എന്റെ പ്രിയ സുഹൃത്തുക്കളേ, സകലവും പണിയുന്നത്  ദൈവമാണ്. എബ്രായർ 3:4 പ്രഖ്യാപിക്കുന്നതുപോലെ, ഏതു ഭവനവും ചമെപ്പാൻ ഒരാൾ വേണം; സർവ്വവും ചമച്ചവൻ ദൈവം തന്നേ. ഇന്ന്, കർത്താവ് നിങ്ങളോട് പറയുന്നു, "എന്റെ മകനേ, എന്റെ മകളേ, ഞാൻ നിനക്ക് ഒരു ഗൃഹം പണിയും." ഈ വാഗ്‌ദത്തം നാം 1 ദിനവൃത്താന്തം 17:10-ൽ വായിക്കുന്നു. അതുകൊണ്ട് നിരുത്സാഹപ്പെടരുത്; ദൈവം പണിയുന്ന ഗൃഹം എന്നേക്കും നിലനില്ക്കും.

ദൈവം പണിയാൻ പോകുന്ന ഗൃഹം ഏതാണ്? ഒന്നാമതായി, അവൻ നിങ്ങളെ പണിയുന്നു. യൂദാ 1:20-ൽ വേദപുസ്തകം പറയുന്നു, "നിങ്ങളുടെ അതിവിശുദ്ധ വിശ്വാസത്തെ ആധാരമാക്കി നിങ്ങൾക്കു തന്നേ ആത്മികവർദ്ധന വരുത്തുവിൻ." യേശുക്രിസ്തുവിൽ കേന്ദ്രീകരിച്ചിരിക്കുന്ന അതിവിശുദ്ധ വിശ്വാസത്താൽ ദൈവം നിങ്ങളെ ശക്തിപ്പെടുത്തുന്നു. യേശു നിങ്ങളുടെ രക്ഷകനും നിങ്ങളുടെ സ്വർഗ്ഗീയ പിതാവും നിങ്ങളുടെ വീണ്ടെടുപ്പുകാരനുമാണ്. അവൻ തന്റെ വിലയേറിയ രക്തം കൊണ്ട് നിങ്ങളെ വിലയ്ക്കു വാങ്ങുകയും നിങ്ങളെ സ്വന്തമാക്കുകയും ചെയ്തിരിക്കുന്നു.

ഈ വിശ്വാസം ഒരിക്കലും പരാജയപ്പെടുകയില്ല. പോരാട്ടങ്ങൾ, കഷ്ടപ്പാടുകൾ, ഭയങ്ങൾ അല്ലെങ്കിൽ അനിശ്ചിതത്വങ്ങൾ എന്തുതന്നെയായാലും, "യേശു എനിക്കായി തന്റെ രക്തം ചൊരിഞ്ഞു, എന്നെ വീണ്ടെടുത്തു" എന്ന് നിങ്ങൾക്ക് ധൈര്യത്തോടെ പ്രഖ്യാപിക്കാം. ഇത് നിങ്ങളുടെ ജീവിതത്തെ ശക്തിപ്പെടുത്തുകയും സ്ഥാപിക്കുകയും ചെയ്യുന്ന അതിവിശുദ്ധമായ വിശ്വാസമാണ്. ഈ വിശ്വാസത്തിൽ വളരുന്തോറും നിങ്ങൾ ദൈവത്തിന്റെ പൈതലെന്ന നിലയിൽ കൂടുതൽ ശക്തരാകുന്നു. ഈ വിശ്വാസം നിങ്ങളുടെ ഹൃദയത്തിൽ നിറയുമ്പോൾ നിങ്ങൾ പരിശുദ്ധാത്മാവിൽ പ്രാർത്ഥിക്കാൻ തുടങ്ങുന്നു. അപ്പോൾ നിങ്ങളുടെ പ്രാർത്ഥനകൾ സാധാരണ പ്രാർത്ഥനകളായിരിക്കുകയില്ല. സാത്താന്റെ ശക്തികളെ തകർക്കുകയും എതിർപ്പിനെ മറികടക്കുകയും ആശങ്കകളും ഭാരങ്ങളും നീക്കുകയും ദൈവത്തിന്റെ അനുഗ്രഹങ്ങൾക്കുള്ള വാതിലുകൾ തുറക്കുകയും ചെയ്യുന്ന ആത്മാവിനാൽ നയിക്കപ്പെടുന്ന പ്രാർത്ഥനകളായി അവ മാറുന്നു.

