പ്രിയരേ, ഇന്നത്തെ വാഗ്ദത്തം ഉല്പത്തി 28:15 ൽ നിന്നുള്ളതാണ്: "ഞാൻ നിന്നെ കൈവിടാതെ നിന്നോടു അരുളിച്ചെയ്തതു നിവർത്തിക്കും." കർത്താവ് നിങ്ങളെ ഒരിക്കലും കൈവിടുകയില്ല. അവൻ നിങ്ങൾക്കു വാഗ്ദത്തം ചെയ്തതെല്ലാം നിവർത്തിക്കും. കർത്താവിന്റെ സഹായത്തോടെ, ഒരു വ്യക്തിക്ക് ഒരു കാര്യം ചെയ്യാൻ സാധിച്ചേക്കാം, എന്നാൽ ഫലം കൊണ്ടുവരുന്നത് കർത്താവാണ്. യോനാഥാനെക്കുറിച്ച് 1 ശമൂവേൽ 14:45-ൽ രേഖപ്പെടുത്തിയിരിക്കുന്ന സംഭവത്തിലും നമുക്ക് ഇത് കാണാൻ കഴിയും.

അതുപോലെ, നമുക്ക് ഉല്പത്തി 28:13-15 വായിക്കാം. കയ്യിൽ ഒരു വടിയല്ലാതെ മറ്റൊന്നും ഇല്ലാതെ യാക്കോബ് ഒരു അഭയാർത്ഥിയായി തന്റെ ഭവനം വിട്ടുപോയി. താൻ എവിടേക്കാണ് പോകുന്നതെന്ന് അറിയാതെ അവൻ അമ്മയുടെ കൽപ്പന അനുസരിച്ച്, തന്റെ അമ്മായിയപ്പന്റെ വീട് എവിടെയാണെന്ന് അന്വേഷിച്ചുകൊണ്ട് അവൻ പുറപ്പെട്ടു. വിവിധ രാജ്യങ്ങളിലൂടെ നിരവധി മൈലുകൾ സഞ്ചരിക്കേണ്ടിവന്നു. എന്നാൽ യാക്കോബ് കർത്താവിനെ അനുസരിച്ചു നടന്നു. അങ്ങനെ രാത്രി ആയി. അവൻ ഒരു കല്ലെടുത്ത് തലയിണയായി തലയ്ക്കു കീഴെവെച്ച് ഉറങ്ങാൻ കിടന്നു. ആ സമയത്തു കർത്താവു അവനെ അന്വേഷിച്ചു വരികയും സ്വപ്നത്തിലൂടെ അവനോടു സംസാരിക്കുകയും ചെയ്തു. അതെ, അവന്റെ തലയ്ക്കടിയിൽ ഒരു കല്ല് മാത്രമേ ഉണ്ടായിരുന്നുള്ളൂ. ഇരുട്ട് അവനെ വലയം ചെയ്തു. കയ്യിൽ വടിയല്ലാതെ മറ്റൊന്നും ഇല്ലാതെ അവൻ വെറും നിലത്തു കിടക്കുകയായിരുന്നു. അവനോടൊപ്പം നിൽക്കാൻ ആരുമുണ്ടായിരുന്നില്ല. ഒരിക്കൽ ഉന്നതമായ പദവിയിൽ ജീവിച്ചിരുന്ന അവന്, ഇപ്പോൾ ഒന്നുമില്ലാത്ത അവസ്ഥയാണെന്നു തോന്നാം. എന്റെ പ്രിയ സുഹൃത്തുക്കളേ, നിങ്ങളും ഇന്ന് സമാനമായ അവസ്ഥയിലായിരിക്കാം. "ഇപ്പോൾ ഞാൻ ഇവിടെ ശൂന്യതയിലാണ് കിടക്കുന്നത്" എന്ന് പറയരുത്. നിങ്ങൾ യാക്കോബിനെപ്പോലെ യാത്ര ചെയ്യുകയും കർത്താവിന് അനുസൃതമായി ജീവിക്കുകയും ചെയ്യുന്നുവെങ്കിൽ, അത്തരമൊരു ദുഷ്കരമായ സമയത്ത് പോലും കർത്താവ് നിങ്ങളെ അന്വേഷിച്ചുവരും. അവൻ ഇന്ന് നിങ്ങളെ അന്വേഷിക്കുകയാണ്!

