പ്രിയ സുഹൃത്തേ, ഇന്ന് നാം 1 രാജാക്കന്മാർ 9:3 ധ്യാനിക്കാൻ പോകുന്നു, അവിടെ കർത്താവ് ശലോമോനോടു പറഞ്ഞു, "നീ എന്റെ മുമ്പാകെ കഴിച്ചിരിക്കുന്ന നിന്റെ പ്രാർത്ഥനയും യാചനയും ഞാൻ കേട്ടു." ദൈവത്തെ കാണുകയും അവൻ സംസാരിക്കുന്നത് കേൾക്കുകയും ചെയ്യുന്നത് എത്ര സന്തോഷകരമാണ്. യഹോവ ശലോമോന്നു രണ്ടാം പ്രാവശ്യം പ്രത്യക്ഷനായി. ഇതു യഹോവ യിസ്രായേൽ ജനങ്ങളിൽ എത്രമാത്രം പ്രസാദിച്ചു എന്നും ദാവീദിന്റെ സന്തതികളെ എത്രമാത്രം സ്നേഹിച്ചു എന്നും കാണിക്കുന്നു. ആദ്യമായി ശലോമോൻ രാജാവായപ്പോൾ, അവൻ ദൈവത്തോട് സമ്പത്ത് ചോദിച്ചില്ല, മറിച്ച് ജ്ഞാനമാണ് അപേക്ഷിച്ചത്. രണ്ടാം പ്രാവശ്യം ശലോമോൻ ആലയത്തിനുവേണ്ടി പ്രാർത്ഥിച്ചു, "കർത്താവേ, ഈ ആലയത്തിലെ എല്ലാ പ്രാർത്ഥനകൾക്കും അങ്ങയുടെ കണ്ണും ചെവിയും തുറന്നിരിക്കട്ടെ" എന്ന് പറഞ്ഞു. അവന്റെ പ്രാർത്ഥനയിൽ വളരെ സന്തുഷ്ടനായ കർത്താവ് മറുപടി നൽകി, "എന്റെ ദൃഷ്ടിയും എന്റെ ഹൃദയവും എല്ലായ്പോഴും ഇവിടെ ഇരിക്കും." എത്ര സ്നേഹവാനായ ദൈവമാണ് നമുക്കുള്ളത്, അല്ലേ? നാം ചോദിക്കുന്നതിലും നിനെക്കുന്നതിലും അത്യന്തം പരമായി നൽകുന്ന ദൈവമാണ് നമ്മുടെ ദൈവം.

അതുപോലെ, II രാജാക്കന്മാർ 20-ൽ, ഹിസ്കീയാ രാജാവ് പ്രാർത്ഥിച്ചപ്പോൾ കർത്താവ് പറഞ്ഞു, "ഞാൻ നിന്റെ പ്രാർത്ഥന കേട്ടു നിന്റെ കണ്ണുനീർ കണ്ടിരിക്കുന്നു." ഹന്നയും ദൈവാലയത്തിൽ പ്രാർത്ഥിച്ചു, കർത്താവ് അവളുടെ പ്രാർത്ഥന കേട്ടു. അവൾ തനിക്കുവേണ്ടി മാത്രം ഒരു കുഞ്ഞിനെ ആവശ്യപ്പെട്ടില്ല, മറിച്ച്, "കർത്താവേ, നീ എനിക്ക് ഒരു മകനെ നൽകിയാൽ അടിയൻ അവനെ അവന്റെ ജീവപര്യന്തം യഹോവെക്കു കൊടുക്കും" എന്ന് പറഞ്ഞു. അത്തരമൊരു പ്രാർത്ഥന ദൈവത്തെ പ്രസാദിപ്പിച്ചു. ഒരിക്കൽ ഞങ്ങൾ എല്ലാവരും ഒരു കുടുംബമായി ഒത്തുകൂടി, ഞങ്ങളുടെ പിതാവായ സഹോദരൻ ഡി.ജി.എസ്. ദിനകരൻ രോഗിയായിരുന്നപ്പോൾ അദ്ദേഹത്തിനുവേണ്ടി പ്രാർത്ഥിച്ചത് ഞാൻ ഓർക്കുന്നു. അദ്ദേഹം ഞങ്ങളോട് എല്ലാവരോടും തന്റെ മേൽ കൈവെച്ച് പ്രാർത്ഥിക്കാൻ ആവശ്യപ്പെട്ടു. എൻ്റെ സമയം വന്നപ്പോൾ ഞാൻ പ്രാർത്ഥിച്ചു, "കർത്താവേ, എൻ്റെ പിതാവിന് നല്ല ആരോഗ്യം നൽകണമേ. കർത്താവേ, അദ്ദേഹം പ്രാർത്ഥിക്കുമ്പോൾ ഇനിയും അനേകം പേർക്കു സൌഖ്യം വരുത്തുവാൻ തക്കവണ്ണം അദ്ദേഹത്തെ സൗഖ്യമാക്കണമേ." ഞാൻ പ്രാർത്ഥിക്കുമ്പോൾ, കർത്താവ് എന്നെ പരിശുദ്ധാത്മാവിനാൽ നിറച്ചു, ഞാൻ സന്തോഷത്താൽ ചിരിക്കുകയായിരുന്നു. എന്റെ പ്രാർത്ഥനയിൽ കർത്താവ് പ്രസാദിച്ചുവെന്ന് അപ്പോൾ എനിക്ക് മനസ്സിലായി, ആ ദിവസം എനിക്ക് ദൈവത്തിൽ നിന്ന് തീർച്ചയായും പുതിയ കൃപ ലഭിച്ചു.