നിങ്ങൾ കർത്താവിനെ അന്വേഷിക്കുന്നത് തുടരുമ്പോൾ, അവന്റെ സ്നേഹം നിങ്ങളുടെ ഹൃദയത്തിൽ നിറയുന്നു. എന്തൊക്കെ പോരാട്ടങ്ങൾ, ഭയങ്ങൾ, കഷ്ടപ്പാടുകൾ, നാശം, കഠിനമായ വാക്കുകൾ, തെറ്റായ ആരോപണങ്ങൾ, തെറ്റായ വിധികൾ എന്നിവ നിങ്ങളുടെ നേരെ വന്നാലും, ദൈവത്തിന്റെ സ്നേഹം നിങ്ങളെ നിലനിർത്തും. എല്ലാ സാഹചര്യങ്ങളെയും മറികടക്കാനുള്ള ശക്തിയും നിങ്ങളെ വേദനിപ്പിക്കുന്നവരെപ്പോലും സ്നേഹിക്കാനുള്ള കൃപയും അവന്റെ സ്നേഹം നിങ്ങൾക്ക് നൽകുന്നു. ദുഃഖം, അപമാനം, വേദന എന്നിവയ്ക്കിടയിൽ പരിശുദ്ധാത്മാവ് നിങ്ങളെ പ്രാർത്ഥനയുടെ ആത്മാവിനാൽ നിറയ്ക്കുന്നു. അപ്പോൾ യേശുവിനെപ്പോലെ, നിങ്ങൾക്കും ഇങ്ങനെ പ്രാർത്ഥിക്കാൻ കഴിയും, "പിതാവേ, ഇവർ ചെയ്യുന്നതു ഇന്നതു എന്നു അറിയായ്കകൊണ്ടു ഇവരോടു ക്ഷമിക്കേണമേ." ദൈവത്തിന്റെ സ്നേഹം നിങ്ങളുടെ ഹൃദയത്തെ രൂപാന്തരപ്പെടുത്തുകയും നിങ്ങൾക്ക് വിജയം നൽകുകയും ചെയ്യുന്നു. അപ്പോൾ കർത്താവ് നിങ്ങളെ ഉയർത്തുകയും മാനിക്കുകയും ചെയ്യും. അവൻ നിങ്ങളുടെ വാക്കുകൾ സ്ഥാപിക്കുകയും നിങ്ങൾക്ക് ധൈര്യം നൽകുകയും ചെയ്യുന്നു. ധൈര്യമായിരിക്കുക, എന്തെന്നാൽ പരിശുദ്ധാത്മാവിന്റെ ശക്തിയിലൂടെയാണ് ദൈവം നിങ്ങളെ നിർമ്മിക്കുന്നത്. നിങ്ങളുടെ വിശ്വാസം ലോകത്തെ ജയിച്ച ജയമാകുന്നു. ദൈവം ഇന്ന് നിങ്ങൾക്ക് ആ വിജയകരമായ വിശ്വാസം നൽകട്ടെ.

രണ്ടാമതായി, ദൈവം നിങ്ങളെ തന്റെ ആലയമായി പണിയുന്നു. മത്തായി 16:18 ൽ യേശു പത്രൊസിനോടു പറഞ്ഞു, "നീ പത്രൊസ് ആകുന്നു; ഈ പാറമേൽ ഞാൻ എന്റെ സഭയെ പണിയും." പാതാളഗോപുരങ്ങൾ ഒരിക്കലും അവരെ ജയിക്കാതിരിക്കാൻ കർത്താവ് തന്റെ ജനത്തെ ശക്തിപ്പെടുത്തുന്നു. എത്ര എതിർപ്പുകൾ വന്നാലും, ക്രിസ്തു നിങ്ങളിൽ വസിക്കുന്നതിനാൽ നിങ്ങൾ ധൈര്യത്തോടെ അവനുവേണ്ടി ഉറച്ചുനിൽക്കും. 1 കൊരിന്ത്യർ 3:16 -ൽ നിങ്ങൾ ദൈവത്തിന്റെ മന്ദിരമാണെന്നും 1 കൊരിന്ത്യർ 3:9 -ൽ നിങ്ങൾ ദൈവത്തിന്റെ ഗൃഹനിർമ്മാണം എന്നും വേദപുസ്തകം  പഠിപ്പിക്കുന്നു. എത്ര അത്ഭുതകരമായ ഒരു പദവി! ദൈവം തന്റെ സാന്നിധ്യം നിങ്ങളിലൂടെ പ്രകാശിപ്പിക്കേണ്ടതിന്, നിങ്ങളെ തന്റെ മനോഹരമായ വാസസ്ഥലമായി രൂപപ്പെടുത്തിക്കൊണ്ടിരിക്കുന്നു.