യഹോവ യാക്കോബിനോടു ഇപ്രകാരം അരുളിച്ചെയ്തു," ഞാൻ നിന്റെ പിതാവായ അബ്രാഹാമിന്റെ ദൈവവും, യിസ്ഹാക്കിന്റെ ദൈവവുമായ യഹോവ ആകുന്നു; നീ കിടക്കുന്ന ഭൂമിയെ ഞാൻ നിനക്കും നിന്റെ സന്തതിക്കും തരും." അതെ, ആ ഭൂമി അവന് നൽകാമെന്ന് കർത്താവ് വാഗ്ദാനം ചെയ്തു. അക്കാലത്ത് യാക്കോബ് ഒരു അഭയാർത്ഥിയായിരുന്നെങ്കിലും, ആ ദേശങ്ങളെല്ലാം അവനും അവന്റെ സന്തതിക്കും അവകാശപ്പെട്ടതായിരിക്കുമെന്ന് ദൈവം വാഗ്ദാനം ചെയ്തു. ആ ദേശത്തെ അവന് സ്വന്തമായി നൽകുമെന്ന് കർത്താവ് അവനോട്‌ വാഗ്‌ദത്തം ചെയ്തു. കർത്താവിന്റെ നാമംനിമിത്തം ഇന്ന് നിങ്ങൾ നിരസിക്കപ്പെടുകയോ തിരസ്കരിക്കപ്പെടുകയോ അപമാനിക്കപ്പെടുകയോ മോശമായി പെരുമാറപ്പെടുകയോ ചെയ്യുന്നുണ്ടോ? കർത്താവ് നിങ്ങളെ സ്ഥിരപ്പെടുത്തുകയും നിങ്ങൾക്ക് അവകാശം നൽകുകയും ചെയ്യും. നിങ്ങൾ അവനെ അനുസരിക്കുമ്പോൾ, നിങ്ങൾ പോകേണ്ട സ്ഥലത്തേക്ക് പോവുകയും ചെയ്യേണ്ട കാര്യങ്ങൾ ചെയ്യുകയും ചെയ്യും. അതിനാൽ, കർത്താവ് പറയുന്നു, "ഞാൻ നിന്നെ കൈവിടുകയില്ല. ഞാൻ നിനക്ക് ദേശം നൽകും."

നിന്റെ സന്തതി ഭൂമിയിലെ പൊടിപോലെ ആകും. നിങ്ങൾ എല്ലാ ദിശകളിലേക്കും പെരുകുകയും വ്യാപിക്കുകയും ചെയ്യും. അതെ, കർത്താവ് നിങ്ങൾക്ക് ഈ അനുഗ്രഹം നൽകുകയും അത് നിങ്ങളുടെ സന്തതികളിലേക്ക് പകരുകയും ചെയ്യുന്നു. ഇന്ന്, കർത്താവ് നിങ്ങളുടെ സന്തതികളെ സ്ഥിരപ്പെടുത്തുകയും നിങ്ങളുടെ ജീവിതം സുരക്ഷിതമാക്കുകയും ചെയ്യും. 15-ാം വാക്യത്തിൽ കർത്താവ് പറയുന്നു, "ഞാൻ നിന്നോടുകൂടെയുണ്ട്; നീ പോകുന്നേടത്തൊക്കെയും നിന്നെ കാത്തുസൂക്ഷിക്കും." അവൻ നിങ്ങളെ സംരക്ഷിക്കുമെന്ന് വാഗ്ദാനം ചെയ്യുന്നു. ദുഷ്ടന്മാർ നിങ്ങൾക്കെതിരെ എഴുന്നേറ്റ് നിങ്ങളെ വിഴുങ്ങാൻ ശ്രമിച്ചേക്കാം, പക്ഷേ അവർ വിജയിക്കില്ല. കർത്താവ് അവരെ തുരത്തുകയും അവൻ നിങ്ങൾക്കായി ഒരുക്കിവെച്ച സ്ഥലത്തേക്ക് നിങ്ങളെ തിരികെ കൊണ്ടുവരികയും ചെയ്യും.

