പ്രിയ സുഹൃത്തേ, ഇന്ന് നാം സെഖര്യാവ് 10:12 ധ്യാനിക്കാൻ പോകുന്നു. ഇവിടെ അത് മനോഹരമായി പറയുന്നു, "ഞാൻ അവരെ യഹോവയിൽ ബലപ്പെടുത്തും; അവർ അവന്റെ നാമത്തിൽ സഞ്ചരിക്കും എന്നു യഹോവയുടെ അരുളപ്പാടു." കർത്താവ് പറയുന്നു, “ഞാൻ തന്നെ എന്റെ ജനത്തെ നയിക്കും." എത്ര സ്നേഹവാനായ ദൈവമാണ് നമുക്കുള്ളത്, അല്ലേ? അതുകൊണ്ടാണ് സങ്കീർത്തനം 18:32-ൽ ദാവീദ് ഇങ്ങനെ  പറഞ്ഞത്, "എന്നെ ശക്തികൊണ്ടു അരമുറുക്കുകയും എന്റെ വഴി കുറവുതീർക്കുകയും ചെയ്യുന്ന ദൈവം തന്നേ." സദൃശവാക്യങ്ങൾ 21:31-ൽ വേദപുസ്തകം പറയുന്നു, "കുതിരയെ യുദ്ധദിവസത്തേക്കു ചമയിക്കുന്നു; ജയമോ യഹോവയുടെ കൈവശത്തിലിരിക്കുന്നു." അതെ, പ്രിയ സുഹൃത്തേ, നമ്മുടെ എല്ലാ യുദ്ധങ്ങളിലും നമുക്ക് വിജയം നൽകുന്നത് കർത്താവാണ്. ദൈവം നമുക്കു അനുകൂലം എങ്കിൽ നമുക്കു പ്രതികൂലം ആർ?

ഈ ലോകത്ത്, പ്രതിരോധ സേനകൾ യുദ്ധത്തിന് എങ്ങനെ തയ്യാറെടുക്കുന്നുവെന്ന് നാം കാണുന്നു. ഇസ്രായേലിൽ അവർക്ക് നൂതന സാങ്കേതികവിദ്യയുണ്ട്, പ്രതിരോധ സേനകൾ അവരുടെ പൌരന്മാർക്ക്, അതായത് പുരുഷന്മാർക്കും സ്ത്രീകൾക്കും പരിശീലനം നൽകുന്നു. അവർ യുദ്ധത്തിന് തയ്യാറാണ്, എന്നാൽ കർത്താവ് പറയുന്നു, "നിങ്ങളെ ഒരുക്കുന്നത് ഞാനാണ്. നിങ്ങൾക്ക് ശക്തി നൽകുന്നത് ഞാനാണ്." യിസ്രായേൽമക്കൾ പോകുന്നിടത്തെല്ലാം യഹോവ അവരുടെ മുമ്പാകെ ചെന്നു അവരുടെ യുദ്ധങ്ങളൊക്കെയും നടത്തി. ഇന്നും കർത്താവ് തന്റെ ജനങ്ങൾക്കുവേണ്ടി അത് ചെയ്യുന്നു. അതുകൊണ്ടാണ് യുദ്ധത്തിനായി കുതിരയെ തയ്യാറാക്കിയാലും ജയം കർത്താവിൽ നിന്നു മാത്രമാണ് വരുന്നത്. സങ്കീർത്തനം 16:8 ൽ ദാവീദ് പറഞ്ഞതുപോലെ, "അവൻ എന്റെ വലത്തുഭാഗത്തുള്ളതുകൊണ്ടു ഞാൻ കുലുങ്ങിപ്പോകയില്ല." നമ്മുടെ പ്രതിരോധശക്തിയായി കർത്താവ് നമ്മോടൊപ്പം നിൽക്കുന്നു. കർത്താവ് നമ്മുടെ പ്രതിരോധമാകുന്നു. കർത്താവ് ശക്തനായ ഒരു യോദ്ധാവാകുന്നു. അവനോടൊപ്പം നമുക്ക് എല്ലാ യുദ്ധങ്ങളിലും വിജയിക്കാൻ കഴിയും.

