എന്റെ വിലയേറിയ സുഹൃത്തേ, നമ്മുടെ കർത്താവും രക്ഷകനുമായ യേശുക്രിസ്തുവിന്റെ ശക്തവും വിലയേറിയതുമായ നാമത്തിൽ ഞാൻ നിങ്ങൾക്ക് വന്ദനം പറയുന്നു. ഇന്ന്, യെശയ്യാവ് 65:23-ൽ നിന്നുള്ള മനോഹരമായ ഒരു വാഗ്‌ദത്തത്തെക്കുറിച്ച് ധ്യാനിക്കാൻ ഞാൻ നിങ്ങളെ ക്ഷണിക്കുന്നു, "അവർ‍ യഹോവയാൽ അനുഗ്രഹിക്കപ്പെട്ടവരുടെ സന്തതിയല്ലോ; അവരുടെ സന്താനം അവരോടുകൂടെ ഇരിക്കും." ദൈവത്തിൽനിന്നുള്ള എത്ര അത്ഭുതകരമായ ഉറപ്പ്! നിങ്ങൾ കർത്താവിനാൽ അനുഗ്രഹിക്കപ്പെടുമ്പോൾ, ആ അനുഗ്രഹം നിങ്ങളോടൊപ്പം അവസാനിക്കില്ല - അത് നിങ്ങളുടെ മക്കളുടെയും കൊച്ചുമക്കളുടെയും വരും തലമുറകളുടെയും ജീവിതത്തിലേക്ക് ഒഴുകിയുകൊണ്ടിരിക്കും. ദൈവത്തിന്റെ അനുഗ്രഹങ്ങൾ ഒരിക്കലും താൽക്കാലികമല്ല; അവ ശാശ്വതവും തലമുറകളോളം നിലനിൽക്കുന്നതുമാണ്. ഉല്പത്തി 13:16 - ൽ കർത്താവ് അബ്രഹാമിനോടു അരുളിച്ചെയ്തതെന്തെന്നാൽ: "ഞാൻ നിന്റെ സന്തതിയെ ഭൂമിയിലെ പൊടിപോലെ ആക്കും." ഉല്പത്തി 16:10-ൽ അവൻ വീണ്ടും അരുളിച്ചെയ്തു, "ഞാൻ നിന്റെ സന്തതിയെ ഏറ്റവും വർധിപ്പിക്കും; അത് എണ്ണിക്കൂടാതവണ്ണം പെരുപ്പമുള്ളതായിരിക്കും." ഉല്പത്തി 22:17 ലും 26:4 ലും ദൈവം പറഞ്ഞു, "നിന്റെ സന്തതിയെ ആകാശത്തിലെ നക്ഷത്രങ്ങൾപോലെയും കടൽക്കരയിലെ മണൽപോലെയും അത്യന്തം വർധിപ്പിക്കും." അത്തരം സമൃദ്ധി നമ്മുടെ സ്നേഹവാനായ ദൈവത്തിന്റെ ഹൃദയത്തെ കാണിക്കുന്നു - തന്നെ പൂർണ്ണഹൃദയത്തോടെ സ്നേഹിക്കുകയും വിശ്വസിക്കുകയും ചെയ്യുന്നവരുടെമേൽ തന്റെ അനുഗ്രഹങ്ങൾ വർദ്ധിപ്പിക്കുന്നതിൽ അവൻ ആനന്ദിക്കുന്നു.

