പ്രിയ സുഹൃത്തുക്കളെ, ഇന്ന് നിങ്ങളെ കാണാൻ കഴിഞ്ഞതിൽ വളരെ സന്തോഷമുണ്ട്. ദൈവത്തിന്റെ വചനം കേൾക്കുമ്പോൾ ദൈവത്തിന്റെ സന്തോഷം നമ്മുടെ ഹൃദയങ്ങളിൽ പ്രവേശിക്കുന്നു. ഇന്നത്തെ വാഗ്ദത്തം 1 ശമൂവേൽ 17:47-ൽ നിന്നുള്ളതാണ്: " യഹോവ വാൾകൊണ്ടും കുന്തംകൊണ്ടുമല്ല രക്ഷിക്കുന്നതു എന്നു ഈ സംഘമെല്ലാം അറിവാൻ ഇടവരും; യുദ്ധം യഹോവെക്കുള്ളതു; അവൻ നിങ്ങളെ ഞങ്ങളുടെ കയ്യിൽ ഏല്പിച്ചുതരും." എത്ര ശക്തമായ പ്രസ്താവനയാണിത്! ഈ വാക്യത്തിൽ നിന്ന് എന്റെ ശ്രദ്ധയിൽ ആദ്യം പതിയുന്നത്, യുദ്ധം യഹോവെക്കുള്ളതു എന്നതാണ്.

എന്റെ സുഹൃത്തുക്കളേ, നിങ്ങളുടെ ജീവിതത്തിലെ പോരാട്ടം മറ്റുള്ളവർ മൂലമാണെന്ന് നിങ്ങൾ ചിന്തിക്കുന്നുണ്ടാകാം. അതെ, അവർ നിങ്ങളെ എതിർക്കുന്നുണ്ടാകാം, അല്ലെങ്കിൽ പ്രശ്നങ്ങൾ നിങ്ങളെ എതിർക്കുന്നുണ്ടാകാം, പക്ഷേ യുദ്ധം കർത്താവിന്റെ യുദ്ധമാണെന്ന് ഓർക്കുക. ഇത് കേവലം ആരെങ്കിലും നിങ്ങൾക്കെതിരെ നടത്തുന്ന പോരാട്ടമല്ല; മറിച്ച്, നിങ്ങളുടെ ജീവിതത്തിൽ സംഭവിക്കാൻ കർത്താവ് അനുവദിച്ചിട്ടുള്ള അവന്റെ പോരാട്ടമാണിത്.

എന്തുകൊണ്ട്? ഈ വാക്യത്തിന്റെ അടുത്ത ഭാഗം പറയുന്നു, "അവൻ നിങ്ങളെ ഞങ്ങളുടെ കയ്യിൽ ഏല്പിച്ചുതരും". ഇവയെല്ലാം നിങ്ങളുടെ കൈകളിലേക്ക് വരും. ആരെങ്കിലും നിങ്ങളിൽ നിന്ന് വസ്തുവകകൾ മോഷ്ടിക്കുകയാണെങ്കിൽ, അവ നിങ്ങളുടെ കൈകളിലേക്ക് തിരിച്ചുവരും. ആ ശത്രുക്കൾ പോലും നിങ്ങളുടെ കാൽക്കൽ വന്ന് വീഴും. കർത്താവ് രക്ഷിക്കുന്നുവെന്ന് അവിടെ കൂടിയിരിക്കുന്നവരെല്ലാം അറിയുമെന്ന് ഈ വാക്യം പറയുന്നു. നിങ്ങളിലൂടെയും നിങ്ങൾക്കുവേണ്ടിയും കർത്താവ് രക്ഷിക്കുന്നു. നിങ്ങളുടെ ജീവിതത്തിൽ കർത്താവ് പ്രവർത്തിക്കുന്നത് ആളുകൾ കാണുകയും, അവർ അവനെ ഭയപ്പെടുകയും ചെയ്യും. അവനെ ഭയപ്പെടുന്നതുപോലെ തന്നെ അവർ നിങ്ങളെയും ഭയപ്പെടുകയും, "അയ്യോ, ഈ കർത്താവ് ഞങ്ങളെ ഉപദ്രവിക്കാൻ അനുവദിക്കരുതേ" എന്ന് പറഞ്ഞ് നിങ്ങൾക്ക് കീഴടങ്ങുകയും ചെയ്യും. ഇത് കർത്താവിന്റെ യുദ്ധമാണ്. കർത്താവാണ് നിങ്ങൾക്കുവേണ്ടി യുദ്ധം ചെയ്യുന്നതെന്ന് ആ ജനങ്ങൾ മനസ്സിലാക്കും. അതിനാൽ, എന്റെ സുഹൃത്തുക്കളേ, ഭയപ്പെടരുത്. ഈ യുദ്ധത്തിൽ ദൈവം നിങ്ങളെ രക്ഷിക്കാൻ പോകുന്നുവെന്ന് അറിയുക. നിങ്ങൾക്ക് കഴിയുന്നതിന്നു മീതെ ഒരു പരീക്ഷയും നിങ്ങളുടെ ജീവിതത്തിൽ കർത്താവ് അനുവദിക്കുന്നില്ലെന്ന് വേദപുസ്തകം പറയുന്നു. ആ പരീക്ഷയെ നേരിടാൻ അവൻ നിങ്ങൾക്ക് ശക്തി നൽകും, അതിൽ നിന്ന് രക്ഷപ്പെടാനുള്ള പോക്കുവഴിയും അവൻ നൽകും.

