എന്റെ സുഹൃത്തേ, ദൈവം എല്ലായ്പ്പോഴും നമ്മോട് സംസാരിക്കുന്നു, അവൻ സംസാരിക്കുമ്പോൾ നമുക്ക് സന്തോഷത്തിന്റെ ഉറവിടം ലഭിക്കുന്നു. ഇന്ന് രാവിലെ, യെശയ്യാവ് 41:15-ൽ നിന്ന് കർത്താവ് നമ്മോട് സംസാരിക്കുന്നു: "ഞാൻ നിന്നെ പുതിയതും മൂർച്ചയുള്ളതും പല്ലേറിയതും ആയ മെതിവണ്ടിയാക്കി തീർക്കുന്നു." അങ്ങനെയാണ് ദൈവം നമ്മെ രൂപപ്പെടുത്താൻ ആഗ്രഹിക്കുന്നത്. ഈ വാക്യത്തിന് മുമ്പുള്ള, 11 ഉം 12 ഉം വാക്യങ്ങളിൽ, നിരവധി ശത്രുക്കൾ വന്ന് നമ്മെ  വിഴുങ്ങാനും ഉപദ്രവിക്കാനും ശ്രമിച്ചേക്കാമെന്ന് നാം വായിക്കുന്നു. അതെ, അവർ നമുക്കെതിരെ കെണികൾ പ്രയോഗിച്ചേക്കാം. അവർ വന്ന് നമ്മെ ഉപദ്രവിച്ചേക്കാം. എന്നാൽ കർത്താവ് ഉടനെ പറയുന്നു, "ഭയപ്പെടേണ്ട. ഭയപ്പെടേണ്ട." നിങ്ങൾക്കറിയാമോ, നിങ്ങളെ തൊടുന്നവൻ അവന്റെ കണ്മണിയെ തൊടുന്നുവെന്ന് അവൻ സെഖര്യാവിൽ പറഞ്ഞു. എന്റെ സുഹൃത്തേ, അവർ നിങ്ങളുടെ ശത്രുക്കൾ മാത്രമല്ല; അവർ ദൈവവുമായും ശത്രുക്കളായി മാറുന്നു. അവരോട് നമുക്ക് സഹതാപം തോന്നേണ്ടതുണ്ട്. ദൈവത്തിന്റെ ശത്രുക്കൾക്ക് എന്താണ് സംഭവിക്കുന്നതെന്ന് നിങ്ങൾക്കറിയാം.

എന്നാൽ ഇതിനിടയിൽ, ദൈവം നമ്മോട് പറയുന്നു, "ഞാൻ നിന്നെ ഒരു മെതിവണ്ടിയാക്കി മാറ്റും, പുതിയതും മൂർച്ചയുള്ളതും അനേകം പല്ലുകളുള്ളതുമായ ഒരു ബലമുള്ള ആയുധമാക്കി മാറ്റും." ഈ ശത്രുതയ്ക്കിടയിൽ ദൈവം നമ്മെ ശക്തരാക്കുന്നു. യിസ്‌ഹാക്ക് ഗെരാർ എന്ന സ്ഥലത്ത് എത്തി തന്റെ പിതാവായ അബ്രഹാമിന്റെ കിണറുകൾ വീണ്ടും തുറക്കുകയും കുഴിക്കയും ചെയ്തു. ഒടുവിൽ അവൻ കുഴിച്ചപ്പോൾ, കിണറിൽ നിന്നു വെള്ളം പൊങ്ങി വന്നു. “ഇത് ഞങ്ങളുടേതാണ്; നീ ഇവിടെ നിന്ന് മാറിപ്പോവുക” എന്നു പറഞ്ഞു ശത്രുക്കൾ വന്ന് അവകാശപ്പെട്ടു. അവർ മുമ്പ് ആ കിണർ ഒരിക്കലും കുഴിച്ചിട്ടില്ല; എന്നാൽ വെള്ളം പൊങ്ങി വന്നപ്പോൾ, അത് കവർന്നെടുക്കാൻ അവർ എത്തി. യിസ്ഹാക്ക്  യുദ്ധം ചെയ്തില്ല; അവൻ അടുത്ത കിണർ തുറക്കാൻ പോയി. വീണ്ടും ശത്രുക്കൾ വന്നു. യിസ്ഹാക്ക് അടുത്ത കിണറ്റിലേക്ക്, അടുത്ത കിണറ്റിലേക്ക് നീങ്ങിക്കൊണ്ടിരുന്നു.