ഈ ലോകത്തിൽ നമുക്ക് കഷ്ടതയുണ്ട്, പക്ഷേ അത് കർത്താവിന്റെ ദൃഷ്ടിയിൽ ഒന്നുമല്ല. നമ്മുടെ എല്ലാ കഷ്ടപ്പാടുകളേക്കാളും വലുതാണ് ദൈവം. എന്റെ സുഹൃത്തേ, നിരാശപ്പെടരുത്. നിങ്ങൾക്ക് എതിരായി രൂപപ്പെടുത്തിയ ഒന്നും വിജയിക്കില്ല; നിങ്ങൾക്കു വിരോധമായി ഉണ്ടാക്കുന്ന യാതൊരു ആയുധവും ഫലിക്കയില്ല. ശത്രുവിന് നിരവധി പദ്ധതികൾ ഉണ്ടായിരിക്കാം, ആളുകൾ നിങ്ങൾക്കെതിരെ ഉയർന്നുവന്നേക്കാം, പക്ഷേ നിങ്ങൾ നിങ്ങളുടെ എല്ലാ യുദ്ധങ്ങളിലും വിജയിക്കുകയും വിജയികളായി പുറത്തു വരുകയും ചെയ്യും. ഒരിക്കലും നിരാശപ്പെടരുത്. കർത്താവിൽ അചഞ്ചലമായി നിലകൊള്ളുക. സങ്കീർത്തനം 62:5-ൽ ദാവീദ് പറഞ്ഞതുപോലെ, "എന്റെ ഉള്ളമേ, ദൈവത്തെ നോക്കി മൌനമായിരിക്ക; എന്റെ പ്രത്യാശ അവങ്കൽനിന്നു വരുന്നു." അതെ, പ്രിയ സുഹൃത്തേ, നിങ്ങളുടെ ശക്തി യഹോവയിൽനിന്നു വരുന്നു; നിങ്ങൾ  അവന്റെ അധികാരത്തിൽ നടക്കും. നിങ്ങൾ ഭയപ്പെട്ടതു മതി; ഇപ്പോൾ നിങ്ങൾ അവന്റെ ശക്തിയിൽ എഴുന്നേൽക്കും. നിങ്ങൾ ശത്രുവിനെ തുരത്തും. എല്ലാ യുദ്ധങ്ങളെയും തരണം ചെയ്യാനും ജയിക്കാനും കർത്താവ് നിങ്ങൾക്ക് ശക്തി നൽകും.
 
PRAYER:
സ്വർഗ്ഗീയ പിതാവേ, എന്റെ വിജയം അങ്ങിൽ നിന്നുമാത്രമായതിനാൽ ഞാൻ അങ്ങേയ്ക്ക് നന്ദി പറയുന്നു. ഞാൻ അഭിമുഖീകരിക്കുന്ന ഓരോ യുദ്ധത്തിലും അങ്ങ് എന്റെ ശക്തിയും പ്രതിരോധവും ആയിരിക്കേണമേ. എന്റെ മുമ്പേ പോയി എന്റെ പാത സുരക്ഷിതമാക്കണമേ. അങ്ങിൽ  ആശ്രയിക്കാനും കുലുങ്ങിപ്പോകാതിരിക്കാനും എന്നെ സഹായിക്കണമേ. എന്റെ ആത്മാവിനെ ശാന്തമാക്കുകയും എന്റെ പ്രതീക്ഷ അങ്ങിൽ നിലനിൽക്കുകയും ചെയ്യട്ടെ. ജയിക്കാനുള്ള അങ്ങയുടെ ശക്തിയും അധികാരവും കൊണ്ട് എന്നെ നിറയ്‌ക്കേണമേ. ശത്രുവിന്റെ എല്ലാ ഭയത്തെയും എല്ലാ പ്രവൃത്തികളെയും പുറത്താക്കണമേ. അങ്ങയുടെ മഹത്വത്തിനായി എന്നെ വിജയത്തിലേക്ക് നയിക്കണമേ. യേശുവിന്റെ മഹത്തായ നാമത്തിൽ ഞാൻ പ്രാർത്ഥിക്കുന്നു. ആമേൻ.