പ്രിയ സുഹൃത്തേ, നമ്മുടെ ദൈവം നമ്മുടെ പ്രാർത്ഥനകൾ കേൾക്കുന്നു, ഒരു പ്രാർത്ഥനയും ഒരിക്കലും പാഴാകുന്നില്ല. സങ്കീർത്തനം 56:8 ൽ ദൈവം നമ്മുടെ കണ്ണുനീർ മുഴുവൻ എണ്ണി തന്റെ തുരുത്തിയിൽ നിക്ഷേപിക്കുന്നു. സങ്കീർത്തനം 34:15 പറയുന്നു, "യഹോവയുടെ കണ്ണു നീതിമാന്മാരുടെ മേലും അവന്റെ ചെവി അവരുടെ നിലവിളിക്കും തുറന്നിരിക്കുന്നു." ഇന്ന്, പ്രാർത്ഥിക്കാൻ വേണ്ടി മാത്രം ഒരു ആലയത്തിൽ പോകേണ്ട ആവശ്യമില്ല, കാരണം ദൈവത്തിന്റെ യഥാർത്ഥ ആലയമായ യേശു നമ്മുടെ ഹൃദയങ്ങളിൽ വസിക്കുന്നു. നമുക്ക് എപ്പോൾ വേണമെങ്കിലും എവിടെയും യേശുവിനോട് സംസാരിക്കാം. ചിലപ്പോൾ നമ്മുടെ പ്രാർത്ഥനകൾ കേൾക്കപ്പെടുന്നില്ലെന്ന് നമുക്ക് തോന്നിയേക്കാം, പക്ഷേ അവന്റെ അനുഗ്രഹങ്ങളെ വിലമതിക്കാൻ, കർത്താവ് നമ്മെ കാത്തിരിക്കാൻ പ്രേരിപ്പിക്കുന്നു. യാചിച്ചുകൊണ്ടിരിക്കുക, മുട്ടിക്കൊണ്ടിരിക്കുക, കർത്താവ് കേൾക്കുന്നു. ഇന്നും അവൻ നിങ്ങളോട് പറയുന്നു, "ഞാൻ നിങ്ങളുടെ പ്രാർത്ഥന കേട്ടിരിക്കുന്നു". നിരുത്സാഹപ്പെടരുത്. ഏറ്റവും മികച്ച കാര്യങ്ങൾ ഇനിയും വരാനിരിക്കുന്നതേയുള്ളൂ. സങ്കീർത്തനം 23:5 - ൽ ദൈവം നിങ്ങൾക്കായി ഒരു വിരുന്നൊരുക്കിയിട്ടുണ്ടെന്ന് ദാവീദ് പറയുന്നു. എല്ലാം നിങ്ങൾക്കായി സൂക്ഷിച്ചിരിക്കുന്നു, നിങ്ങൾ കാത്തിരിക്കുമ്പോൾ, കർത്താവ് നിങ്ങൾക്ക് നൽകുന്ന അനുഗ്രഹങ്ങളെ നിങ്ങൾ വിലമതിക്കും.

PRAYER:
സ്വർഗ്ഗീയ പിതാവേ, അങ്ങ് എന്റെ പ്രാർത്ഥനകൾ കേൾക്കുകയും എന്റെ ഓരോ കണ്ണുനീരും കാണുകയും ചെയ്യുന്നതിനാൽ ഞാൻ അങ്ങേക്ക് നന്ദി പറയുന്നു. എന്റെ കാത്തിരിപ്പിന്റെ സമയത്ത് പോലും, അങ്ങ് എന്റെ നന്മയ്ക്കായി എല്ലാം ചെയ്യുന്നുവെന്ന് ഞാൻ വിശ്വസിക്കുന്നു. കർത്താവേ, ദയവായി എന്റെ വിശ്വാസം ശക്തിപ്പെടുത്തുകയും നിരാശപ്പെടാതിരിക്കാൻ എന്നെ സഹായിക്കുകയും ചെയ്യേണമേ. അങ്ങയുടെ സാന്നിധ്യം എന്റെ ജീവിതത്തിൽ നിറയട്ടെ. അങ്ങ് എനിക്കായി ഒരുക്കിവെക്കുന്ന എല്ലാ അനുഗ്രഹങ്ങളെയും വിലമതിക്കാൻ എന്നെ പഠിപ്പിക്കണമേ. കർത്താവേ, എന്റെ കണ്ണുനീർ നിറഞ്ഞ എല്ലാ പ്രാർത്ഥനകൾക്കും അങ്ങ് ഉത്തരം നൽകുന്നതിനാൽ അങ്ങേക്ക് നന്ദി. യേശുവിന്റെ മഹത്തായ നാമത്തിൽ ഞാൻ പ്രാർത്ഥിക്കുന്നു. ആമേൻ.