പ്രിയ സുഹൃത്തുക്കളേ, ഇന്നത്തെ വാഗ്ദത്ത വചനമായ ഫിലിപ്പിയർ 4:7 ഇപ്രകാരം പറയുന്നു, "ദൈവ സമാധാനം നിങ്ങളുടെ ഹൃദയങ്ങളെയും നിനവുകളെയും ക്രിസ്തുയേശുവിങ്കൽ കാക്കും." ഈ ദൈവീക സമാധാനം മനുഷ്യന്റെ ബുദ്ധിയ്ക്ക് അതീതമാണ്. സമാധാനപരമായ കാര്യങ്ങളെക്കുറിച്ച് വെറുതെ ചിന്തിക്കുന്നതുമായി ഇതിനെ താരതമ്യം ചെയ്യാനാവില്ല. ഇത് നമ്മുടെ സ്വാഭാവികമായ യുക്തിയെ മറികടക്കുകയും ക്രിസ്തുവിൽ നമ്മുടെ ഹൃദയങ്ങളെയും നിനവുകളെയും സംരക്ഷിക്കുകയും ചെയ്യുന്നു. ഇത് യേശുവിന്റെ ചിന്തകളെ നമ്മുടെ ഹൃദയങ്ങളിലേക്ക് കൊണ്ടുവരികയും അവന്റെ വഴികൾ മനസ്സിലാക്കാൻ സഹായിക്കുകയും ചെയ്യുന്നു. ദൈവം നമ്മുടെ നിനവുകളോടും ഹൃദയങ്ങളോടും സംസാരിക്കുന്നു. അവന്റെ ശബ്ദത്തിലൂടെ നാം യഥാർത്ഥ സമാധാനം അനുഭവിക്കുന്നു.

വളരെ നിരാശനായപ്പോൾ ഞാൻ തന്നെ ഇത് അനുഭവിച്ചിട്ടുണ്ട്. ഞാൻ കർത്താവിനോട് ഇങ്ങനെ പ്രാർത്ഥിക്കാനും കരയാനും തുടങ്ങി, "കർത്താവേ, എന്റെ ജീവിതത്തിലെ കുറവുകളിലേക്ക് അങ്ങ് നോക്കേണമേ. ഞാൻ ശുശ്രൂഷയ്ക്ക് വേണ്ടത്ര ചെയ്യുന്നില്ല, എന്റെ ആത്മീയ ജീവിതത്തിൽ വേണ്ടത്ര ചെയ്യുന്നില്ല, എന്റെ കുടുംബത്തിന് വേണ്ടത്ര ചെയ്യുന്നില്ല, അങ്ങേക്കായുള്ള എന്റെ വേലയിൽ വേണ്ടത്ര ചെയ്യുന്നില്ല, ഞങ്ങളുടെ ടീം അംഗങ്ങൾക്ക് വേണ്ടത്ര ചെയ്യുന്നില്ല. കർത്താവേ, ഞാൻ ഒന്നിനും കൊള്ളാത്തവനാണ്. കർത്താവേ, എനിക്ക് ഒന്നിനും കഴിവില്ല.” ഞാൻ പരിഭ്രാന്തനായി ദൈവത്തിന്റെ മുമ്പിൽ കണ്ണുനീർ ഒഴുക്കിക്കൊണ്ട് പറഞ്ഞു, "കർത്താവേ, ഞാൻ വളരെ അസ്വസ്ഥനാണ്." ആ നിമിഷം, പെട്ടെന്ന്, എന്റെ ഹൃദയത്തിൽ പരിശുദ്ധാത്മാവ് നിറയുന്നത് എനിക്ക് അനുഭവപ്പെട്ടു. അവൻ എല്ലാം ഏറ്റെടുക്കുകയും വലിയൊരു ശാന്തത എന്നിൽ നിറയുകയും ചെയ്തു. പരിശുദ്ധാത്മാവിന്റെ ഭാഷ എന്നിലൂടെ ഒഴുകാൻ തുടങ്ങി.