2 ശമൂവേൽ 22:51-ലും സങ്കീർത്തനം 18:50-ലും, "തന്റെ അഭിഷിക്തന്നു ദയ കാണിക്കുന്നു; ദാവീദിന്നും അവന്റെ സന്തതിക്കും എന്നെന്നേക്കും തന്നേ" എന്ന് കർത്താവ് പറയുന്നു. ശാശ്വതമായ കരുണയുടെ എത്ര മഹത്തായ വാഗ്‌ദത്തം! അബ്രഹാമിനെയും യിസ്ഹാക്കിനെയും യാക്കോബിനെയും ദാവീദിനെയും ഓർത്ത അതേ ദൈവം നിങ്ങളെയും നിങ്ങളുടെ സന്തതികളെയും ഓർക്കും. സങ്കീർത്തനം 25:13 - ൽ വേദപുസ്തകം പറയുന്നു: "അവന്റെ സന്തതി ദേശത്തെ അവകാശമാക്കും." നിങ്ങൾ കർത്താവിനെ ഭയപ്പെടുകയും അവന്റെ വഴികളിൽ നടക്കുകയും ചെയ്യുമ്പോൾ നിങ്ങളുടെ വിശ്വസ്തതയുടെ ഫലം നിങ്ങളുടെ മക്കളും കൊയ്യും. അവരുടെ പഠനത്തിലും തൊഴിലിലും കുടുംബത്തിലും കർത്താവ് അവരെ അനുഗ്രഹിക്കും. അവർ പോകുന്നിടത്തെല്ലാം അവൻ അവരെ ഫലപ്രദവും സമൃദ്ധവുമാക്കും. സങ്കീർത്തനം 22:30 - ലും വചനം പറയുന്നു, "ഒരു സന്തതി അവനെ സേവിക്കും; വരുന്ന തലമുറയോടു യഹോവയെക്കുറിച്ചു കീർത്തിക്കും." അതിനർത്ഥം നിങ്ങളുടെ മക്കളും ദൈവത്തെ സേവിക്കാനും അവന്റെ നാമത്തെ മഹത്വപ്പെടുത്താനും എഴുന്നേൽക്കും എന്നാണ്. ഇന്ന് ദൈവത്തോടൊപ്പമുള്ള നിങ്ങളുടെ നടത്തം, വരും തലമുറകളിലെ നിങ്ങളുടെ കുടുംബത്തെ അനുഗ്രഹിക്കുമെന്ന് അറിയുന്നത് എത്ര അത്ഭുതകരമാണ്! അതിനാൽ, എന്റെ പ്രിയ സുഹൃത്തേ, കർത്താവിനോട് ചേർന്നു നിൽക്കുന്നത് തുടരുക. പരീക്ഷണങ്ങൾ നേരിടുമ്പോൾ നിരാശരാകരുത്. ഇന്നത്തെ നിങ്ങളുടെ വിശ്വാസം നാളത്തെ നിങ്ങളുടെ മക്കൾക്ക് അനുഗ്രഹത്തിന്റെ വിത്തായിരിക്കും.

എന്റെ പ്രിയ സുഹൃത്തേ, ഒരു വ്യക്തിപരമായ സാക്ഷ്യം നിങ്ങളുമായി പങ്കിടാൻ ഞാൻ ആഗ്രഹിക്കുന്നു. എന്റെ ജീവിതത്തിന്റെ ആദ്യകാലങ്ങളിൽ എനിക്ക് രണ്ട് മക്കളെ നഷ്ടപ്പെട്ടു. ആളുകൾ എന്നെ പരിഹസിച്ചു, "നിങ്ങൾക്ക് അത്തരമൊരു നഷ്ടം നേരിടേണ്ടി വന്നിട്ടും ദൈവത്തെ ഇത്രയധികം അന്വേഷിക്കുന്നതിൽ എന്താണ് പ്രയോജനം?" അവരുടെ വാക്കുകൾ വേദനാജനകമായിരുന്നു, പക്ഷേ ഞാൻ ഒരിക്കലും ദൈവത്തിന്റെ വാഗ്‌ദത്തങ്ങൾ ഉപേക്ഷിച്ചില്ല. അവൻ എന്റെ ദുഃഖം സന്തോഷമാക്കി മാറ്റുമെന്ന് വിശ്വസിച്ച് ഞാൻ അവനോട് ചേർന്നു നിന്നു. വാസ്തവമായി, കർത്താവ് എനിക്ക് സൗന്ദര്യമുള്ള