നീതിമാന്മാരായ മാതാപിതാക്കൾ എന്ന നിലയിൽ നിങ്ങൾ നിങ്ങളുടെ മക്കൾക്ക് വലിയ അവകാശവും പ്രതിഫലവും സമ്പത്തും കൊണ്ടുവരുന്നു. അതെ, സദൃശവാക്യങ്ങൾ 20:7 പറയുന്നു, "പരമാർത്ഥതയിൽ നടക്കുന്നവൻ നീതിമാൻ; അവന്റെ ശേഷം അവന്റെ മക്കളും ഭാഗ്യവാന്മാർ." പരമാർത്ഥതയുള്ള ആത്മാവോടെ നീതിപൂർവകമായ ജീവിതം നയിക്കുന്ന ഓരോ മാതാപിതാക്കളും തങ്ങളുടെ മക്കൾക്ക് വലിയ സമ്പത്തും വലിയ പ്രതിഫലവും കൊണ്ടുവരുന്നു. ദൈവം തന്നെ അവരെ അനുഗ്രഹിക്കുന്നു. നിങ്ങളുടെ ഹൃദയം അസ്വസ്ഥമാകാതിരിക്കട്ടെ. നിങ്ങളുടെ മക്കളുടെ ഭാവിയെ  പരിപാലിക്കാൻ മതിയായ പണമില്ലെന്ന് നിങ്ങൾക്ക് തോന്നിയേക്കാം, അല്ലെങ്കിൽ അവർക്ക് വലിയ ഉയരങ്ങളിലേക്ക് ഉയരാൻ നിങ്ങൾ വേണ്ടത്ര കാര്യങ്ങൾ ചെയ്തിട്ടില്ലെന്ന് നിങ്ങൾ കരുതുന്നുണ്ടാകാം. എന്നാൽ കർത്താവ് പറയുന്നു, "എന്റെ മകനേ, എന്റെ മകളേ, നീ നീതിയോടെ നിഷ്കളങ്ക ജീവിതം നയിച്ചു. നീ എന്റെ ഇഷ്ടമെല്ലാം ചെയ്തു, അതിനാൽ ഞാൻ നിന്റെ മക്കളെ അനുഗ്രഹിക്കും. അവരുടെ പ്രതിഫലം വളരെ വലുതായിരിക്കും. നിന്റെ മക്കൾക്ക് വേണ്ടി എല്ലാം ചെയ്യും. ഞാൻ അവരെ വർദ്ധിപ്പിക്കും." സങ്കീർത്തനം 115:14-ൽ എഴുതിയിരിക്കുന്നതുപോലെ, "നിങ്ങളെയും നിങ്ങളുടെ മക്കളെയും വർദ്ധിപ്പിക്കും."

നിഷ്കളങ്കരും നീതിയുള്ളവരുമായ മാതാപിതാക്കളുടെ മക്കൾക്ക് നൽകപ്പെടുന്ന അനുഗ്രഹങ്ങൾ എന്തൊക്കെയാണ്? ഒന്നാമതായി, സങ്കീർത്തനം 37:25 പ്രഖ്യാപിക്കുന്നതുപോലെ, ദൈവം അവർക്കുവേണ്ടി കരുതുകയും, അവർ തന്നെ ഒരു അനുഗ്രഹമായി മാറുകയും ചെയ്യുന്നു. രണ്ടാമതായി, സങ്കീർത്തനം 112:1-2 ൽ വാഗ്‌ദത്തം ചെയ്തിരിക്കുന്നതുപോലെ,  അവരുടെ മക്കൾ ഭൂമിയിൽ ബലപ്പെട്ടിരിക്കും. മൂന്നാമതായി, സങ്കീർത്തനം 115:12-14 അനുസരിച്ച് സമൃദ്ധമായ അനുഗ്രഹങ്ങളാൽ അവർ വർദ്ധിക്കും. കാരുണ്യയിൽ നിന്നുള്ള ഒരു വിദ്യാർത്ഥി, തന്റെ അച്ഛനും അമ്മയും ദിവസവേതനത്തിൽ അധ്വാനിച്ചിരുന്നുവെന്നും എന്നിട്ടും അവരുടെ നിഷ്കളങ്കവും നീതിയുള്ളതുമായ ജീവിതത്തിലൂടെ അവർ അവനെ ദൈവത്തോടൊപ്പം നടക്കാൻ പ്രേരിപ്പിച്ചുവെന്നും സാക്ഷ്യപ്പെടുത്തി. അവൻ നന്നായി പഠിക്കുകയും പ്ലസ് ടുവിൽ 90% ന് മുകളിൽ സ്കോർ ചെയ്യുകയും അതേ വർഷം തന്നെ കാരുണ്യയിൽ നിന്ന് പൂർണ്ണ സ്കോളർഷിപ്പ് നേടുകയും ചെയ്തു. ഇന്ന് അവൻ ട്യൂഷൻ ഫീസ് ഒന്നും അടയ്ക്കാതെ  എഞ്ചിനീയറിംഗ്, കമ്പ്യൂട്ടർ സയൻസ് എന്നിവ പഠിക്കുന്നു. ഇതാണ് നീതിമാന്മാരായ മാതാപിതാക്കളുടെ അനുഗ്രഹം! മക്കൾ വർദ്ധിച്ചുയരും. നിങ്ങളുടെ കുടുംബത്തിലും നിങ്ങളുടെ മക്കളിലും ഇത് സംഭവിക്കും.

