പ്രിയ സുഹൃത്തുക്കളേ, നാം കർത്താവിന്റെ മക്കളായതിനാൽ നമ്മെ ഉയർത്താനായി കർത്താവ് ഇന്ന് വന്നിരിക്കുന്നു. സങ്കീർത്തനം 92:10-ൽ ഇപ്രകാരം പറയുന്നു: "എന്റെ കൊമ്പു നീ കാട്ടുപോത്തിന്റെ കൊമ്പുപോലെ ഉയർത്തും; പുതിയ എണ്ണ എന്നെ തേപ്പിക്കുന്നു." വലിയ ശത്രുതയ്ക്കിടയിലാണ് സങ്കീർത്തനക്കാരൻ 92-ാം സങ്കീർത്തനം എഴുതിയത്. അവനെ ഉപദ്രവിക്കുകയും പീഡിപ്പിക്കുകയും വലിയ പ്രശ്നങ്ങൾ സൃഷ്ടിക്കുകയും ചെയ്ത ആളുകളാൽ അവൻ ചുറ്റപ്പെട്ടിരുന്നു. എന്നിട്ടും, ഈ പ്രയാസങ്ങൾക്കിടയിലും അവൻ ഇപ്രകാരം പ്രഖ്യാപിക്കുന്നു, "കർത്താവേ, അങ്ങ് എന്നെ ഉയർത്തിയിരിക്കുന്നു. അങ്ങയുടെ പുതിയ എണ്ണ എന്റെമേൽ പകർന്നിരിക്കുന്നു. അങ്ങ് എന്നെ വലിയവനാക്കിയിരിക്കുന്നു."

നിങ്ങൾക്കുവേണ്ടിയും അങ്ങനെതന്നെ ചെയ്യാൻ കർത്താവ് ആഗ്രഹിക്കുന്നു. ആളുകൾ നിങ്ങളെ ഉപദ്രവിക്കുകയും പീഡിപ്പിക്കുകയും ചെയ്തിരിക്കാം. നിങ്ങൾ വലിയ അപമാനത്തിലൂടെ കടന്നുപോയിട്ടുണ്ടാകാം. കർത്താവിനുവേണ്ടി നിങ്ങൾ ഇവയെല്ലാം സഹിച്ചിട്ടുണ്ടാകാം. നിങ്ങൾ ക്ഷമയോടെ അവ സഹിച്ചിരിക്കാം. ഇപ്പോൾ കർത്താവ് അരുളിച്ചെയ്യുന്നു: “എന്റെ കുഞ്ഞിനെ ഉയർത്തേണ്ട സമയമാണിത്; എനിക്കുവേണ്ടി അവർ ക്ഷമയോടെ കാത്തിരുന്നു. ഇപ്പോൾ എന്റെ കൈ അവരുടെ മേൽ വരികയും അവരെ ഉയർത്തുകയും ചെയ്യേണ്ട സമയമാണിത്.” സങ്കീർത്തനം 23:5-ൽ, "എന്റെ ശത്രുക്കൾ കാൺകെ നീ എനിക്കു വിരുന്നൊരുക്കുന്നു" എന്ന് പറയുന്നതുപോലെ, നിങ്ങളെ എതിർത്തവരുടെ മുമ്പിൽപ്പോലും കർത്താവ് നിങ്ങളെ ഉയർത്തും.

മൊർദ്ദെഖായിക്ക് സംഭവിച്ചത് ഇതാണ്. കൊട്ടാരത്തിലെ ഒരു ഉന്നത ഉദ്യോഗസ്ഥനായിരുന്ന ഹാമാൻ രാജാവിനെ സ്വാധീനിച്ച്, മൊർദ്ദെഖായിയുടെ ജനമായ എല്ലാ യെഹൂദന്മാരെയും നശിപ്പിക്കുവാൻ പദ്ധതിയിട്ടു. എന്നാൽ ഈ സാഹചര്യത്തിനിടയിലും മൊർദ്ദെഖായി പ്രാർത്ഥനയിൽ ഉറച്ചുനിൽക്കുകയും തന്റെ അനന്തരവളായ എസ്ഥേർ രാജ്ഞിയോട് എന്തെങ്കിലും ചെയ്യാൻ അഭ്യർത്ഥിക്കുകയും ചെയ്തു. തന്റെ ജനത്തെ രക്ഷിക്കാനുള്ള കർത്താവിന്റെ  ശക്തിയിൽ അവൻ തുടർന്നും വിശ്വസിച്ചു.