ആ ഭാഷകളിൽ സംസാരിച്ചപ്പോൾ ഞാൻ പരിശുദ്ധാത്മാവിന്റെ ചിന്തകൾ മനസ്സിലാക്കാൻ തുടങ്ങി. "ഇവൻ സാം ആണ്. ഇവനുവേണ്ടിയുള്ള അങ്ങയുടെ പദ്ധതികൾ ഇവയാണ്. ഇവന് അങ്ങ്  നൽകിയിട്ടുള്ള അധികാരം ഇതാണ്. ഇവനുവേണ്ടി അങ്ങ് നിശ്ചയിച്ചിട്ടുള്ള വഴി ഇതാണ്" എന്നിങ്ങനെ എന്നെക്കുറിച്ച് അവൻ ദൈവത്തോട് സാക്ഷ്യപ്പെടുത്തുകയായിരുന്നു. ഈ വിശദാംശങ്ങളെല്ലാം അവൻ വെളിപ്പെടുത്തുകയായിരുന്നു. എന്റെ എല്ലാ കുറവുകളും മറക്കാൻ കഴിയുന്ന തരത്തിൽ പരിശുദ്ധാത്മാവിൽ ഞാൻ ബലപ്പെട്ടു. ദൈവത്തിന്റെ ചിന്തകളുടെയും വഴികളുടെയും ഒരു പുതിയ തലത്തിലേക്ക് അവൻ എന്നെ ഉയർത്തി. അങ്ങനെയാണ് അവന്റെ സമാധാനം നമ്മെ നയിക്കുന്നത്. ദൈവത്തിന്റെ വഴികൾ മനസ്സിലാക്കുകയും അവന്റെ ചിന്തകൾ നമ്മെ നിറയ്ക്കാൻ അനുവദിക്കുകയും ചെയ്യുമ്പോൾ, ഈ അമാനുഷിക സമാധാനം നാം അനുഭവിക്കുന്നു. വേദപുസ്തകത്തിലൂടെയും തന്റെ വചനത്തിലൂടെയും അവൻ നമ്മോട് സംസാരിക്കുകയും നമ്മുടെ ഹൃദയങ്ങളിലേക്ക് ഇടപെടുകയും ചെയ്യുന്നു. പ്രവചനത്തിലൂടെയും വിവിധ അവസരങ്ങളിലൂടെയും അവൻ സംസാരിക്കുന്നു. പരിശുദ്ധാത്മാവ് നൽകുന്ന അന്യഭാഷകളിലൂടെയും അവൻ സംസാരിക്കുന്നു. ഈ നിമിഷങ്ങളിലെല്ലാം അവന്റെ സമാധാനം നമ്മെ നിറയ്ക്കുന്നു. മനുഷ്യ മനസ്സിന് ഉളവാക്കാൻ കഴിയുന്ന ഏതൊരു സമാധാനത്തിനും അതീതമായതാണ് ഈ സമാധാനം.

PRAYER:
പ്രിയ കർത്തവേ, മനുഷ്യബുദ്ധിക്ക് അതീതമായ അങ്ങയുടെ പരിപൂർണ്ണ സമാധാനം കൊണ്ട് എന്റെ ഹൃദയത്തെയും നിനവുകളെയും നിറയ്ക്കണമേ. അപര്യാപ്തത, നിരാശ, ഉപയോഗശൂന്യത, അല്ലെങ്കിൽ പ്രശ്നങ്ങളാൽ ഞെരുക്കപ്പെടൽ എന്നിവ അനുഭവപ്പെടുമ്പോൾ, എന്റെ സാഹചര്യങ്ങളിലേക്ക് നോക്കുന്നതിന് പകരം അങ്ങിലേക്ക് നോക്കാൻ എന്നെ സഹായിക്കണമേ. മനുഷ്യസഹജമായ ആശങ്കകൾക്ക് അതീതമായി എന്റെ ചിന്തകളെ ഉയർത്തുകയും, എന്റെ ജീവിതത്തെക്കുറിച്ചുള്ള അങ്ങയുടെ വഴികളും പദ്ധതികളും മനസ്സിലാക്കാൻ എന്നെ പഠിപ്പിക്കുകയും ചെയ്യണമേ. അങ്ങയുടെ വചനവും അങ്ങയുടെ ശബ്ദവും പരിശുദ്ധാത്മാവും എല്ലാ ദിവസവും എന്നെ നയിക്കുമാറാകട്ടെ. അങ്ങയുടെ പരിശുദ്ധാത്മാവിനാൽ എന്നെ നിറയ്ക്കുകയും, അങ്ങയുടെ സ്നേഹവും പ്രത്യാശയും പരിഹാരങ്ങളും എന്റെ ഹൃദയത്തിലേക്ക് അരുളിച്ചെയ്യുകയും ചെയ്യണമേ. ക്രിസ്തുയേശുവിൽ എന്റെ ഹൃദയത്തെയും മനസ്സിനെയും കാത്തുസൂക്ഷിക്കുകയും, എന്റെ ജീവിതത്തിന്റെ എല്ലാ മേഖലകളിലും അത്ഭുതങ്ങൾ പ്രവർത്തിക്കുകയും ചെയ്യണമേ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.