എന്റെ വിലയേറിയ സുഹൃത്തേ, ഇന്ന് തൊഴിലാളികളുടെ ദിനമാണ്. നിങ്ങളുടെ കൈകളുടെ പ്രവർത്തനത്തെയും നിങ്ങളുടെ കുടുംബത്തെയും ഉപജീവനത്തെയും മറ്റുള്ളവർക്കുള്ള സേവനത്തെയും അവനുള്ള സേവനത്തെയും ദൈവം അനുഗ്രഹിക്കട്ടെ. ഈ മാസം, നിങ്ങളുടെ ജീവിതത്തിലെ എല്ലാ കാര്യങ്ങളും പുനർനിർമ്മിക്കാൻ കർത്താവ് ആഗ്രഹിക്കുന്നു. സങ്കീർത്തനം 102:15 പറയുന്നു, "യഹോവ സീയോനെ പണികയും തന്റെ മഹത്വത്തിൽ പ്രത്യക്ഷനാകയും ചെയ്യും." എല്ലാം നഷ്ടപ്പെട്ട്, തകർന്ന്, നിങ്ങളുടെ ജീവിതത്തിൽ നിന്ന് എല്ലാ മഹത്വവും പോയി എന്ന് നിങ്ങൾക്ക് തോന്നിയേക്കാം. എന്നാൽ ദൈവം ഇങ്ങനെ  വാഗ്ദാനം ചെയ്യുന്നു, "ഞാൻ നിങ്ങളെ എന്റെ വാസസ്ഥലമായി പുനർനിർമ്മിക്കും, നിങ്ങളുടെ ജീവിതത്തിൽ എന്റെ മഹത്വത്തോടെ ഞാൻ പ്രത്യക്ഷപ്പെടും." നിങ്ങളുടെ ജീവിതം, കുടുംബം, ശരീരം, ശുശ്രൂഷ എന്നിവ അവന്റെ മഹത്വത്താൽ പുനഃസ്ഥാപിക്കപ്പെടും, നിങ്ങൾ വീണ്ടും പ്രകാശിക്കും. നിങ്ങളുടെ ഹൃദയം കലങ്ങിപ്പോകരുതു; ദൈവം നിങ്ങളെ പുനർനിർമ്മിക്കുമ്പോൾ മഹത്വത്തിന്റെ നാളുകൾ വരും. യെശയ്യാവു 61:4 ഇപ്രകാരം പ്രഖ്യാപിക്കുന്നു, നിങ്ങൾ  പുരാതനശൂന്യങ്ങളെ പണികയും പൂർ‍വ്വന്മാരുടെ നിർ‍ജ്ജനസ്ഥലങ്ങളെ നന്നാക്കുകയുംചെയ്യും. നിങ്ങളുടെ ജീവിതത്തിൽ തകർന്നതെന്തും, അത് പുനർനിർമ്മിക്കാൻ ദൈവം നിങ്ങളെ ശക്തിപ്പെടുത്തുകയും തന്റെ മഹത്വം കൊണ്ട് നിറയ്ക്കുകയും ചെയ്യും. തകർന്ന മതിലുകളും അവശിഷ്ടങ്ങളും പുനഃസ്ഥാപിക്കപ്പെടുമെന്ന് യെശയ്യാവു 58:12 ഉറപ്പുനൽകുന്നു. ബന്ധങ്ങൾ പുതുക്കപ്പെടുകയും സന്തോഷവും സ്നേഹവും ജീവിതത്തിന്റെ പൂർണ്ണതയും മടങ്ങിവരികയും ചെയ്യും.

