എന്റെ പ്രിയരേ, ഇന്നത്തെ വാഗ്ദത്തം യെശയ്യാവ് 45:2-ൽ നിന്നുള്ളതാണ്: "ഞാൻ നിനക്കു മുമ്പായി ചെന്നു ദുർഘടങ്ങളെ നിരപ്പാക്കും." അതെ, വളഞ്ഞതിനെയെല്ലാം കർത്താവ് നേരെയാക്കും. തകർന്നതിനെ അവൻ ശരിയാക്കുകയും പൂർത്തിയാകാത്തവയെ പൂർത്തിയാക്കുകയും നിങ്ങളുടെ വഴിയെ സമൃദ്ധമാക്കുകയും ചെയ്യും.

കർത്താവ് നമുക്ക് മുമ്പായി ചെല്ലുമ്പോൾ എന്ത് സംഭവിക്കും?

1. എല്ലാ പർവ്വതങ്ങളെയും മറികടക്കാനുള്ള വിശ്വാസത്താൽ നമ്മെ നിറയ്ക്കുന്നു.

നമുക്കു പ്രവചനവരം ഉണ്ടായിട്ടു സകല മർമ്മങ്ങളും സകല ജ്ഞാനവും ഗ്രഹിച്ചാലും മലകളെ നീക്കുവാൻ തക്ക വിശ്വാസം ഉണ്ടായാലും സ്നേഹമില്ല എങ്കിൽ നാം ഏതുമില്ല എന്ന് 1 കൊരിന്ത്യർ 13:2 പറയുന്നു. നമ്മുടെ മുമ്പിൽ പല പർവ്വതങ്ങളും നിലകൊള്ളുന്നുണ്ടാകാം. എന്നാൽ യെശയ്യാവ് 54:10-ൽ കർത്താവ് ഇപ്രകാരം അരുളിച്ചെയ്യുന്നു, "പർ‍വ്വതങ്ങൾ മാറിപ്പോകും, കുന്നുകൾ നീങ്ങിപ്പോകും." സാഹചര്യങ്ങൾ അസാധ്യമാണെന്ന് തോന്നുകയും തടസ്സങ്ങൾ വളരെ വലുതായി തോന്നുകയും ചെയ്യുമ്പോൾ പോലും, അവ മറികടക്കാൻ കർത്താവ് നിങ്ങൾക്ക് ശക്തിയും വിശ്വാസവും നൽകും. യേശു നമ്മുടെ വിശ്വാസത്തിന്റെ നായകനും പൂർത്തിവരുത്തുന്നവനും ആണെന്ന് എപ്പോഴും ഓർക്കുക. എബ്രായർ 12:1-2 ൽ നാം ഇത് വായിക്കുന്നു. നമ്മുടെ കണ്ണുകൾ അവനെ നോക്കികൊണ്ട് നമ്മുടെ മുമ്പിൽ വെച്ചിരിക്കുന്ന ഓട്ടം സ്ഥിരതയോടെ ഓടണമെന്ന് തിരുവെഴുത്ത് നമ്മോട് പറയുന്നു. നിങ്ങൾക്ക് ചുറ്റും നിരവധി ഭാരങ്ങളും തടസ്സങ്ങളും ഉയർന്നേക്കാം, എന്നാൽ വിശ്വാസമെന്നത് എല്ലാം ചെയ്യാൻ കഴിയുന്ന കർത്താവിന്റെ ശക്തിയിൽ ആശ്രയിക്കുക എന്നാണ് അർത്ഥമാക്കുന്നത്. അവന് എല്ലാം സാധ്യമാണ്. കർത്താവ് നിങ്ങളെ സഹായിക്കുകയും നിങ്ങളുടെ പർവ്വതങ്ങൾ നീക്കുകയും ചെയ്യും. "ഞാൻ അവയെ നീക്കുമെന്ന് വിശ്വസിക്കുക" എന്ന് അവൻ നിങ്ങളുടെ ഹൃദയത്തോട് സംസാരിക്കുന്നു. എല്ലാ തടസ്സങ്ങളെയും മറികടക്കാനുള്ള വിശ്വാസം അവൻ നിങ്ങൾക്ക് നൽകുന്നു. നിങ്ങൾക്ക് ചുറ്റുമുള്ളതെല്ലാം അനിശ്ചിതത്വത്തിലാണെന്ന് തോന്നിയാലും, നിങ്ങളെ നയിക്കാനും നിങ്ങളുടെ വഴിയിൽ നിൽക്കുന്ന എല്ലാ പർവ്വതങ്ങളെയും തകർക്കാനും കർത്താവിന് അധികാരമുണ്ട്. അവൻ നിങ്ങൾക്കു മുമ്പായി പോകുന്നുവെന്ന് വിശ്വസിക്കാൻ അവൻ നിങ്ങൾക്ക് വിശ്വാസം നൽകുന്നു. അപ്പോൾ പർവ്വതങ്ങൾ നീക്കപ്പെടുകയും നിങ്ങൾക്ക് സമനിരപ്പായ വഴിയിലൂടെ നടക്കാൻ വഴി തുറക്കുകയും ചെയ്യുന്നു.