രണ്ട് മക്കളെ നൽകി അനുഗ്രഹിച്ചു. ഇന്ന്, എന്റെ കുടുംബം അവന്റെ വിശ്വസ്തതയുടെ ജീവനുള്ള സാക്ഷ്യമായി നിലകൊള്ളുന്നു. കർത്താവ് ഞങ്ങളെ സമൃദ്ധമായി അനുഗ്രഹിച്ചിരിക്കുന്നു — മക്കൾ, കൊച്ചു മക്കൾ, മൂത്ത കൊച്ചു മക്കൾ — എല്ലാവരും ദൈവത്തെ സേവിക്കുകയും മഹത്വപ്പെടുത്തുകയും ചെയ്യുന്നു. തീർച്ചയായും യഹോവയുടെ അനുഗ്രഹത്താൽ സമ്പത്തുണ്ടാകുന്നു; അദ്ധ്വാനത്താൽ അതിനോടു ഒന്നും കൂടുന്നില്ല (സദൃശവാക്യങ്ങൾ 10:22). എന്റെ പ്രിയ സുഹൃത്തേ, എന്നെ ഉയർത്തിയ അതേ ദൈവം നിങ്ങളെയും അനുഗ്രഹിക്കും. നിങ്ങൾക്ക് നഷ്ടപ്പെട്ടതെല്ലാം അവൻ തിരികെ നൽകും. നിങ്ങൾ ആഗ്രഹിക്കുന്നതെന്തും അവൻ നിറവേറ്റും. കർത്താവ് നിങ്ങളെയും നിങ്ങളുടെ സന്തതികളെയും അനുഗ്രഹിക്കുമെന്ന് ഇന്ന് വിശ്വസിക്കുക. വചനം പറയുന്നു, "വിശ്വസിച്ചാൽ നീ ദൈവത്തിന്റെ മഹത്വം കാണും." അതിനാൽ വരിക, നമുക്ക് പ്രാർത്ഥനയിൽ കർത്താവിനെ മുറുകെ പിടിക്കാം. അവൻ നിങ്ങളെ ഓർക്കുകയും നിങ്ങളെ ഉയർത്തുകയും നിങ്ങളെയും നിങ്ങളുടെ തലമുറകളെയും ഭൂമിയിൽ ഒരു അനുഗ്രഹമാക്കുകയും ചെയ്യും.

PRAYER:
സ്നേഹവാനായ സ്വർഗ്ഗീയപിതാവേ, അങ്ങ് എന്നെയും എന്റെ സന്തതികളെയും അനുഗ്രഹിക്കുമെന്ന വാഗ്‌ദത്തത്തിന് നന്ദി. അങ്ങയുടെ ഉടമ്പടി എന്നേക്കും ഓർമ്മിക്കുന്ന വിശ്വസ്തനായ ദൈവമാണ് അങ്ങ്. കർത്താവേ, ഇന്ന് ഞാൻ അങ്ങയുടെ മുമ്പിൽ നിലവിളിക്കുമ്പോൾ എന്നെ ഓർക്കണമേ. എന്റെ ഹൃദയത്തിലെ എല്ലാ വേദനകളും, എല്ലാ നഷ്ടങ്ങളും, എല്ലാ ആഗ്രഹങ്ങളും അങ്ങ് അറിയുന്നു. അങ്ങയുടെ വിലയേറിയ കരങ്ങൾ എന്റെമേൽ വെച്ചു എന്നെ സമൃദ്ധിയായി അനുഗ്രഹിക്കണമേ. അബ്രഹാമിനും ദാവീദിനും വേണ്ടി ചെയ്തതുപോലെ എന്റെ അനുഗ്രഹങ്ങൾ വർദ്ധിപ്പിക്കേണമേ. എന്റെ മക്കളും കൊച്ചുമക്കളും അങ്ങയുടെ അനുഗ്രഹത്തിലും കൃപയിലും നടക്കട്ടെ. എന്റെ ജീവിതത്തിലെ എല്ലാ ദുഃഖങ്ങളെയും സന്തോഷമായും എല്ലാ ബലഹീനതകളെയും ശക്തിയായും മാറ്റണമേ. കർത്താവേ, ഇപ്പോൾ തന്നെ അങ്ങനെ ചെയ്യുന്നതിന് ഞാൻ അങ്ങേയ്ക്ക് നന്ദി പറയുന്നു. യേശുക്രിസ്തുവിന്റെ മഹത്തായ നാമത്തിൽ ഞാൻ പ്രാർത്ഥിക്കുന്നു, ആമേൻ.