എന്താണ് സംഭവിച്ചത്? ദൈവം ആ സാഹചര്യത്തെ മാറ്റിമറിച്ചു. മൊർദ്ദെഖായിക്കായി ഹാമാൻ ആസൂത്രണം ചെയ്ത മരണം ഹാമാന്റെമേൽ തന്നെ വീണു. മൊർദ്ദെഖായിക്ക് വേണ്ടി തയ്യാറാക്കിയ അതേ കഴുമരത്തിൽ തന്നെ ഹാമാനെ തൂക്കിക്കൊല്ലാൻ രാജാവ് ഉത്തരവിട്ടു. പകരം, രാജാവ് മൊർദ്ദെഖായിക്ക് തന്റെ കൊട്ടാരത്തിലെ ഉന്നതവും ബഹുമാന്യവുമായ ഒരു സ്ഥാനം നൽകി. എത്ര വലിയൊരു മാറ്റം! അതുപോലെ, നിങ്ങളുടെ ജനത്തിന്റെ മുമ്പിലും നിങ്ങളുടെ ശത്രുക്കളുടെ മുമ്പിലും ദൈവം നിങ്ങളെ ഉയർത്തും. ഇത് നമുക്ക് കർത്താവിൽ നിന്ന് സ്വീകരിക്കാമോ?

ഇന്ന്, നിങ്ങളെയും നിങ്ങളുടെ കുടുംബത്തെയും ഉയർത്താൻ കർത്താവ് ആഗ്രഹിക്കുന്നു. നിങ്ങളെ മാത്രമല്ല, നിങ്ങളുടെ കുടുംബത്തിലെ ഓരോ അംഗത്തെയും അവൻ ഉയർത്തുമെന്ന് വെളിപ്പെടുത്തിയിരിക്കുന്നു. നിങ്ങളുടെ മക്കൾ അഭിവൃദ്ധി പ്രാപിക്കും. പഠനത്തിൽ അവർ ഉന്നതരാകും. നിങ്ങളുടെ ഭാര്യ അഭിവൃദ്ധി പ്രാപിക്കും. നിങ്ങളുടെ ഭർത്താവ് അഭിവൃദ്ധി പ്രാപിക്കും. നിങ്ങളുടെ കുടുംബത്തിലെ ഓരോ അംഗവും ഉയർത്തപ്പെടും. കർത്താവ് അവരുടെമേൽ തന്റെ അഭിഷേകതൈലം ഒഴിച്ച് ശക്തമായ രീതിയിൽ ഉപയോഗിക്കും. കർത്താവ് നിങ്ങളെ വർദ്ധിപ്പിക്കുകയും തന്റെ മക്കളായി നിങ്ങളെ അവതരിപ്പിക്കുകയും ചെയ്യും. നിങ്ങളുടെ മേൽ ഉയർച്ചയുടെ കാലം വന്നിരിക്കുന്നു. ദൈവത്തിന് മഹത്വം നൽകുക.

PRAYER:
പ്രിയ കർത്താവായ യേശുവേ, അങ്ങയുടെ ദൃഷ്ടി ഞങ്ങളുടെമേൽ പതിപ്പിക്കുകയും ഞങ്ങളോട് കരുണ കാണിക്കുകയും ചെയ്യുന്നതിന് അങ്ങേയ്ക്ക് നന്ദി. അങ്ങയുടെ മക്കളിൽ പലരും അങ്ങേക്കുവേണ്ടി അപമാനവും വേദനയും കഷ്ടപ്പാടുകളും സഹിച്ചിട്ടുണ്ട്. കർത്താവേ, അവരെ ഓർക്കണമേ. എല്ലാ ദുഷ്കരമായ സാഹചര്യങ്ങളിലും അങ്ങയുടെ കരം അവരുടെമേൽ വരട്ടെ. ശത്രുക്കളുടെ മുന്നിൽ അവരെ ഉയർത്തുകയും എല്ലാ സാഹചര്യങ്ങളും അവരുടെ നന്മയ്ക്കായി മാറ്റുകയും ചെയ്യണമേ. അവരുടെ മക്കളെ അവരുടെ പഠനത്തിൽ അനുഗ്രഹിക്കുകയും അവരുടെ കുടുംബത്തിലെ ഓരോ അംഗത്തെയും സമൃദ്ധമായി അനുഗ്രഹിക്കുകയും ചെയ്യണമേ. അങ്ങയുടെ അഭിഷേകതൈലം അവരുടെമേൽ ഒഴിച്ച് അങ്ങയുടെ  മഹത്വത്തിനായി അവരെ ശക്തിയോടെ ഉപയോഗിക്കണമേ. അവരെ വർദ്ധിപ്പിക്കുകയും അങ്ങയുടെ മക്കളായി ഉറപ്പിക്കുകയും ചെയ്യണമേ. ഇത് അവർക്ക് ദൈവികമായ ഉയർച്ചയുടെ കാലമായിരിക്കട്ടെ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.