2. കർത്താവ് നമ്മുടെ പാദങ്ങളെ ഉന്നതങ്ങളിൽ സ്ഥാപിക്കുന്നു.

രണ്ടാമതായി, കർത്താവ് നമ്മെ ഉയർന്ന സ്ഥാനങ്ങളിലേക്ക് ഉയർത്തുകയും നമ്മുടെ സാഹചര്യങ്ങൾക്ക് മീതെ നിൽക്കാൻ പ്രാപ്തരാക്കുകയും ചെയ്യുന്നു. യെശയ്യാവ് 58:14-ൽ നാം ഇതിനെക്കുറിച്ച് വായിക്കുന്നു. എന്തുകൊണ്ടാണ് അവൻ നമ്മെ ഉയർത്തുന്നത്? യെശയ്യാവ്‌ 52:7 അനുസരിച്ച്, കർത്താവ് രാജാവായി വാഴുന്നു. സുവാർത്ത പ്രഖ്യാപിക്കാനും അവൻ അവരെ സഹായിക്കുമെന്ന് മറ്റുള്ളവരോട് പറയാനും വേണ്ടി അവൻ നമ്മെ ഉയർത്തുന്നു. അവൻ നമ്മെ ഉന്നതമായ സ്ഥാനങ്ങളിൽ നിർത്തുന്നു. അവൻ നമ്മുടെ മുമ്പിൽ പോകുന്നു, തടസ്സങ്ങൾ നീക്കുന്നു, അവ മറികടക്കാൻ നമ്മെ പ്രാപ്തരാക്കുന്നു. എന്തുകൊണ്ടാണ് അവൻ ഇത് ചെയ്യുന്നത്? യേശു രാജാവായി വാഴുന്നു എന്ന് പ്രഖ്യാപിക്കാനും അവൻ സഹായിക്കുകയും രക്ഷിക്കുകയും സൗഖ്യമാക്കുകയും വിടുവിക്കുകയും ചെയ്യുമെന്ന് മറ്റുള്ളവർക്ക് കാണിച്ചുകൊണ്ട് അവന്റെ ശക്തി പ്രകടമാക്കാനും വേണ്ടിയാണ്. കർത്താവ് നിങ്ങളെ ഇപ്രകാരം ഉപയോഗിക്കും. യേശു വാഴുന്നു, രക്ഷിക്കുന്നു, സൗഖ്യമാക്കുന്നു, ആളുകളെ സ്വതന്ത്രരാക്കുന്നു എന്നിങ്ങനെ നിങ്ങൾ മറ്റുള്ളവരോട് പറയുന്ന വാക്കുകളെ അവൻ സ്ഥിരീകരിക്കും. കർത്താവ് നിങ്ങളുടെ പാദങ്ങൾ മനോഹരമാക്കുകയും ഉയരങ്ങളിൽ നിൽക്കാൻ നിങ്ങളെ പ്രാപ്തരാക്കുകയും ചെയ്യുന്നു. അവൻ നിങ്ങളെക്കൊണ്ട് സമാധാനത്തെക്കുറിച്ച് സംസാരിപ്പിക്കുന്നു. അവന്റെ സാന്നിധ്യം വഹിച്ചുകൊണ്ട്, ഉറച്ചുനിൽക്കുക, നിങ്ങളുടെ ചുറ്റുമുള്ള ആളുകൾക്ക് ഒരു പ്രകാശമായി ശോഭിക്കുക. ഈ അനുഗ്രഹത്തിനായി നമുക്ക് കർത്താവിനെ സ്തുതിക്കാം.

3. കർത്താവിന്റെ സ്നേഹം എല്ലാ പർവ്വതങ്ങളെയും നീക്കുന്നു

മൂന്നാമതായി, കർത്താവിന്റെ സ്നേഹം എല്ലാ പർവതങ്ങളെയും നീക്കിക്കളയുന്നു. യെശയ്യാവു 54:10 ൽ നാം ഇക്കാര്യം വായിക്കുന്നു. പർ‍വ്വതങ്ങൾ മാറിപ്പോകുകയും  കുന്നുകൾ നീങ്ങിപ്പോകുകയും ചെയ്തേക്കാം. എന്നാൽ തന്റെ മക്കളുമായുള്ള കർത്താവിന്റെ ഉടമ്പടി ഒരിക്കലും നീങ്ങിപോകില്ല. അവൻ തന്റെ ഉടമ്പടിയെ സമാധാനത്തിന്റെ ഉടമ്പടിയായി മാറ്റുന്നു. അതിനാൽ, നിങ്ങളുടെ ഹൃദയം കലങ്ങരുത്. കർത്താവ് ഇന്ന് നിങ്ങൾക്ക് ഈ അനുഗ്രഹം നൽകട്ടെ. കർത്താവ് നിങ്ങളെ പർവ്വതത്തിലേക്ക് ഉയർത്തുമ്പോൾ, മീഖാ 4:1 പറയുന്നു: "അന്ത്യകാലത്തു യഹോവയുടെ ആലയം ഉള്ള പർവ്വതം പർവ്വതങ്ങളുടെ ശിഖരത്തിൽ സ്ഥാപിതവും കുന്നുകൾക്കു മീതെ ഉന്നതവുമായിരിക്കും." സകലജാതികളും അവന്റെ അടുക്കൽ വരും; അവിടെനിന്നു കർത്താവിന്റെ വചനം ലോകത്തിലേക്കു പുറപ്പെടും. കർത്താവ് നിങ്ങളെ അത്തരമൊരു സ്ഥാനത്ത് നിർത്തുകയും തന്റെ പ്രാവചനിക വചനം ധൈര്യത്തോടെ പ്രഖ്യാപിക്കുന്ന ഒരാളാക്കുകയും ചെയ്യട്ടെ.

PRAYER:
പ്രിയ കർത്താവേ, അങ്ങയുടെ മുമ്പിൽ വിശ്വസ്തതയോടെ നടക്കാനും നീതിയുക്തവും കുറ്റമറ്റതുമായ ജീവിതം നയിക്കാനും എന്നെ സഹായിക്കണമേ. അങ്ങയുടെ കാരുണ്യം എന്നിലും എന്റെ കുടുംബത്തിലും വസിക്കട്ടെ. എന്റെ മക്കളെ അനുഗ്രഹിക്കുകയും അങ്ങയുടെ വഴികളിൽ അവരെ ഉറപ്പിക്കുകയും ചെയ്യണമേ. അവർ ജ്ഞാനത്തിലും ശക്തിയിലും കൃപയിലും വളരുകയും അനേകർക്ക് ഒരു അനുഗ്രഹമായി മാറുകയും ചെയ്യട്ടെ. അവർക്കു മുമ്പായി ചെന്ന് അവർ എടുക്കുന്ന ഓരോ ചുവടും നയിക്കണമേ. അവർ അങ്ങയെ വിളിച്ചപേക്ഷിക്കുന്നതിനു മുൻപുതന്നെ അവരുടെ പ്രാർത്ഥനകൾക്ക് ഉത്തരം നൽകണമേ. അവരെ അങ്ങയുടെ പരിശുദ്ധാത്മാവിനാൽ നിറയ്ക്കുകയും അവരുടെ ജീവിതം അങ്ങയുടെ മഹത്വത്തിനായി ഉപയോഗിക്കുകയും ചെയ്യണമേ. എന്റെ വിശ്വസ്തതയും നീതിപൂർവകമായ ജീവിതവും അവരുടെ ഭാവിയിലേക്കുള്ള ശക്തമായ ആത്മീയ അടിസ്ഥാനമായി മാറട്ടെ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു. ആമേൻ.