കർത്താവ് എങ്ങനെയാണ് യാക്കോബിനെ തിരികെ കൊണ്ടുവന്നത്? സമൃദ്ധമായ അനുഗ്രഹങ്ങളോടെയാണ് അവൻ അവനെ തിരികെ കൊണ്ടുവന്നത്. ഉല്പത്തി 32:10-ന്റെ അടിസ്ഥാനത്തിൽ, താൻ കയ്യിൽ ഒരു വടി മാത്രം എടുത്തുകൊണ്ട് യോർദ്ദാൻ കടന്നതായും എന്നാൽ ഇപ്പോൾ രണ്ടു കൂട്ടമായി തീർന്നിരിക്കുന്നുവെന്നും യാക്കോബ് തിരിച്ചറിഞ്ഞു. അവൻ പതിനാല് വർഷം തന്റെ അമ്മായിയപ്പന് വേണ്ടി പ്രവർത്തിക്കുകയും ത്യാഗങ്ങൾ ചെയ്യുകയും ഭക്തിയോടെ കർത്താവിനെ അനുഗമിക്കുകയും തന്നിലൂടെ ദൈവം ഉദ്ദേശിച്ച കാര്യങ്ങൾ നിറവേറ്റുകയും ചെയ്തു. കർത്താവ് യാക്കോബിനോട് കൃപ കാണിച്ചു. യാക്കോബിന് വലിയ സമ്പത്തും അഭിവൃദ്ധിയും സമൃദ്ധമായ അനുഗ്രഹങ്ങളും അനുഗ്രഹീതമായ കുടുംബജീവിതവും മക്കളും ശക്തിയും ലഭിച്ചു. എന്റെ പ്രിയ സുഹൃത്തുക്കളേ, കർത്താവ് നിങ്ങളുടെ ജീവിതത്തിലും പ്രവർത്തിക്കും. അവൻ നിങ്ങളെ അനുഗ്രഹിക്കുകയും നിങ്ങൾക്ക് വർദ്ധനവ് നൽകുകയും ചെയ്യും. ധൈര്യമായിരിക്കുക!

PRAYER:
പ്രിയ പിതാവേ, അങ്ങയുടെ മക്കൾക്ക് നൽകിയിരിക്കുന്ന ഓരോ വാഗ്ദത്തവും നിവർത്തിക്കണമേ. എല്ലാം നഷ്ടപ്പെട്ട സാഹചര്യത്തിലും, അങ്ങയുടെ വാഗ്‌ദത്തങ്ങളും പ്രവചനങ്ങളും മുറുകെപ്പിടിക്കുകയും, വിശ്വസ്തതയോടെ പ്രാർത്ഥിക്കുകയും, വിശുദ്ധ ജീവിതം നയിക്കുകയും, അങ്ങയെ അനുസരിച്ച് അങ്ങയുടെ വഴികളിൽ നടക്കുകയും ചെയ്യുന്നവരെ അനുഗ്രഹിക്കണമേ. അവരെ അഭിവൃദ്ധിപ്പെടുത്തുകയും അവരുടെ അനുഗ്രഹങ്ങൾ വർദ്ധിപ്പിക്കുകയും ചെയ്യണമേ. അവർക്ക് ജ്ഞാനം നൽകുകയും അവർ ചെയ്യുന്നതെല്ലാം വിജയകരമാക്കുകയും ചെയ്യണമേ. അവരുടെ ജീവിതത്തിൽ വർധനവ് ഉണ്ടാകുവാൻ കൽപ്പിക്കുകയും അവരുടെ കുടുംബങ്ങളെ സുരക്ഷിതമായി ഉറപ്പിച്ചു നിർത്തുകയും ചെയ്യണമേ. ഒരു തിന്മയും അവരെ സ്പർശിക്കാതിരിക്കാൻ അവരെ സംരക്ഷിക്കുകയും അസൂയയിൽ നിന്നും ദുഷ്ടതയിൽ നിന്നും അവരെ സൂക്ഷിക്കുകയും ചെയ്യണമേ. അവരോട് സംസാരിക്കുകയും  അവരെ നയിക്കുകയും അങ്ങയുടെ തിരുഹിതപ്രകാരം  അവരെ വഴിനടത്തുകയും ചെയ്യണമേ. അങ്ങ് വാഗ്ദത്തം ചെയ്ത അനുഗ്രഹങ്ങൾ ഇന്ന് അവരുടെമേൽ വർഷിക്കണമേ. അങ്ങയുടെ കൃപയ്ക്കും അചഞ്ചലമായ സാന്നിധ്യത്തിനും നന്ദി. യേശുവിന്റെ നാമത്തിൽ ഞാൻ പ്രാർത്ഥിക്കുന്നു. ആമേൻ.