എന്റെ പ്രിയ സുഹൃത്തുക്കളെ, സങ്കീർത്തനം 41:1-ൽ നമുക്ക് മനോഹരമായ ഒരു വാഗ്‌ദത്തമുണ്ട്: "എളിയവനെ ആദരിക്കുന്നവൻ ഭാഗ്യവാൻ." നമുക്ക് നമ്മുടേതായ പോരാട്ടങ്ങൾ ഉള്ളപ്പോൾ എളിയവരെയും ദരിദ്രരെയും ആവശ്യമുള്ളവരെയും സഹായിക്കേണ്ടത് എന്തിനെന്ന്  പലപ്പോഴും നാം ചിന്തിക്കുന്നു. എന്നിട്ടും യേശു മത്തായി 25-ൽ നമ്മെ ഇപ്രകാരം ഓർമ്മിപ്പിക്കുന്നു, എന്റെ ഈ ഏറ്റവും ചെറിയ സഹോദരന്മാരിൽ ഒരുത്തന്നു നിങ്ങൾ ചെയ്തേടത്തോളം എല്ലാം എനിക്കു ചെയ്തു. അതെ, നിസ്സഹായരായവർക്ക് സമർപ്പിക്കുന്ന ഓരോ കരുണാർദ്രമായ പ്രവൃത്തിയും കർത്താവിനുള്ള ആരാധനയാണ്, അത്തരം സ്നേഹത്തെ അവൻ ഒരിക്കലും മറക്കില്ല.

ഗുരുദാസ്പൂരിൽ നിന്നുള്ള പരംജിത് എന്ന സഹോദരി ഈ സത്യം നേരിട്ട് അനുഭവിച്ചു. 25 വർഷമായി അവർ യേശു വിളിക്കുന്നു ശുശ്രൂഷയുമായി ബന്ധപ്പെട്ടിരുന്നു. അവരുടെ ഇളയ സഹോദരിമാരെല്ലാം സന്തോഷകരമായ ദാമ്പത്യജീവിതം നയിക്കുമ്പോഴും, അവർ വർഷങ്ങളോളം അവിവാഹിതയായി തുടർന്നു. "നിന്റെ ദൈവം എവിടെ?" എന്ന് ചോദിച്ച് ആളുകൾ അവരുടെ വിശ്വാസത്തെ ചോദ്യം ചെയ്യുകയും അവരെ പരിഹസിക്കുകയും ചെയ്തു. എന്നിരുന്നാലും, ദൈവഭക്തിയുള്ള ഒരു ജീവിതപങ്കാളിയെ ലഭിക്കണമെന്ന ഒരേയൊരു ആഗ്രഹവുമായി അവർ ഉപവസിക്കുന്നതും പ്രാർത്ഥിക്കുന്നതും തുടർന്നു. പത്ത് വർഷത്തെ കാത്തിരിപ്പിന് ശേഷം പ്രാർത്ഥന ആവശ്യപ്പെട്ട് അവർ ഡോ. പോൾ ദിനകരന് ഒരു ഇമെയിൽ എഴുതി. അദ്ദേഹത്തിന്റെ മറുപടി അവരുടെ ഹൃദയത്തിന് വലിയ സമാധാനം നൽകി. അവരുടെ പ്രത്യാശെക്കു ഭംഗം വരികയില്ലെന്നും അവരെ അഭിവൃദ്ധിപ്പെടുത്താൻ കർത്താവിന് പദ്ധതിയുണ്ടെന്നും ഉള്ള ദൈവത്തിന്റെ വാഗ്‌ദത്തങ്ങൾ നൽകി അദ്ദേഹം അവരെ പ്രോത്സാഹിപ്പിച്ചു. ആ വാഗ്‌ദത്തങ്ങളിൽ ഉറച്ചുനിന്നുകൊണ്ട് അവർ ദൈവത്തിൽ ആശ്രയിക്കുന്നത് തുടർന്നു. 2009-ൽ, തന്റെ 44-ാം വയസ്സിൽ, മിസ്റ്റർ. പീറ്റർ എന്ന ഉത്തമനായ ഭർത്താവിനെ നൽകി ദൈവം അവരെ അനുഗ്രഹിച്ചു. അങ്ങനെ അവർ ഒരുമിച്ച് സന്തോഷകരമായ ദാമ്പത്യജീവിതം ആരംഭിക്കുകയും ചെയ്തു.

