എന്റെ വിലയേറിയ ദൈവ മക്കളെ, ഇന്നത്തെ വാഗ്ദത്തം സങ്കീർത്തനം 119:114-ൽ നിന്നുള്ളതാണ്. വേദപുസ്തകം കൈവശമുള്ളവർ അത് എടുത്ത് എന്നോടൊപ്പം ഈ വാക്യം വായിക്കുക: "നീ എന്റെ മറവിടവും എന്റെ പരിചയും ആകുന്നു; ഞാൻ തിരുവചനത്തിൽ പ്രത്യാശ വെച്ചിരിക്കുന്നു." ദൈവത്തിന്റെ മക്കളെന്ന നിലയിൽ നാം നമ്മുടെ ജീവിതത്തെ പരിശോധിക്കുകയും ദൈവവചനം വായിക്കാൻ ഓരോ ദിവസവും എത്ര സമയം ചെലവഴിക്കുന്നുവെന്ന് ചിന്തിക്കുകയും വേണം. യോഹന്നാൻ 14:23 ഇപ്രകാരം പറയുന്നു, "എന്നെ സ്നേഹിക്കുന്നവൻ എന്റെ വചനം പ്രമാണിക്കും; എന്റെ പിതാവു അവനെ സ്നേഹിക്കും; ഞങ്ങൾ അവന്റെ അടുക്കൽ വന്നു അവനോടുകൂടെ വാസം ചെയ്യും." നാം ദൈവവചനം വായിക്കുകയും പാലിക്കുകയും ചെയ്യുമ്പോൾ, പിതാവായ ദൈവം വന്ന് നമ്മോടൊപ്പം വസിക്കുന്നു, യേശുക്രിസ്തുവും നമ്മോടൊപ്പം വസിക്കുന്നു.

വേദപുസ്തകത്തിൽ നാം മാർത്തയുടെ സഹോദരിയായ മറിയയെക്കുറിച്ച് വായിക്കുന്നു. "മറിയ നല്ല അംശം തിരഞ്ഞെടുത്തിരിക്കുന്നു" എന്ന് കർത്താവായ യേശുക്രിസ്തു പറഞ്ഞതായി ലൂക്കൊസ് 10:42 പറയുന്നു. യേശുവിന്റെ കാൽക്കൽ ഇരിക്കുകയും അവന്റെ വചനം ശ്രദ്ധിക്കുകയും ചെയ്തുകൊണ്ടാണ് മറിയ നല്ല അംശം തിരഞ്ഞെടുത്തത്. അതിനാൽ, അവൾ നല്ല അംശം തിരഞ്ഞെടുത്തുവെന്ന് യേശു പറഞ്ഞു.

അതുപോലെ, എന്റെ വിലയേറിയ സഹോദരീ സഹോദരന്മാരേ, നിങ്ങൾ കഴിയുന്നത്ര ദൈവവചനം വായിക്കണം. നിങ്ങൾ ഇപ്രകാരം ദൈവവചനം വായിക്കുമ്പോൾ കർത്താവ് നിങ്ങളോടൊപ്പം ഉണ്ടായിരിക്കും. നിങ്ങൾ അവന്റെ സാന്നിധ്യം അനുഭവിക്കുകയും അവന്റെ സമൃദ്ധമായ അനുഗ്രഹങ്ങൾ സ്വീകരിക്കുകയും ചെയ്യും. അതിനാൽ, ദൈവവചനത്തെ നിങ്ങളുടെ ദൈനംദിന ജീവിതത്തിന്റെ ഒരു പ്രധാന ഭാഗമായി മാറ്റുക.

എന്റെ അമ്മയ്ക്ക് മക്കളുണ്ടായപ്പോൾ അവർ ഒരു കാര്യം പതിവായി ചെയ്യുമായിരുന്നു. ഞങ്ങൾ തീരെച്ചെറുപ്പമായിരിക്കുമ്പോൾത്തന്നെ, ഓരോരുത്തർക്കും ഒരു വേദപുസ്തകം വാങ്ങി സമ്മാനിക്കുമായിരുന്നു. അത് മാത്രമല്ല, അവർ ഞങ്ങളെക്കൊണ്ട് അത് വായിപ്പിക്കുകയും അതിലെ വചനങ്ങളുടെ അർത്ഥം മനസ്സിലാക്കാൻ പഠിപ്പിക്കുകയും ചെയ്യുമായിരുന്നു. അതുകൊണ്ടാണ് അവരുടെ മക്കളായ ഞങ്ങൾ നാലുപേരും സമൃദ്ധമായി അനുഗ്രഹിക്കപ്പെട്ടത്.