അവസാനമായി, മറ്റുള്ളവരെ ശക്തിപ്പെടുത്തുന്നതിനുവേണ്ടിയാണ് കർത്താവ് നിങ്ങളെ പണിയുന്നത്. റോമർ 15:2 നമ്മെ പ്രോത്സാഹിപ്പിക്കുന്നതുപോലെ, നമ്മിൽ ഓരോരുത്തൻ കൂട്ടുകാരനെ നന്മെക്കായിട്ടു ആത്മിക വർദ്ധനെക്കു വേണ്ടി പ്രസാദിപ്പിക്കേണം. അതുപോലെ, 1 തെസ്സലൊനീക്യർ 5:11, അന്യോന്യം പ്രബോധിപ്പിച്ചും തമ്മിൽ ആത്മിക വർദ്ധനവരുത്തിയും പോരുവിൻ എന്ന് നമ്മോട് പറയുന്നു. എഫെസ്യർ 4:29-ൽ, കേൾക്കുന്നവർക്കു കൃപ ലഭിക്കേണ്ടതിന്നു ആവശ്യംപോലെ ആത്മികവർദ്ധനെക്കായി നല്ല വാക്കല്ലാതെ ആകാത്തതു ഒന്നും നിങ്ങളുടെ വായിൽ നിന്നു പുറപ്പെടരുതു എന്ന് നമുക്ക് നിർദ്ദേശം നൽകിയിരിക്കുന്നു. മറ്റുള്ളവരെ പ്രോത്സാഹിപ്പിക്കാനും അവരുടെ വിശ്വാസം ശക്തിപ്പെടുത്താനും അവരുടെ വിശുദ്ധി വർദ്ധിപ്പിക്കാനും അവരെ നീതിയിൽ വളരാൻ സഹായിക്കാനും ദൈവം നിങ്ങളുടെ ജീവിതത്തെ തന്റെ കൃപയാൽ നിറച്ചിരിക്കുന്നു. അവൻ നിങ്ങളെ തന്റെ ആലയമായും നിങ്ങൾക്ക് ചുറ്റുമുള്ള എല്ലാവർക്കും ഒരു അനുഗ്രഹമായും നിർമ്മിച്ചിരിക്കുന്നു.

എന്റെ പ്രിയരെ, ദൈവം നിങ്ങളെ പണിയുമ്പോൾ, നിങ്ങളുടെ ജീവിതം മറ്റുള്ളവർക്ക് അനുഗ്രഹത്തിന്റെ ഉറവിടമായി മാറുന്നു. ആത്മികമായും ശാരീരികമായും മാനസികമായും സാമ്പത്തികമായും, നിങ്ങളുടെ കുടുംബജീവിതത്തിലും തൊഴിൽ മേഖലയിലും അവൻ നിങ്ങളെ ഉറപ്പിച്ചുനിർത്തും. അവൻ നിങ്ങളെ സുരക്ഷിതരാക്കുകയും നിങ്ങളെ ഉയർത്തുകയും നിങ്ങൾ പോകുന്നിടത്തെല്ലാം നിങ്ങളെ ഒരു അനുഗ്രഹമാക്കുകയും ചെയ്യും.

PRAYER:
പ്രിയ കർത്താവേ, എന്റെ ജീവിതത്തിന്റെ നിർമ്മാതാവായതിന് അങ്ങേക്ക് നന്ദി. അതിവിശുദ്ധമായ വിശ്വാസത്തിൽ എന്നെ വളർത്തുകയും എല്ലാ ദിവസവും യേശുവിന്റെ രക്ഷിക്കുന്ന ശക്തിയിൽ വിശ്വസിക്കാൻ എന്നെ സഹായിക്കുകയും ചെയ്യണമേ. എന്റെ പ്രാർത്ഥനകൾ അങ്ങേക്ക് ശക്തവും പ്രസാദിപ്പിക്കുന്നതുമായിരിക്കാൻ എന്നെ പരിശുദ്ധാത്മാവിനാൽ നിറയ്ക്കണമേ. എന്റെ ജീവിതത്തിലെ എല്ലാ ഭയങ്ങളെയും ദുഃഖങ്ങളെയും കുറ്റാരോപണങ്ങളെയും കഷ്ടപ്പാടുകളെയും അങ്ങയുടെ സ്നേഹം ജയിച്ചടക്കട്ടെ. എന്നെ അങ്ങയുടെ വിശുദ്ധമന്ദിരമാക്കി മാറ്റുകയും എന്റെ സ്വഭാവത്തെ അങ്ങയുടെ ഹിതപ്രകാരം രൂപപ്പെടുത്തുകയും ചെയ്യണമേ. കൃപയുടെ വാക്കുകളാൽ മറ്റുള്ളവരെ പ്രോത്സാഹിപ്പിക്കാനും എനിക്ക് ചുറ്റുമുള്ളവരെ ശക്തിപ്പെടുത്താനും ഞാൻ പോകുന്നിടത്തെല്ലാം ഒരു അനുഗ്രഹമായി മാറാനും എന്നെ സഹായിക്കേണമേ. അങ്ങയുടെ മഹത്വത്തിനായി എന്റെ കുടുംബത്തെയും എന്റെ ജോലിയെയും എന്റെ ശുശ്രൂഷയെയും എന്റെ ആരോഗ്യത്തെയും എന്റെ ജീവിതത്തിലെ എല്ലാ മേഖലകളെയും പണിയേണമേ. അവസാനം വരെ എന്നെ വിശ്വസ്തതയോടെ നിലനിർത്തുകയും എന്റെ ജീവിതം അങ്ങയുടെ നന്മയെ പ്രതിഫലിപ്പിക്കുകയും ചെയ്യട്ടെ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.