ഒടുവിൽ, അവർ പറഞ്ഞു, "ഓ, ഞങ്ങൾ എവിടെ പോയാലും ഞങ്ങൾക്ക് ഈ വ്യക്തിയെ തടയാൻ കഴിയുന്നില്ല. അവൻ പോകുന്നിടത്തെല്ലാം അവന്റെ കിണറുകളിൽ നിന്ന് വെള്ളം ഒഴുകുന്നു ". അതിനുശേഷം ദൈവം യിസ്ഹാക്കിനെ വളരെയധികം അഭിവൃദ്ധിപ്പെടുത്തി, അബീമേലെക് രാജാവ് തന്നെ വന്ന്, "നീ ആരാണ്? ഞങ്ങൾക്ക് യാതൊരു ഹാനിയും വരുത്തരുത്. നീ  ഞങ്ങളെക്കാൾ ഏറ്റവും ബലവാനാകകൊണ്ട് ഞങ്ങളെ വിട്ടുപോക എന്നു പറഞ്ഞു." അതാണ് കർത്താവ് നിങ്ങളുടെ ശത്രുക്കളോടും പറയാൻ പോകുന്നത്. രാജാക്കന്മാർ പോലും നിങ്ങളെക്കുറിച്ച്, നിങ്ങൾ ഒരു വലിയ മെതിവണ്ടിയായി മാറുകയാണെന്ന് സംസാരിക്കും. എന്റെ സുഹൃത്തേ, നിങ്ങളെ അഭിവൃദ്ധിപ്പെടുത്താനും നിങ്ങളെ അനുഗ്രഹിച്ച് നിങ്ങളെ ശക്തരാക്കാനും ദൈവത്തിന്റെ നിഗൂഢമായ വഴികൾ വരുന്നുണ്ട്. ഇതിനായി നമുക്ക് ദൈവത്തോട് നന്ദി പറയാമോ?

PRAYER:
സ്നേഹവാനായ പിതാവേ, എന്നെ അങ്ങയുടെ ശക്തമായ ആയുധമാക്കിയതിന് അങ്ങേയ്ക്ക് നന്ദി. ശത്രുതയാൽ നിരുത്സാഹപ്പെടാതെ, പീഡകർ നിമിത്തം നിരുത്സാഹപ്പെടാതെ,  ഞാൻ അങ്ങയുടെ ഇഷ്ടം ചെയ്യുന്നത് തുടരും. അങ്ങ് എന്നെ ശക്തമായ ഒരു മെതിവണ്ടിയാക്കും. കർത്താവേ, അങ്ങ് എന്നെ പുതുതാക്കി മാറ്റും. അങ്ങ് എന്നെ മൂർച്ചയേറിയതാക്കും. ഇതിന് എന്നെ ശക്തിപ്പെടുത്തണമേ. എനിക്ക് ഒരു പുതിയ ആത്മാവിനെ നൽകേണമേ. ദുഃഖത്തിൻ്റെ ആത്മാവിനെയും കരച്ചിലിൻ്റെയും പോരാട്ടത്തിൻ്റെയും ആത്മാവിനെയും നീക്കേണമേ. എന്നെ പരിശുദ്ധാത്മാവിനാൽ നിറയ്ക്കുകയും പരിശുദ്ധാത്മാവിനാൽ ഉപയോഗിക്കുകയും ചെയ്യേണമേ. ഞാൻ ചെയ്യുന്നതെല്ലാം അഭിവൃദ്ധിപ്പെടട്ടെ. എന്റെ കിണറുകളിൽ നിന്ന് വെള്ളം പുറത്തുവരട്ടെ. കർത്താവേ, രാജാക്കന്മാർ പോലും എന്നെ ഭയപ്പെടുന്ന തരത്തിലും, കോർപ്പറേഷൻ എന്നെ ഭയപ്പെടുന്ന തരത്തിലും, സമൂഹം എന്നെ ഭയപ്പെടുന്ന തരത്തിലും ഞാൻ പരമാവധി ഉത്പാദിപ്പിക്കട്ടെ. എന്നെ വളർത്തുകയും അഭിവൃദ്ധിപ്പെടുത്തുകയും ചെയ്യേണമേ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.