വേദപുസ്തകം വായിക്കാൻ നാം എത്ര സമയം ചെലവഴിക്കുന്നുവെന്ന് നമുക്ക് ചിന്തിച്ചുനോക്കാം. ദൈവവചനത്തിന് പ്രാധാന്യം നൽകുകയും അത് പതിവായി വായിക്കുകയും ചെയ്യുമ്പോൾ നാമും സമൃദ്ധമായി അനുഗ്രഹിക്കപ്പെടും. ദൈവത്തിന്റെ വചനം നാം വായിക്കേണ്ട രീതിയിൽത്തന്നെ വായിക്കുന്നുണ്ടെന്ന് ഉറപ്പുവരുത്തുക. അത് വായിക്കാനും ധ്യാനിക്കാനും അതിന്റെ അർത്ഥം മനസ്സിലാക്കാനും നമുക്ക് മതിയായ സമയം ചെലവഴിക്കാം. ദൈവത്തിന്റെ വചനം നമ്മുടെ മറവിടവും പരിചയുമാണ്. അവന്റെ വചനത്തിൽ നാം പ്രത്യാശ വെക്കുമ്പോൾ കർത്താവ് നമ്മോടുകൂടെ ഉണ്ടായിരിക്കുകയും നമ്മെ നയിക്കുകയും ചെയ്യും. അവന്റെ വാഗ്‌ദത്തമനുസരിച്ച്, അവൻ തീർച്ചയായും നമ്മുടെ ജീവിതത്തെ അനുഗ്രഹിക്കും. അതുകൊണ്ട്, എന്റെ വിലയേറിയ സഹോദരീസഹോദരന്മാരേ, നമുക്ക് ദിവസവും വേദപുസ്തകം വായിക്കുന്ന ശീലം വളർത്തിയെടുക്കാം. വേദപുസ്തകം  കൈവശം വെക്കുക മാത്രമല്ല, അത് വായിക്കുകയും മനസ്സിലാക്കുകയും അതിനെക്കുറിച്ച് ധ്യാനിക്കുകയും അതിനനുസരിച്ച് ജീവിക്കുകയും ചെയ്യാം.

PRAYER:
പ്രിയ സ്വർഗ്ഗീയ പിതാവേ, അങ്ങയുടെ വചനം വായിക്കാനും അതിന്റെ അർത്ഥം ഗ്രഹിക്കാനും അതനുസരിച്ച് ജീവിക്കാനുമുള്ള കൃപ അങ്ങയുടെ ഓരോ മക്കൾക്കും നൽകണമേ. അങ്ങയുടെ വചനം അവരുടെ മറവിടവും പരിചയും ആകട്ടെ. യേശുവിന്റെ കാൽക്കൽ ഇരുന്ന് അവന്റെ വചനം കേട്ടുകൊണ്ട് മറിയ നല്ല അംശം തിരഞ്ഞെടുത്തതുപോലെ, എല്ലാ ദിവസവും നല്ല അംശം തിരഞ്ഞെടുക്കാൻ അവരെ സഹായിക്കണമേ. അങ്ങയുടെ വചനത്താൽ അവരെ സമൃദ്ധമായി അനുഗ്രഹിക്കണമേ. പ്രസംഗകയുടെ അമ്മ തന്റെ നാല് മക്കളെ വേദപുസ്തകം വായിക്കാനും മനസ്സിലാക്കാനും പഠിപ്പിച്ചതുപോലെ, അങ്ങയുടെ വചനത്തിൽ തങ്ങളുടെ മക്കളെ നയിക്കാൻ മാതാപിതാക്കളെ സഹായിക്കണമേ. ഓരോ കുടുംബവും അങ്ങയുടെ സാന്നിധ്യവും മാർഗനിർദേശവും സംരക്ഷണവും സമൃദ്ധമായ അനുഗ്രഹങ്ങളും അനുഭവിക്കട്ടെ. യേശുവിന്റെ മഹത്തായ നാമത്തിൽ ഞാൻ പ്രാർത്ഥിക്കുന്നു, ആമേൻ.