ദൈവം എന്താണ് പുനർനിർമ്മിക്കുന്നത്? ഒന്നാമതായി, നിങ്ങളുടെ സമ്പത്ത്. ആമോസ് 9:14 - ൽ അടിമത്തത്തിൽ നിന്നുള്ള പുനഃസ്ഥാപനം വാഗ്ദാനം ചെയ്യുന്നു. നിങ്ങൾ ബന്ധിക്കപ്പെട്ടതുപോലെയും പുരോഗതി കൈവരിക്കാൻ കഴിയാത്തതുപോലെയും തോന്നിയേക്കാം. എന്നാൽ ദൈവം തന്റെ ആത്മാവിനാൽ നിങ്ങളെ മോചിപ്പിക്കും. നശിച്ചുപോയത് നിങ്ങൾ പുനർനിർമ്മിക്കുകയും മുന്തിരിത്തോട്ടങ്ങൾ ഉണ്ടാക്കി അവയിലെ വീഞ്ഞു കുടിക്കയും തോട്ടങ്ങൾ ഉണ്ടാക്കി അവയിലെ ഫലം അനുഭവിക്കയും ചെയ്യും. നിങ്ങളുടെ ജോലി, ബിസിനസ്സ്, കുടുംബം, ശുശ്രൂഷ, ദാനം എന്നിവ വീണ്ടും ഫലം കാണാൻ തുടങ്ങും. ഇഷ്ടികകൾ വീണുപോയെങ്കിലും, ബന്ധങ്ങൾ, സാമ്പത്തികം, ആരോഗ്യം, പ്രശസ്തി, ജ്ഞാനം അല്ലെങ്കിൽ കഴിവ് എന്നിവയിൽ, മെച്ചപ്പെട്ട ശക്തിയോടെ പുനർനിർമ്മിക്കാൻ ദൈവം നിങ്ങളെ സഹായിക്കുമെന്ന് യെശയ്യാവു 9:10 നമ്മെ ഓർമ്മിപ്പിക്കുന്നു. മൂലക്കല്ലായ യേശുക്രിസ്തു (1 കൊരിന്ത്യർ 10:4) എന്ന പുതിയ ഒരു അടിസ്ഥാനം അവൻ നിങ്ങൾക്ക് നൽകും. ഗൊല്യാത്തിനെ വീഴ്ത്തിയ കല്ലുപോലെ, ക്രിസ്തു നിങ്ങളുടെ ഉറച്ച അടിസ്ഥാനമായി നിങ്ങളോടൊപ്പം നിൽക്കും. അത്തിമരങ്ങൾ പരാജയപ്പെട്ടിടത്ത്, ദൈവം അവയ്ക്ക് പകരം തന്റെ  ശക്തിയുടെയും കരുതലിന്റെയും പ്രതീകമായ ദേവദാരുകൾ സ്ഥാപിക്കും. യേശുവിനെ നിങ്ങളുടെ അടിസ്ഥാനമായി സ്വീകരിക്കുകയും എഴുന്നേറ്റ് അവന്റെ മഹത്വത്തോടെ പുനർനിർമിക്കുകയും ചെയ്യുക. അപ്പൊ. പ്രവൃത്തികൾ 15:16 ദാവീദിന്റെ വീണുപോയ കൂടാരത്തെ വീണ്ടും പണിയുന്നതിനെക്കുറിച്ച് പറയുന്നു. പാപവും അവിശ്വാസവും മൂലമാണ് അത് വീണതെങ്കിലും, പാപമോചനത്തിനായുള്ള അവന്റെ ത്യാഗത്തിൽ വിശ്വസിച്ച് ആളുകൾ മിശിഹായായ യേശുക്രിസ്തുവിങ്കലേക്ക് മടങ്ങിയെത്തിയപ്പോൾ അത് പുനഃസ്ഥാപിക്കപ്പെട്ടു. അതുപോലെ, നിങ്ങൾ അവനിലേക്ക് തിരിയുമ്പോൾ ദൈവം നിങ്ങളുടെ ജീവിതവും പുനർനിർമ്മിക്കും.

