുടെ ജീവിതത്തിൽ ഏറ്റവും ഉത്തമമായതു നൽകുകയും ചെയ്യുന്നത്. എന്റെ സുഹൃത്തേ, കർത്താവിൽ ആശ്രയിക്കുക, ഉത്സാഹത്തോടെ അവനോട് യാചിക്കുക. നിങ്ങൾ ഇപ്പോൾതന്നെ അവനോട് യാചിക്കുമോ?

PRAYER:
സ്നേഹവാനായ പിതാവേ, അങ്ങയെ പിന്തുടരാൻ മനസ്സുള്ള ഒരു ഹൃദയത്തോടെയാണ് ഞാൻ അങ്ങയുടെ സന്നിധിയിൽ വരുന്നത്. കർത്താവേ, അങ്ങയോട് യാചിക്കാനും അങ്ങയെ അന്വേഷിക്കാനും അങ്ങയിൽ പൂർണമായി ആശ്രയിക്കാനും എന്നെ പഠിപ്പിക്കണമേ. എന്റെ സ്വന്തം ശക്തിയിൽ ആശ്രയിക്കാൻ എന്നെ പ്രേരിപ്പിക്കുന്ന എല്ലാ സംശയങ്ങളും നീക്കേണമേ. അങ്ങ് എല്ലായ്പ്പോഴും ഏറ്റവും മികച്ചത് നൽകുന്നുവെന്ന് വിശ്വസിക്കാൻ എന്നെ സഹായിക്കേണമേ. കാത്തിരിക്കാൻ ക്ഷമയും പ്രാർത്ഥിക്കാൻ വിശ്വാസവും എനിക്ക് തരണമേ. എന്റെ ജീവിതത്തിൽ അങ്ങേക്ക് മാത്രം തുറക്കാൻ കഴിയുന്ന ശരിയായ വാതിലുകൾ തുറക്കണമേ. അങ്ങയുടെ അനുഗ്രഹങ്ങളും അത്ഭുതങ്ങളും എന്റെ പാതയെ നയിക്കട്ടെ. കർത്താവേ, അങ്ങിൽ പൂർണ്ണമായും ആശ്രയിക്കാൻ ഞാൻ തീരുമാനിക്കുന്നു. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.