ഒരിക്കൽ, ഞങ്ങളുടെ സംഘടനയിൽ എന്തോ തെറ്റായ കാര്യങ്ങൾ നടക്കുന്നുവെന്ന വിവരം ഒരു സർക്കാർ ഏജൻസിക്ക് ലഭിച്ചതായും, അവർ വന്ന് ഞങ്ങളെ പൂർണമായി പരിശോധിക്കാനിരിക്കുകയാണെന്നും ഞങ്ങൾ കേട്ടു. മനുഷ്യരെന്ന നിലയിൽ ഞങ്ങൾ ഭയപ്പെട്ടു. എന്തായിരുന്നു ആ വിവരം? എന്തായിരിക്കാം  ആ തെറ്റ്? എന്നാൽ എന്റെ സുഹൃത്തുക്കളേ, അത് കർത്താവിന്റെ യുദ്ധമായിരുന്നു. അവർ വന്ന് എല്ലാം പരിശോധിച്ചു, ഒന്നും തെറ്റായിട്ടില്ലെന്ന് കണ്ടെത്തി. ഞങ്ങളുടെ സംഘടനയിൽ എല്ലാം തികഞ്ഞ നിലയിലായിരുന്നു. അത് അതിശയകരമായിരുന്നു. ഞങ്ങൾക്ക് ഭയപ്പെടാൻ ഒന്നുമുണ്ടായിരുന്നില്ല. ഇത് കർത്താവിന്റെ യുദ്ധമാണെന്നും അവൻ ഞങ്ങളെ രക്ഷിക്കുമെന്നും ഞങ്ങൾ തിരിച്ചറിയേണ്ടതിനായിരുന്നു. അവൻ ഞങ്ങൾക്കുവേണ്ടി പോരാടുകയും ഞങ്ങൾ സത്യസന്ധതയോടെ, ഗവൺമെന്റിന്റെ കാഴ്ചയിൽപ്പോലും എല്ലാ കാര്യങ്ങളും കൃത്യമായി ചെയ്യുന്ന ഒരു സംഘടനയാണെന്നും അവൻ വെളിപ്പെടുത്തി. നിങ്ങൾ ശരിയായി കാര്യങ്ങൾ ചെയ്യുന്ന വ്യക്തിയാണെന്ന് നിങ്ങളുടെ ശത്രുക്കൾക്കുപോലും അവൻ വെളിപ്പെടുത്തും. അതിനാൽ അവർ നിങ്ങളെ ബഹുമാനിക്കും.

അതുകൊണ്ട്, എന്റെ പ്രിയ സുഹൃത്തുക്കളേ, ഭയപ്പെടേണ്ട; യുദ്ധം യഹോവയുടെതാകുന്നു. അവനെ വിശ്വസിക്കുക, അവൻ നിങ്ങൾക്ക് വേണ്ടി യുദ്ധം ചെയ്യുകയും നിങ്ങളുടെ ജീവിതത്തിൽ വിജയം കൊണ്ടുവരികയും ചെയ്യും. കർത്താവ് നിങ്ങളെ എല്ലാ പോരാട്ടങ്ങളിൽ നിന്നും മോചിപ്പിക്കുകയും നിങ്ങളുടെ ജീവിതത്തിൽ തന്റെ വിശ്വസ്തത വെളിപ്പെടുത്തുകയും ചെയ്യുമാറാകട്ടെ. എന്റെ സുഹൃത്തുക്കളെ, ദൈവം നിങ്ങളെ അനുഗ്രഹിക്കട്ടെ!

PRAYER:
പ്രിയ കർത്താവേ, എല്ലാ യുദ്ധങ്ങളും അങ്ങയുടേതാണെന്ന് എന്നെ ഓർമ്മിപ്പിച്ചതിന് അങ്ങേക്ക് നന്ദി. ആളുകൾ എന്നെ എതിർക്കുമ്പോഴും പ്രശ്നങ്ങൾ ഉണ്ടാകുമ്പോഴും ബുദ്ധിമുട്ടുള്ള സാഹചര്യങ്ങൾ നേരിടുമ്പോഴും ഭയപ്പെടാതിരിക്കാൻ എന്നെ സഹായിക്കണമേ. എനിക്കുവേണ്ടി പോരാടുകയും ഉറച്ചുനിൽക്കാൻ എനിക്ക് ശക്തി നൽകുകയും ചെയ്യണമേ. അങ്ങ് എന്നെ ഏൽപ്പിച്ചിരിക്കുന്ന സകലതിനെയും സംരക്ഷിക്കുകയും, നഷ്ടപ്പെട്ടതെല്ലാം പുനഃസ്ഥാപിക്കുകയും ചെയ്യണമേ. അങ്ങയുടെ മുമ്പിൽ നേരോടെ നടക്കാൻ എനിക്ക് ജ്ഞാനവും സത്യസന്ധതയും ധൈര്യവും നൽകണമേ. എല്ലാ സാഹചര്യങ്ങളും അങ്ങയുടെ പരിപൂർണ്ണഹിതപ്രകാരം ക്രമീകരിക്കപ്പെടട്ടെ. അങ്ങ് എന്നോടുകൂടെയുണ്ടെന്ന് വെളിപ്പെടുത്തണമേ. എന്റെ ജീവിതം അങ്ങയുടെ നാമത്തിന് മഹത്വം നൽകട്ടെ. എനിക്ക് സമ്പൂർണ്ണ വിജയവും വിടുതലും നൽകണമേ. യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.