രണ്ടാമതായി, ദൈവം നിങ്ങളുടെ കുടുംബത്തെ പുനർനിർമ്മിക്കും. യോവേൽ 2:25-27 നഷ്ടപ്പെട്ട സംവത്സരങ്ങൾ വീണ്ടെടുക്കുമെന്ന് വാഗ്ദാനം ചെയ്യുന്നു. വെട്ടുക്കിളികൾ തിന്നുകളഞ്ഞതെല്ലാം തിരികെ ലഭിക്കും. നിങ്ങൾക്കു സമൃദ്ധിയുണ്ടാകും; കർത്താവിനെ സ്തുതിക്കുക; ഇനി ഒരിക്കലും ലജ്ജിക്കേണ്ടിവരില്ല. ദൈവം നിങ്ങളുടെ കുടുംബത്തെ തന്റെ വാസസ്ഥലമാക്കി മാറ്റുകയും അതിന് മഹത്വം നൽകുകയും ചെയ്യും. അവൻ സകലജഡത്തിന്മേലും തന്റെ ആത്മാവിനെ പകരും. നിങ്ങളുടെ പുത്രന്മാരും പുത്രിമാരും യേശുവിന്റെ സാക്ഷ്യം പ്രവചിക്കും (വെളിപാട് 19:10). അവർ അവരുടെ ജീവിതത്തിൽ അവന്റെ പ്രവൃത്തി ധൈര്യത്തോടെ പങ്കിടും. നിങ്ങളുടെ യുവാക്കൾ ദർശനങ്ങൾ കാണുകയും മികവ് പുലർത്തുകയും അഭിവൃദ്ധി പ്രാപിക്കുകയും ലോകത്തിന്റെ പ്രശ്നങ്ങൾക്ക് പരിഹാരം കണ്ടെത്തുകയും മഹത്തായ കാര്യങ്ങൾ നേടുകയും ചെയ്യും. പുനർനിർമ്മാണം പൂർത്തിയാകുന്നത് കണ്ട് നിങ്ങളുടെ വൃദ്ധന്മാർ സന്തോഷത്തിന്റെ സ്വപ്നങ്ങൾ കാണും. നിങ്ങളുടെ മുഴുവൻ കുടുംബവും പരിശുദ്ധാത്മാവിലൂടെ പുനർനിർമ്മിക്കപ്പെടും. മൂന്നാമതായി, നിങ്ങളുടെ പേര് പുനർനിർമ്മിക്കപ്പെടും. നിങ്ങളുടെ പേര് കളങ്കിതമോ അപമാനകരമോ ആണെന്ന് നിങ്ങൾക്ക് തോന്നിയേക്കാം, എന്നാൽ വെളിപാട് 2:17 ൽ ദൈവം നിങ്ങൾക്ക് ഒരു വെള്ളകല്ലിൽ എഴുതിയിരിക്കുന്ന ഒരു പുതിയ പേര് നൽകുമെന്ന് വാഗ്ദാനം ചെയ്യുന്നു. യെശയ്യാവു 62:2 പറയുന്നു, യഹോവയുടെ വായ് കല്പിക്കുന്ന പുതിയ പേർ‍ നിനക്കു വിളിക്കപ്പെടും. അതു നിങ്ങളിലേക്ക് ബഹുമാനം, പുതിയ സ്ഥാനം, പുതിയ നില, പുതിയ നേട്ടങ്ങൾ എന്നിവ കൊണ്ടുവരും. നിങ്ങൾ പുതിയ മഹത്വത്തിൽ നടക്കും. യെശയ്യാവ് 65:15 - ൽ, ദൈവം തന്റെ ദാസന്മാർക്ക് തന്റെ അനുഗ്രഹത്താൽ അടയാളപ്പെടുത്തിയ ഒരു പുതിയ പേര് നൽകുമെന്ന് പ്രഖ്യാപിക്കുന്നു. ക്രിസ്തുവിനെപ്രതി നിങ്ങൾ അപമാനിക്കപ്പെട്ടാലും നിങ്ങളിലൂടെ അനേകർ അവനെ അറിയേണ്ടതിന് ദൈവം നിങ്ങളെ ഉയിർപ്പിക്കും. അവൻ നിങ്ങൾക്ക് ശക്തിയോടുകൂടിയ ഒരു പുതിയ ആത്മീയ വ്യക്തിത്വം നൽകും. സെഫന്യാവു 3:19 ഇങ്ങനെ വാഗ്ദാനം ചെയ്യുന്നു, ദൈവം നിങ്ങളെ ക്ളേശിപ്പിക്കുന്ന ഏവരോടും ഇടപെടുകയും നിങ്ങൾക്ക് പ്രശംസയും കീർത്തിയും നിറഞ്ഞ ഒരു പേര് നൽകുകയും ചെയ്യും. നിങ്ങൾ അപമാനം അനുഭവിച്ച സ്ഥലത്ത് തന്നെ നിങ്ങൾക്ക് ഇപ്പോൾ ബഹുമാനവും അംഗീകാരവും ലഭിക്കും. ദൈവം ആകാശത്തെയും ഭൂമിയെയും കടലിനെയും കരയെയും ഇളക്കും എന്ന് ഹഗ്ഗായി 2:6 പറയുന്നു. ഈ ഇളക്കത്തിൽ, സകല ജാതികളുടെയും മനോഹരവസ്തുവായ യേശു വരികയും തന്റെ ജനത്തെ മഹത്വം കൊണ്ട് നിറയ്ക്കുകയും ചെയ്യും. നിങ്ങൾ ജീവനുള്ള ദൈവത്തിന്റെ ആലയമാണ്, മുമ്പത്തേക്കാൾ പുതിയതും മഹത്തായതുമായ മഹത്വത്താൽ അവൻ നിങ്ങളെ നിറയ്ക്കും. വെല്ലുവിളികളാൽ ചുറ്റപ്പെട്ടതായി നിങ്ങൾക്ക് തോന്നിയാലും, ഈ കുലുക്കം അവന്റെ മഹത്വം സ്വീകരിക്കാൻ നിങ്ങളെ സജ്ജരാക്കുന്നു. നിങ്ങളിലുള്ള ക്രിസ്തു മഹത്വത്തിന്റെ  പ്രത്യാശയാകുന്നു.
 
PRAYER:
പ്രിയ കർത്താവേ, എന്റെ ജീവിതത്തിലെ തകർന്ന എല്ലാ മേഖലകളും ഞാൻ അങ്ങയുടെ കൈകളിലേക്ക് സമർപ്പിക്കുന്നു. അങ്ങയുടെ വാസസ്ഥലമായി എന്നെ പുനർനിർമ്മിക്കേണമേ; അങ്ങയുടെ മഹത്വം എന്നിൽ വസിക്കട്ടെ. എനിക്ക് നഷ്ടപ്പെട്ടതെല്ലാം പുനഃസ്ഥാപിക്കുകയും അങ്ങയുടെ ആത്മാവിനാൽ എന്റെ ശക്തി പുതുക്കുകയും ചെയ്യേണമേ. കർത്താവായ യേശുവേ, അങ്ങ് എന്റെ അടിസ്ഥാനമായിരിക്കേണമേ; അങ്ങയുടെ സത്യത്തിൽ എന്നെ സ്ഥിരപ്പെടുത്തേണമേ. അങ്ങയുടെ മഹത്വത്തിനും ബഹുമാനത്തിനും വേണ്ടി എന്റെ കുടുംബത്തെയും എന്റെ  ജോലിയെയും എന്റെ പേരിനെയും പുനർനിർമ്മിക്കേണമേ. അങ്ങയുടെ പരിശുദ്ധാത്മാവിനാൽ എന്നെ നിറയ്ക്കുകയും പുതിയ ജീവിതത്തിലേക്ക് എന്നെ നയിക്കുകയും ചെയ്യേണമേ. എന്റെ ലജ്ജയെ ബഹുമാനമായും എന്റെ ബലഹീനതയെ ശക്തിയായും മാറ്റണമേ. ഞാൻ ചെയ്യുന്ന എല്ലാ കാര്യങ്ങളിലും എന്റെ ജീവിതം അങ്ങയുടെ മഹത്വം പ്രതിഫലിപ്പിക്കട്ടെ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.