വിവാഹശേഷം അധികം വൈകാതെ അവർ കുടുംബ അനുഗ്രഹ പദ്ധതിയിൽ ചേർന്നു. അവരുടെ ഭർത്താവിന് ഇലക്ട്രിസിറ്റി ബോർഡിൽ നല്ല ജോലിയുണ്ടായിരുന്നു. ഇരുവരും ദൈവത്തെ സ്നേഹിച്ചിരുന്നുവെങ്കിലും അവർ അഞ്ച് വർഷത്തോളം മക്കളില്ലാതെ തുടർന്നു. അവരുടെ ഹൃദയം തകർന്നു, പ്രായം കാരണം തങ്ങൾക്ക് ഒരിക്കലും കുട്ടികളുണ്ടാകില്ലെന്ന് അവർ ഭയപ്പെട്ടു. ഈ വേദനാജനകമായ കാലഘട്ടത്തിലും, സീഷയിലൂടെ നിരാലംബരായ കുട്ടികളെ പിന്തുണയ്ക്കാൻ അവർ തീരുമാനിച്ചു. പ്രതീക്ഷയില്ലാത്ത കുട്ടികൾക്ക് ഒരു അനുഗ്രഹമാകാൻ അവർ തീരുമാനിച്ചു. എന്നാൽ, അവരെ അത്ഭുതപ്പെടുത്തിക്കൊണ്ട്, ആ കുട്ടികളെ പിന്തുണച്ച് രണ്ട് മാസത്തിനുള്ളിൽ ദൈവം അവർക്ക് ഒരു അത്ഭുതം ചെയ്തു. പരംജിത് ഗർഭിണിയാവുകയും, 2015-ൽ അവർക്ക് മഹിമ എന്ന് പേരിട്ട സുന്ദരിയായ ഒരു പെൺകുഞ്ഞ് ജനിക്കുകയും ചെയ്തു. ഇന്ന് അവൾ പഠനത്തിൽ മികവ് പുലർത്തുന്ന, ദൈവം നൽകിയ കഴിവുകളെ അവന്റെ മഹത്വത്തിനായി ഉപയോഗിക്കുന്ന അനുഗ്രഹീതയായ ഒരു പൈതലായി വളർന്നിരിക്കുന്നു.

പരംജിത്തും പീറ്ററും ആവശ്യങ്ങളുള്ള കുട്ടികളോട് അനുകമ്പ പ്രകടിപ്പിച്ചപ്പോൾ, ദൈവം അവരുടെ ഹൃദയത്തിലെ അഗാധമായ ആഗ്രഹം നിറവേറ്റിക്കൊടുത്തു. വർഷങ്ങളോളം അവർ കാത്തിരുന്ന അനുഗ്രഹം, അവർ മറ്റുള്ളവരെ അനുഗ്രഹിക്കാൻ തീരുമാനിച്ചപ്പോഴാണ് ലഭിച്ചത്. ഇതാണ് ദൈവത്തിന്റെ വാഗ്ദത്തം. നാം എളിയവരെ ബഹുമാനിക്കുകയും സ്നേഹത്തോടെ അവരെ സേവിക്കുകയും ചെയ്യുമ്പോൾ, കർത്താവ് തന്നെ നമ്മെ ഓർക്കുകയും നമ്മുടെ കരുണയെ മാനിക്കുകയും നമ്മുടെ ഹൃദയത്തിലെ ആഗ്രഹങ്ങൾ നിറവേറ്റി നമ്മെ അനുഗ്രഹിക്കുകയും ചെയ്യുന്നു. ഇന്ന് നിങ്ങൾ കാത്തിരിക്കുന്ന ഏത് അത്ഭുതത്തിനായും ദൈവത്തിൽ വിശ്വസിക്കുക, സന്നദ്ധഹൃദയത്തോടെ മറ്റുള്ളവരെ സേവിക്കുക, അവൻ തന്റെ തക്ക സമയത്തിനനുസരിച്ച് നിങ്ങൾക്ക് പ്രതിഫലം നൽകും.

PRAYER: 
പ്രിയ കർത്താവേ, അങ്ങയെപ്പോലെ എളിയവരെ സ്നേഹിക്കാനും കരുതാനും എന്നെ പഠിപ്പിച്ചതിന് അങ്ങേക്ക് നന്ദി. അവർക്കായി ഞാൻ ചെയ്യുന്നതെല്ലാം അങ്ങേയ്ക്കുവേണ്ടിയാണ് ചെയ്യുന്നത് എന്ന ബോധ്യത്തോടെ, ആവശ്യത്തിലിരിക്കുന്നവരെ സന്തോഷത്തോടെ ശുശ്രൂഷിക്കാനുള്ള കരുണയുള്ള ഒരു ഹൃദയം എനിക്ക് നൽകണമേ. കർത്താവേ, എന്റെ ജീവിതത്തിലെ ഓരോ ഭാരവും പ്രാർത്ഥനയും വാഞ്ഛയും അങ്ങ് ഓർക്കുകയും അങ്ങയുടെ പരിപൂർണ്ണ ഹിതമനുസരിച്ച് എന്നെ അനുഗ്രഹിക്കുകയും ചെയ്യണമേ. അങ്ങയുടെ നാമത്തിൽ ചെയ്യുന്ന എല്ലാ കാരുണ്യപ്രവർത്തനങ്ങൾക്കും പ്രതിഫലം നൽകണമേ. എന്റെ ജീവിതം ഈ ലോകത്തോട് അങ്ങയുടെ സ്നേഹത്തെ പ്രതിഫലിപ്പിക്കുന്നതായിരിക്കട്ടെ. മറ്റുള്ളവർക്ക് അനുഗ്രഹമായിത്തീരുവാൻ അങ്ങയുടെ കൃപയാൽ എന്നെ നിറയ്ക്കുകയും, എന്റെ ഹൃദയത്തിൽ അങ്ങ് സ്ഥാപിച്ചിട്ടുള്ള ആഗ്രഹങ്ങൾ നിറവേറ്റിത്തരികയും ചെയ്യണമേ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു. ആമേൻ.