നാലാമതായി, സങ്കീർത്തനം 14:5 പറയുന്നു, ദൈവം നിങ്ങളുടെ  മക്കളുടെ നടുവിൽ ഉണ്ടായിരിക്കും. അതെ, നിങ്ങൾ നീതിയിൽ നടക്കുമ്പോൾ നിങ്ങളുടെ മക്കളോടൊപ്പം ദൈവത്തിന്റെ സാന്നിധ്യം ഉണ്ടായിരിക്കും. അഞ്ചാമതായി, യെശയ്യാവു 65:22-24-ൽ വാഗ്ദാനം ചെയ്തിരിക്കുന്നതുപോലെ, നിങ്ങളുടെ മക്കൾ വിളിക്കുന്നതിന്നുമുമ്പെ ദൈവം ഉത്തരം അരുളും. എല്ലാറ്റിലും വലിയ അനുഗ്രഹമായ യോവേൽ 2:28 പ്രഖ്യാപിക്കുന്നത്, ദൈവം നിങ്ങളുടെ മക്കളുടെ മേൽ തന്റെ പരിശുദ്ധാത്മാവിനെ പകരും; നിങ്ങളുടെ പുത്രന്മാരും പുത്രിമാരും പ്രവചിക്കും എന്നാണ്. മാതാപിതാക്കൾ എന്ന നിലയിൽ നിങ്ങൾ അവന്റെ മുമ്പിൽ നീതിപൂർവ്വം നടക്കുന്നത് തുടരുമ്പോൾ, ഈ എല്ലാ അനുഗ്രഹങ്ങളും ദൈവം നിങ്ങളുടെ മക്കൾക്കു ദാനമായി നൽകട്ടെ.
 
PRAYER:
പ്രിയ കർത്താവേ, നീതിയിൽ നടക്കാനും അങ്ങയുടെ മുമ്പാകെ നിഷ്കളങ്ക ജീവിതം നയിക്കാനും എന്നെ സഹായിക്കണമേ. എന്റെ ജീവിതം എന്റെ മക്കൾക്കു അനുഗ്രഹവും അവകാശവും വർദ്ധനവും കൊണ്ടുവരുന്നതായിരിക്കട്ടെ. എന്റെ മക്കളുടെ നടുവിൽ അങ്ങ് വസിക്കുകയും അവരെ അങ്ങയുടെ വഴികളിൽ നയിക്കുകയും ചെയ്യണമേ. അവരെ ദേശത്തിൽ ശക്തരാക്കേണമേ, അവർ അനേകർക്ക് അനുഗ്രഹമായിരിക്കട്ടെ. കർത്താവേ, അവർ വിളിക്കുന്നതിനുമുമ്പ് അവർക്ക് ഉത്തരം നൽകുകയും അങ്ങയുടെ പരിശുദ്ധാത്മാവിനെ അവരുടെമേൽ ചൊരിയുകയും അങ്ങയുടെ മഹത്വത്തിനായി അവരെ ഉപയോഗിക്കുകയും ചെയ്യേണമേ. അങ്ങയുടെ മുമ്പാകെയുള്ള എന്റെ നീതിപൂർവകമായ ജീവിതം അവരുടെ ഭാവിയിലെ അനുഗ്രഹങ്ങൾക്ക് അടിസ്ഥാനമാകട്ടെ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.